ວັນທີ 19 ກຸມພາ 2016 ທີ່ດ່ານສາກົນປາກຊັນ ແຂວງບໍລິຄຳໄຊໄດ້ມີການມອບ-ສົ່ງຜູ້ຕ້ອງຫາຄົນໄທ ຈຳນວນ 1 ຄົນ ທີ່ເຂົ້າເມືອງຜິດກົດໝາຍຄື ທ້າວ ສະຫຼາກໄຊ ພອກສະນິດ ( ອິ໋ວ ) ເຊື້ອຊາດ ແລະສັນຊາດໄທຢູ່ບ້ານສະອ່າງ ເມືອງ ກຸຂັນ ແຂວງສີສະເກດ ປະເທດໄທ ກັບຄືນປະເທດ, ກ່າວມອບໂດຍທ່ານ ຮ້ອຍເອກພັນ ແກ້ວມະນີຮອງຫົວໜ້າດ່ານຕຳຫຼວດກວດຄົນເຂົ້າ-ອອກເມືອງດ່ານສາກົນປາກຊັນ ແລະກ່າວຮັບໂດຍ ທ່ານ ຮ້ອຍເອກ ສູນທອນ ບົວສອນ ຮອງສາລະວັດຕຳຫຼວດກວດຄົນເຂົ້າ-ອອກ ເມືອງແຂວງບຶງການ, ມີເຈົ້າໜ້າທີ່ຂອງທັງສອງຝ່າຍເຂົ້າຮ່ວມ.
ເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງ ປກສ ແຂວງ ບໍລິຄຳໄຊໄດ້ໃຫ້ຮູ້ວ່າ: ທ້າວ ສະຫຼາກໄຊ ໄດ້ເຂົ້າມາ ລາວໃນໄລຍະຕົ້ນເດືອນທັນວາ 2015 ໂດຍໃຊ້ບັດປະຈຳຕົວເຮັດໃບຜ່ານແດນຊົ່ວຄາວຜ່ານດ່ານສາກົນວັງເຕົ່າ-ຊ່ອງເມັກເພື່ອມາເຮັດວຽກຢູ່ບໍລິສັດ OK ຢູ່ແຂວງ ຈຳປາສັກນຳໝູ່ຊື່ ທ້າວ ໄຊຍະ ພອນ ຄົນເຊື້ອຊາດ ແລະສັນຊາດໄທ, ຫຼັງຈາກເຮັດວຽກໄດ້ 2 ວັນພວກກ່ຽວ ທັງສອງກໍກັບຄືນໄປຊື້ເຄື່ອງອາໄຫຼ່ລົດຢູ່ປະເທດໄທ ມາຮອດວັນທີ 11 ທັນວາ 2015 ພວກກ່ຽວທັງສອງໄດ້ກັບເຂົ້າມາປະເທດລາວອີກໂດຍໃຊ້ໃບຜ່ານແດນຊົ່ວຄາວເຂົ້າມາທາງດ່ານສາກົນວັງເຕົ່າຄືເກົ່າຈາກນັ້ນທ້າວ ໄຊຍະພອນ ໄດ້ແນະນຳໃຫ້ ທ້າວ ສະຫຼາກໄຊເອົາລົດກະບະ ນິສັນ ໝາຍເລກທະບຽນ ກຂ 38 ຊຽງໃໝ່ຂື້ນມາຫາທ້າວ ຍຸດທະນາ ຢູ່ເມືອງປາກຊັນ ແຂວງບໍລິຄຳໄຊເພື່ອເຂົ້າໄປ ເຮັດວຽກຢູ່ເຂື່ອນໄຟຟ້ານ້ຳງຽບ, ສ່ວນ ທ້າວ ໄຊຍະພອນແມ່ນກັບຄືນປະເທດໄທ, ມາຮອດວັນທີ 12 ທັນວາ 2015 ທ້າວ ສະຫຼາກໄຊ ໄດ້ຂັບລົດນິສັນຄັນດັ່ງກ່າວ ຂຶ້ນມາປາກຊັນແລ້ວໄດ້ໄປພັກເຊົາຢູ່ ບ້ານໜອງຜຳເຮືອນພໍ່ຂອງ ທ້າວ ຫຼຸຍ ທີ່ເປັນກຳມະກອນຂັບລົດຢູ່ບໍລິສັດ OK, ເພື່ອລໍຖ້າ ທ້າວ ຍຸດທະນາ ( ຄົນໄທ ) ມາຮັບເອົາ, ຕົກມາຮອດວັນທີ 14 ທັນວາ 2015 ໄດ້ມີເຈົ້າໜ້າທີ່ ປກສ ເມືອງປາກຊັນລົງກວດກາເຫັນວ່າຜູ້ກ່ຽວບໍ່ມີເອກະສານຖືກຕ້ອງຈຶ່ງໄດ້ກັກຕົວມາສືບສວນ-ສອບສວນ ແລະໄດ້ນຳສົ່ງຕົວຜູ້ກ່ຽວໃຫ້ເຈົ້າໜ້າທີ່ຕຳຫຼວດກວດຄົນເຂົ້າ-ອອກເມືອງ ປກສ ແຂວງ ບໍລິຄຳໄຊ ດຳເນີນຄະດີຕາມກົດໝາຍ.
ຜ່ານການສືບສວນ-ສອບສວນຂອງ ເຈົ້າໜ້າທີ່ວິຊາສະເພາະເຫັນວ່າ ທ້າວ ສະຫຼາກໄຊ ພອກສະນິດ ( ອິ໋ວ ) ມີເຈຕນາລັກລອບເຂົ້າມາ ສປປ ລາວ ເພື່ອເຄື່ອນໄຫວປະກອບອາຊີບແບບບໍ່ຖືກຕ້ອງຢ່າງແທ້ຈິງ, ປະຈຸບັນໄດ້ດຳເນີນຄະດີຢ່າງຖືກຕ້ອງຕາມກົດໝາຍ ແຫ່ງ ສປປ ລາວ ເປັນທີ່ຮຽບຮ້ອຍແລ້ວ ຈຶ່ງໄດ້ສົ່ງຕົວຜູ້ກ່ຽວໃຫ້ເຈົ້າໜ້າທີ່ໄທນຳໄປສຶກສາ ອົບຮົມຕາມລະບຽບເພື່ອບໍ່ໃຫ້ຜູ້ກ່ຽວກະທຳຜິດຕື່ມອີກ.
ທີ່ມາ: ນສພ ເສດຖະິກດ-ສັງຄົມ
