ກອງປະຊຸມສະຫຼຸບຕີລາຄາຄືນວຽກງານກວດກາທົ່ວແຂວງປະຈຳສົກປີ 2014-2015 ໄດ້ໄຂຂຶ້ນຢ່າງເປັນທາງການໃນວັນທີ 23 ກຸມພາ 2016 ນີ້, ທີ່ສະໂມສອນແຂວງເຊກອງ, ໂດຍການເຂົ້າຮ່ວມຂອງທ່ານ ຄຳເຜີຍ ບຸດດາວຽງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆເຊກອງ, ທ່ານ ວັນໄຊ ຊົງຊາຢູ ຮອງປະທານຄະນະກວດກາສູນກາງພັກ, ມີຄະນະກວດກາພັກ-ລັດແຂວງ, ເມືອງ ແລະຂະແໜງການອ້ອມຂ້າງແຂວງເຂົ້າຮ່ວມ.
ທ່ານ ຫີນເພັດ ແກ້ວຫົງສາ ຮອງປະທານກວດກາພັກ-ລັດ, ຮອງຫົວໜ້າພະແນກກວດກາລັດແຂວງໄດ້ຕີລາຄາຄືນຜົນສຳເລັດໃນການຈັດຕັ້ງປະຕິບັດວຽກງານກວດກາວ່າ: ໃນໄລຍະຜ່ານມາອົງການປົກຄອງ ແລະຄະນະກວດກາໃນແຕ່ລະຂັ້ນໄດ້ເອົາໃຈໃສ່ຕິດຕາມກວດກາ
ແລະຊຸກຍູ້ປັບປຸງການຄຸ້ມຄອງບໍລິຫານລັດ, ການຈັດຕັ້ງປະຕິບັດແຜນພັດທະນາເສດຖະກິດສັງຄົມໃຫ້ເຂົ້າສູ່ລະບຽບກົດໝາຍ ແລະບັນດາແຜນງານ, ໂຄງການທີ່ງວາງໄວ້, ໂດຍສະເພາະໄດ້ເຄື່ອນໄຫວຕິດຕາມກວດກາບັນດາໂຄງການລົງທຶນຂອງລັດທີ່ສະພາອະນຸມັດທັງໝົດຈຳນວນ194 ໂຄງການ, ມູນຄ່າ 155 ຕື້ກວ່າກີບ, ໃນນັ້ນທຶນພາຍໃນ 190 ໂຄງການມູນຄ່າ 99 ຕື້ກວ່າກີບ,ທຶນຕ່າງປະເທດ 4 ໂຄງການມູນຄ່າ 55 ຕື້ກວ່າກີບ, ທີ່ ໄດ້ຮັບການຈັດຕັ້ງປະຕິບັດໂດຍມີຄະນະກຳມະການຕິດຕາມກວດກາປະເມີນຜົນໃນແຕ່ລະໄລຍະ, ໄດ້ຕິດຕາມກວດກາໂຄງການລົງທຶນຂອງລັດທີ່ສະເໜີຊຳລະໜີ້ແບບມີສ່ວນຫຼຸດ ແລະດ້ວຍການອອກພັນທະບັດຮ່ວມກັບຄະນະສະເພາະກິດຂັ້ນສູນກາງຕາມບັນຊີຂອງກະຊວງການເງິນຈຳນວນ 54 ໂຄງການ ມູນຄ່າ1,03 ພັນຕື້ກວ່າກີບ ນອກນີ້ຄະນະກວດກາ ຍັງໄດ້ປະສານສົມທົບລະຫວ່າງສູນກາງກັບທ້ອງຖິ່ນ, ເມືອງ ແລະຮາກຖານໃນການຕິດຕາມກວດກາການລັກລອບຊອກຄົ້ນສຳຫຼວດຂຸດຄົ້ນແຮ່ທາດ, ຂຸດຄົ້ນຊັບພະຍາກອນທຳມະຊາດທີ່ຜິດກົດໝາຍໄດ້ຈຳນວນໜຶ່ງ, ເອົາໃຈໃສ່ປະສານສົມທົບ ແລະອຳນວຍຄວາມສະດວກໃຫ້ແກ່ຄະນະກວດສອບປະຈຳພາກໃຕ້ທີ່ເຄື່ອນໄຫວກວດສອບງົບ
ປະມານຢູ່ແຂວງເຊກອງ ແລະສາມາດສະກັດກັ້ນການຮົ່ວໄຫຼຂອງງົບປະມານໄດ້ໃນລະດັບໜຶ່ງ, ເຮັດໃຫ້ແຂວງເຊກອງສາມາດຈັດເກັບລາຍຮັບໄດ້ 94 ຕື້ກວ່າກີບລື່ນແຜນ 105% ລາຍຈ່າຍປະຕິບັດ ໄດ້ 377 ຕື້ກວ່າກີບ, ລື່ນແຜນ 6%, ສັງລວມແລ້ວຍັງຂາດດຸນງົບປະມານທັງໝົດ 283 ຕື້ກວ່າກີບ, ທຽບໃສ່ແຜນປີ ຫຼຸດລົງ 0,78%.
ທ່ານ ຫີນເພັດ ແກ້ວຫົງສາ ກ່າວຕື່ມອີກວ່ານອກນີ້ຄະນະກວດກາໃນແຕ່ລະຂັ້ນຍັງໄດ້ເອົາໃຈໃສ່ຕ້ານສະກັດກັ້ນການສໍ້ລາດບັງຫຼວງດ້ວຍການເຄື່ອນໄຫວຕິດຕາມກວດກາ ແລະຊຸກຍູ້ບັນດາຂະແໜງການອ້ອມຂ້າງແຂວງ ແລະ 4 ຕົວ ເມືອງປະຕິບັດວຽກງານຕາມພາລະບົດ ບາດ, ໜ້າທີ່, ຂອບເຂດສິດຂອງຕົນຢ່າງຕັ້ງໜ້າ, ເປັນເຈົ້າການສຶກສາອົບຮົມການເມືອງແນວຄິດໃຫ້ແກ່ພະນັກງານສະມາຊິກພັກໃຫ້ມີສະຕິຕື່ນຕົວເຄົາລົບຕໍ່ລະບຽບກົດໝາຍເຄື່ອນໄຫວໜ້າທີ່ວຽກງານຕາມຄວາມຮັບຜິດຊອບ, ຮັບປະກັນຄວາມໂປ່ງໃສບໍລິສຸດສັດຊື່, ພ້ອມທັງມີການປັບປຸງກົນໄກການຄຸ້ມຄອງບໍລິຫານລັດໃຫ້ມີຄວາມເໝາະສົມ ແລະ ເອົາໃຈໃສ່ປະຕິບັດການແຈ້ງຊັບສິນຂອງພະນັກງານລັດຖະກອນໃຫ້ມີຄວາມຖືກຕ້ອງສອດຄ່ອງກັບສະພາບຕົວຈິງ, ເພື່ອເລັງໃສ່ແກ້ໄຂບັນຫາການສໍ້ລາດບັງຫຼວງໃຫ້ຫຼຸດໜ້ອຍຖອຍລົງເທື່ອລະກ້າວ.
ທີ່ມາ: ນສພ ເສດຖະກິດ-ສັງຄົມ
