ກອງ​ປະຊຸມ​ຄະນະ​ວິຊາ​ການດ້ານ​ການ​ເງິນ ແລະ ທະນາຄານກາງ​ອາ​ຊຽນ ແລະ ອາ​ຊຽນ+3 ໄດ້​ຈັດ​ຂຶ້ນ​ວັນ​ທີ 22 ກຸມພາ 2016 ທີ່​ໂຮງແຮມ​ດອນ​ຈັນ​ພາເລດ ນະຄອນຫຼວງ​ວຽງ​ຈັນ ເປັນປະທານ​ຂອງ​ທ່ານ ບຸນ​ຖົມ ລໍ​ມະນີ ຫົວໜ້າ​ກົມ​ຮ່ວມ​ມື​ສາກົນ ກະຊວງ​ການ​ເງິນ ມີ​ວິຊາ​ການ​ດ້ານການ​ເງິນ ແລະ ທະນາຄານ​ຈາກປະເທດ​ອາ​ຊຽນ ແລະ ອາ​ຊຽນ+3 ເຂົ້າ​ຮ່ວມ.

ກອງ​ປະຊຸມ​ຄັ້ງ​ນີ້ ຈະ​ໄດ້​ດຳເນີນ​ໄປ​ເປັນ​ເວລາ 7 ວັນ ແລະ ມີ 7 ກອງ​ປະຊຸມ​ປິ່ນ​ອ້ອມ ໂດຍ​ມີຈຸດປະສົງ​ເພື່ອ​ກະກຽມ​ດ້ານ​ເນື້ອໃນ ໃຫ້​ກອງ​ປະຊຸມ​ລັດຖະມົນຕີຊ່ວຍ​ການ​ເງິນ ແລະ ຮອງ​ຜູ້​ວ່າການ​ທະນາຄານ​ກາງ​ອາ​ຊຽນ ອາ​ຊຽນ+3 ກອງ​ປະຊຸມ​ລັດ​ຖະມົນຕີ​ການ​ເງິນ​ອາ​ຊຽນ ​ຄັ້ງ​ທີ 20 ກອງ​ປະຊຸມ​ຜູ້​ວ່າການ​ທະນາຄານກາງ​ອາ​ຊຽນ ​ຄັ້ງ​ທີ 12 ແລະ ກອງປະຊຸມ​ຮ່ວມ​ລະຫວ່າງ​ລັດ​ຖະ​ມົນຕີ​ການ​ເງິນ ແລະ ຜູ້​ວ່າການ​ທະນາ​ຄານ​ກາງ​ອາ​ຊຽນ ​ຄັ້ງ​ທີ 2 ທີ່ຈະ​ຈັດ​ຂຶ້ນ​ໃນ​ວັນ​ທີ 1-4 ເມສາ 2016 ທີ່​ນະຄອນຫຼວງ​ວຽງ​ຈັນ ພ້ອມ​ທັງ​ປຶກສາ​ຫາລື​ວຽກ​ທີ່​ພົວພັນ​ຂອງ​ຂະແໜງການ​ເງິນ ​ທີ່​ຈະເອົາ​ເຂົ້າ​ໃນ​ແຜນຫຼັງ​ປະຊາ​ຄົມເສດຖະກິດ​ອາ​ຊຽນ ຮອດ​ປີ 2025.

ຂໍ້ມູນຈາກ http://www.vientianemai.net/