ສຳນັກຂ່າວຕ່າງປະເທດ ລາຍງານໃນວັນທີ 23 ກຸມພານີ້ວ່າ ອົງການການບິນພົນລະເຮືອນລະຫວ່າງປະເທດ ຫລື ICAO ໄດ້ປະກາດຫ້າມນຳແບັດເຕີຣີລິທຽມ-ໄອອອນ ຂຶ້ນເຮືອບິນຂົນສົ່ງໂດຍສານ ເນື່ອງຈາກຢ້ານວ່າ ການນຳອຸປະອນດັ່ງກ່າວຂຶ້ນເຮືອບິນ ຈະເປັນການສ່ຽງຕໍ່ການເກີດປະກາຍໄຟ ຊຶ່ງເປັນຕົ້ນເຫດເຮັດໃຫ້ໄຟໄໝ້ ໂດຍຄຳປະກາດຫ້າມດັ່ງກ່າວນີ້ ຈະມີຜົນບັງຄັບໃຊ້ ໃນວັນທີ 1 ເມສາ 2016 ເປັນຕົ້ນໄປ.
ທັງນີ້ ແບັດເຕີຣີລິທຽມ-ໄອອອນ ແມ່ນແບັດເຕີຣີທີ່ໃຊ້ສຳລັບໂທລະສັບ ແລະ ແລັບທັອບຕ່າງໆ ທີ່ສາມາດສາກໄດ້, ພາຍຫລັງການປະກາດດັ່ງກ່າວນີ້ມີຜົນບັງຄັບໃຊ້ ກໍຈະເຮັດໃຫ້ບັນດາປະເທດທີ່ເປັນສະມາຊິກ ອົງການ ICAO ຊຶ່ງປະກອບມີ 36 ປະເທດໃນທົ່ວໂລກ ຈະຫ້າມບໍ່ໃຫ້ນຳອຸປະກອນດັ່ງກ່າວນີ້ ຂຶ້ນເທິງເຮືອບິນເດັດຂາດ ຈົນກວ່າຈະມີການອອກແບບ ແລະ ຜະລິດບ່ອນເກັບມ້ຽນ ສຳລັບແບັດເຕີຣີລິທຽມ-ໄອອອນ ທີ່ປອດໄພ ສຳລັບການຂົນສົ່ງທາງເຮືອບິນ ອອກມານຳໃຊ້ໄດ້.
