ເມືອງ​ໄຊ​ທານີ ນະຄອນຫຼວງວຽງ​ຈັນ ຈັດ​ງານ​ຕະຫຼາດນັດວາງສະແດງ​ຂາຍ​ສິນຄ້າ​ກະ​ສິກຳ ອຸດ​ສະຫະ​ກຳ ແລະ ຫັດຖະກຳ ຄັ້ງ​ທຳ​ອິດ​ຂຶ້ນ ລະຫວ່າງ​ວັນທີ 19-24 ກຸມພາ 2016 ທີ່​ບ້ານພະ​ຂາວ.

ການ​ຈັດ​ງານ​ຄັ້ງ​ນີ້ ​ເພື່ອ​ເປັນການ​ຢັ້ງຢືນ​ໃນ​ການຈັດຕັ້ງ​ແຜນພັດທະນາ​ເສດຖະກິດ-ສັງຄົມຂອງ​ເມືອງ ພ້ອມ​ທັງ​ສ້າງ​ເງື່ອນໄຂ​ໃຫ້​ຊາວ​ກະສິກອນ ຊ່າງ​ຫັດຖະ​ກຳ ຄອບຄົວ​ຕົວ​ແບບ ຫົວໜ່ວຍ​ທຸລະ​ກິດ​ດ້ານ​ຕ່າງໆ​ພາຍໃນ​ເມືອງ ແລະ ຕ່າງ​ເມືອງ​ໄດ້​ນຳເອົາ​ຜະລິດ​ຕະ​ພັນ​ຂອງ​ຕົນ​ ມາວາງສະແດງ​ຂາຍ​ອອກ​ສູ່​ສັງຄົມ ທັງ​ນີ້​ກໍ່​ເພື່ອ​ສົ່ງເສີມ​ການ​ຜະລິດເປັນ​ສິນຄ້າ​ຂອງ​ປະຊາຊົນ ແລະ ຄອບຄົວ​ໃຫ້​ຂະຫຍາຍຕົວ​ແຂງແຮງ ເປີດ​ກວ້າງ​ດ້ານ​ການ​ຄ້າ ການ​ບໍລິການ ການທ່ອງທ່ຽວຂອງ​ເມືອງ ​ໃຫ້​ຂະຫຍາຍຕົວກວ້າງຂວາງ​ຂຶ້ນ​ຕື່ມ ເປັນ​ການແລກປ່ຽນ​ບົດຮຽນ​ຂອງ​ຊາວ​ກະສິ​ກອນ ຊ່າງ​ຫັດຖະກຳ ຄອບຄົວຕົວ​ແບບ ຜູ້​ທຳ​ການ​ຜະລິດ​ສິນຄ້າ​ໂອ​ດ໋ອບ​ຂອງ​ເມືອງ.

ສຳລັບ​ຮ້ານ​ວາງສະແດງ ແລະ ຂາຍ​ສິນຄ້າ​ຄັ້ງ​ນີ້​ມີ 141 ຮ້ານ ໃນນັ້ນ ມີ​ຜົນ​ຜະລິດ​ຂອງ​ປະຊາຊົນພາຍ​ໃນ​ເມືອງ​ໄຊ​ທານີ ຈຳນວນ 33 ຮ້ານ ລວມ​ມູນ​ຄ່າ​ສິນຄ້າ​ທັງໝົດ 773 ລ້ານ​ກີບ ປະກອບ​ມີ​ຜະລິດ​ຕະ​ພັນ​ສິນຄ້າ​ໂອ​ດ໋ອບ ການຜະລິດ​ກະສິກຳ​ຂອງ​ຄອບຄົວ​ຕົວແບບ ເຄື່ອງ​ອຸດ​ສະຫະ​ກຳ ຫັດຖະກຳ ເຟີ​ນີ​ເຈີ ແລະ ບໍລິສັດ​ຕົວແທນ​ຈຳໜ່າຍ​ຜະລິດ​ຕະ​ພັນຜະລິດ​ຕະ​ພັນ​ສິນຄ້າ​ຕ່າງ​ແຂວງ ຮ້ານ​ບໍລິການ ຮ້ານ​ຂາຍ​ສິນຄ້າທົ່ວ​ໄປ ຮ້ານ​ກິນ​ດື່ມ ແລະ ຮ້ານອາຫານ.