ເວລາປະມານ 9 ໂມງເຊົ້າຂອງວັນທີ 21 ກຸມພາຜ່ານມາ ຢູ່ເສັ້ນທາງຕັດໃໝ່ເມືອງນານ ເຂດບ້ານເໝືອດເມືອງກາສີ ແຂວງວຽງຈັນ ໄດ້ເກີດອຸບັດເຫດລົດເມຕຳກັບລົດຕູ້ເຮັດໃຫ້ມີຜູ້ເສຍຊີວິດຄາທີ່ 5 ຄົນ ແລະມີຜູ້ໂດຍສານຢູ່ລົດທັງສອງຄັນໄດ້ຮັບບາດເຈັບກວ່າ 30 ຄົນ.
ເຈົ້າໜ້າທີ່ພະແນກຕຳຫຼວດຈະລາຈອນແຂວງວຽງຈັນ ໃຫ້ຮູ້ວ່າ: ພາຍຫຼັງໄດ້ຮັບແຈ້ງວ່າມີອຸບັດເຫດຢ່າງຮຸນແຮງເກີດຂຶ້ນຢູ່ເສັ້ນທາງຕັດໃໝ່ເມືອງນານ ເຈົ້າໜ້າທີ່ໄດ້ເລ່ງນຳກຳລັງລົງຈຸດເກີດເຫດ, ພົບເຫັນຮ່າງຜູ້ເສຍຊີວິດຈຳນວນ 5 ຄົນ, ຄື ທ້າວ ຈັນພູທອນ ອາຍຸ 36 ປີ, ຜູ້ຂັບຂີ່ລົດຕູ້ ແລະຄົນຕ່າງປະເທດສັນຊາດເກົາຫຼີ 4 ຄົນ, ຍິງ 3 ຄົນ (ຍັງບໍ່ຮູ້ຊື່) ພ້ອມຜູ້ໄດ້ຮັບບາດເຈັບກວ່າ 30 ຄົນ ຊຶ່ງເຈົ້າໜ້າທີ່ໄດ້ເລ່ງນຳຕົວສົ່ງໂຮງໝໍຢ່າງຮີບດ່ວນ.
ຜ່ານການສືບສວນ-ສອບສວນເບື້ອງຕົ້ນໄດ້ຮູ້ວ່າ: ກ່ອນເກີດເຫດລົດເມໝາຍເລກທະບຽນ ບກ 5551 ແຂວງ ຫຼວງພະບາງ ໄດ້ຂັບຂີ່ມາ ແຕ່ແຂວງຫຼວງພະບາງມຸ່ງໜ້າມານະຄອນຫຼວງວຽງຈັນ ມີຜູ້ໂດຍສານທັງໝົດ 30 ກວ່າຄົນ ພໍມາເຖິງຈຸດເກີດເຫດທີ່ເປັນຈຸດຄ້ອຍຊັນ, ແລະເສັ້ນທາງໂຄ້ງ, ດ້ວຍຄວາມໄວ, ບວກກັບສະພາບເສັ້ນທາງທີ່ເປ່ເພເຮັດໃຫ້ລົດເມເກີດເສຍຫຼັກໄປຕຳກັບລົດຕູ້ໝາຍເລກທະບຽນ ກກ 5536 ແຂວງວຽງຈັນ ຢ່າງຮຸນແຮງ ຈົນເຮັດໃຫ້ຜູ້ໂດຍສານຟົ້ງອອກມາຈາກລົດ ແລະມີຜູ້ເສຍຊີວິດ 5 ຄົນ.
ປະຈຸບັນ ເຈົ້າໜ້າທີ່ໄດ້ກັກຕົວຜູ້ຂັບຂີ່ລົດເມຄື ທ້າວ ເຂັມພອນ ອາຍຸ 40 ປີ ເພື່ອສືບສວນ-ສອບສວນ ແລະດຳເນີນຄະດີຕາມລະບຽບກົດໝາຍ.
ທີ່ມາ: ນສພ ເສດຖະກິດ-ສັງຄົມ
