ກະຊວງກະສິກຳ ແລະ ປ່າໄມ້ໃຫ້ຮູ້ວ່າ: ສະພາບອາການໜາວໃນໄລຍະຜ່ານມານີ້, ໄດ້ສົ່ງຜົນເຮັດໃຫ້ ການປັກດຳເຂົ້ານາແຊງ ຊັກຊ້າກ່ວາປົກກະຕິ, ເນື່ອງຈາກມີບາງທ້ອງຖິ່ນໜາວເຢັນຫຼາຍ ຈຶ່ງບໍ່ສາມາດກະກຽມ ແລະ ຕົກກ້າໄດ້, ຊຶ່ງມາຮອດປັດຈຸບັນ ທົ່ວປະເທດສາມາດປັກດຳໄດ້ແລ້ວພຽງ 85 ພັນກ່ວາຮັກຕາ, ເທົ່າກັບ 75% ຂອງເນື້ອທີ່ແຜນການວາງໄວ້, ດັ່ງນັ້ນ ຫຼາຍທ້ອງຖິ່ນ ຈຶ່ງໄດ້ຂຸ້ນຂ້ຽວປັກດຳໃຫ້ສຳເລັດຕາມຄາດໝາຍເຊັ່ນ: ຫຼວງນ້ຳທາ, ອຸດົມໄຊ, ວຽງຈັນ, ນະຄອນຫຼວງວຽງຈັນ ແລະ ສະຫວັນນະເຂດ, ກໍສາມາດປັກດຳ ສຳເລັດແລ້ວເປັນສ່ວນໃຫຍ່ ໃນນັ້ນສະເພາະແຂວງພາກກາງ ປະຕິບັດໄດ້ແລ້ວຫຼາຍກວ່າ 86 %, ພາກເໜືອ 48 %, ພາກໃຕ້ 60 % ແລະ ປັດຈຸບັນຂະແໜງກະສິກຳ ກໍໄດ້ສົ່ງພະນັກງານວິຊາການຂອງຕົນ ລົງຊຸກຍູ້ຊາວກະສິກອນ ສຸມໃສ່ການຜະລິດກະສິກຳ ໃຫ້ໄດ້ຮັບຜົນເຊັ່ນ: ການບົວລະບັດຮັກສາ, ການກຽມພ້ອມປ້ອງກັນສັດຕູພືດ, ໃສ່ຝຸ່ນ, ເສຍຫຍ້າໃຫ້ດີ ເພື່ອສາມາດຍົກສະມັດຕະພາບການຜະລິດເຂົ້າສູງຂື້ນ.
ກະຊວງດັ່ງກ່າວໃຫ້ຮູ້ອີກວ່າ: ໃນໄລຍະນີ້ ຄຽງຄູ່ກັບການປັກດຳເຂົ້ານາແຊງແລ້ວ ກະສິກອນທ້ອງຖິ່ນຕ່າງໆ ຍັງໄດ້ສຸມໃສ່ປູກພືດລະດູແລ້ງ ຊະນິດຂອງພືດຢ່າງເປັນຂະບວນຟົດຟື້ນ, ຊຶ່ງມາຮອດປັດຈຸບັນ ທົ່ວປະເທດ ສາມາດປະຕິບັດໄດ້ແລ້ວ ຫຼາຍກວ່າ 87 ພັນເຮັກຕາ, ທົ່ວກັບ 76 % ຂອງແຜນການ, ຂະນະທີ່ສະພາບອາກາດໜາວ ຍັງສົ່ງຜົນກະທົບຕໍ່ຜົນລະປູກຂອງປະຊາຊົນຢ່າງຮ້າຍແຮງ ໂດຍສະເພາະບັນດາແຂວງພາກເໜືອຄື: ຜົ້ງສາລີ, ຫຼວງນ້ຳທາ, ບໍ່ແກ້ວ, ອຸດົມໄຊ , ຫຼວງພະບາງ, ຫົວພັນ, ໄຊຍະບູລີ ແລະ ແຂວງຊຽງຂວາງ, ລວມມີເນື້ອທີ່ປະສົບໄພໜາວທັງໝົດ 1.620 ເຮັກຕາ.
ແຫລ່ງຂ່າວ:
