ປີ 2015 ຜ່ານມາ ປະທານປະເທດແຫ່ງ ສປປ ລາວ ໄດ້ອອກລັດຖະດຳລັດໃຫ້ອະໄພຍະໂທດແກ່ນັກໂທດ ຈຳນວນ 1.029 ຄົນ ຍິງ 232 ຄົນ ແລະ ຕ່າງປະເທດ 26 ຄົນ ຍິງ 1 ຄົນ ສ່ວນຕ່າງປະເທດມີສັນຊາດໄທ 13 ຄົນ ຍິງ 1 ຄົນ ຫວຽດນາມ 7 ຄົນ ຈີນ 5 ຄົນ ແລະ ສ ເກົາຫຼີ 1 ຄົນ ເຊິ່ງໃນນີ້ມີນັກໂທດໄດ້ຮັບອະໄພຍະໂທດຫຼຸດຜ່ອນໂທດ ຈຳນວນ 820 ຄົນ ຍິງ 186 ຄົນ ແລະ ອະໄພຍະໂທດປ່ອຍຕົວ ມີຈຳນວນ 209 ຄົນ ຍິງ 46 ຄົນ.
ທ່ານ ບຸນຍັງ ຈັນດາລະສານ ຮອງຫົວໜ້າອົງການໄອຍະການປະຊາຊົນສູງສຸດ ຮອງປະທານຄະນະກຳມະການອະໄພຍະໂທດລະດັບຊາດ ກ່າວວ່າ: ການໃຫ້ອະໄພຍະໂທດແກ່ນັກໂທດ ແມ່ນການປະຕິບັດນະໂຍບາຍມະນຸດສະທຳ ໂດຍແມ່ນສິດ ແລະ ໜ້າທີ່ຂອງປະທານປະເທດ ທີ່ໄດ້ກຳນົດໄວ້ໃນມາດຕາ 67 ຂໍ້ 12 ຂອງລັດຖະທຳມະນູນ ແຫ່ງ ສປປ ລາວ ສະບັບປັບປຸງ ປີ 2015 ເພື່ອສຶກສາອົບຮົມໃຫ້ແກ່ນັກໂທດ ໃຫ້ເຫັນໄດ້ແນວທາງນະໂຍບາຍອັນຖືກຕ້ອງເປັນທຳຂອງພັກ-ລັດ ຕັ້ງໜ້າເຝິກຝົນຫຼໍ່ຫຼອມຕົວເອງ ໃຫ້ມີການປ່ຽນແປງທາງດ້ານທັດສະນະແນວຄິດ ແລະ ໄດ້ມີຄວາມຮູ້ສຶກກິນແໜງຕໍ່ການກະທຳຜິດຂອງຕົນ ກໍ່ສ້າງຕົນເອງ ໃຫ້ກາຍເປັນພົນລະເມືອງດີຂອງຊາດ ປະກອບສ່ວນເຂົ້າໃນພາລະກິດປົກປັກຮັກສາ ພັດທະນາປະເທດຊາດ ແລະ ເປັນການໂຄສະນາເຮັດໃຫ້ປະຊາຊົນບັນດາເຜົ່າ ແລະ ສາກົນ ໄດ້ຮັບຮູ້ເຂົ້າໃຈແນວທາງນະໂຍບາຍອັນຖືກຕ້ອງ ເປັນທຳ ຂອງລັດຖະບານລາວ ເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ.
ກອງປະຊຸມສະຫຼຸບການຈັດຕັ້ງປະຕິບັດວຽກງານອະໄພຍະໂທດ ປະຈຳປີ 2015 ແລະ ແຜນການຈັດຕັ້ງປະຕິບັດວຽກງານອະໄພຍະໂທດປີ 2016 ຈັດຂຶ້ນວັນທີ 18 ກຸມພາ 2016 ທີ່ອົງການໄອຍະການປະຊາຊົນສູງສຸດ ໂດຍເປັນປະທານຂອງທ່ານ ຄຳສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ປະທານຄະນະກຳມະການອະໄພຍະໂທດລະດັບຊາດ ມີບັນດາຄະນະກຳມະການທີ່ມາຈາກຫ້ອງວ່າການປະທານປະເທດ ຫ້ອງວ່າການລັດຖະບານ ແລະ ບັນດາຄະນະກຳມະການ ທີ່ມາຈາກກະຊວງກ່ຽວຂ້ອງເຂົ້າຮ່ວມ ເພື່ອພ້ອມກັນຄົ້ນຄວ້າ ແລະ ກຳນົດແຜນການຈັດຕັ້ງປະຕິບັດວຽກງານອະໄພຍະໂທດ ພ້ອມທັງສືບຕໍ່ຊີ້ນຳຄະນະກຳມະການອະໄພຍະໂທດຂັ້ນຕ່າງໆ ຈັດຕັ້ງປະຕິບັດວຽກງານອະໄພຍະໂທດໃຫ້ສຳເລັດຜົນ ຕາມແຜນການທີ່ໄດ້ວາງໄວ້.
ແຫລ່ງຂ່າວ:
