ວັນທີ 19 ກຸມພາຜ່ານມາທີ່ໂຮງແຮມລາວພລາຊາ ນະຄອນຫຼວງວຽງຈັນ ໄດ້ມີກອງປະຊຸມວິຊາການພາຍໃຕ້ ຫົວຂໍ້ “ກາລະໂອກາດ ແລະສິ່ງທ້າທາຍສຳລັບການຂະຫຍາຍຕົວຂອງວິສາຫະກິດຂະໜາດນ້ອຍ ແລະກາງໃນປະຊາຄົມເສດຖະກິດອາຊຽນ” ໂດຍເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ລັດຖະມົນຕີຊ່ວຍວ່າການກະຊວງການເງິນ, ທ່ານ ດຣ. ນາງ ພິລານີ ພິດສະໄໝ ປະທານສະພາວິຊາຊີບນັກບັນຊີ ແລະນັກກວດສອບລາວ, ມີບັນດາພາກສ່ວນຕ່າງທັງພາກລັດ, ພາກທຸລະກິດ ແລະອົງການຈັດອື່ນໆເຂົ້າຮ່ວມ.
ທ່ານ ດຣ. ນາງ ພິລານີ ພິດສະໄໝ ກ່າວວ່າ: ເຖິງວ່າ ວິສາຫະກິດຂະໜາດນ້ອຍ ແລະກາງ ປະກອບສ່ວນຕໍ່ຜະລິດຕະພັນລວມພາຍໃນ (ຈີດີພີ) ຂອງໂລກພຽງແຕ່ 30% ກໍຕາມ ແຕ່ຖືວ່າມີຄວາມສຳຄັນຫຼາຍທີ່ສຸດເປັນຕົ້ນແມ່ນທາງດ້ານຈຳນວນເພາະກວມເອົາປະມານ 90% ຂອງຫົວໜ່ວຍທຸລະກິດທັງໝົດໃນເກືອບທຸກໆປະເທດທົ່ວໂລກ ແລະຍັງປະກອບສ່ວນໃນຊີວິດປະຈຳວັນຂອງປະຊາຊົນເນື່ອງຈາກການສ້າງວຽກເຮັດງານທຳໃຫ້ປະຊາຊົນໃນໂລກຫຼາຍກວ່າ 50% ແລະປະມານ 85% ໃນບັນດາປະເທດອາຊຽນ.
ສະນັ້ນ ວິສາຫະກິດຂະໜາດນ້ອຍ ແລະກາງ (ວນກ) ຈິ່ງຖືວ່າເປັນກະດູກສັນຫຼັງຂອງບັນດາປະເທດກຳລັງພັດທະນາເປັນສ່ວນໃຫຍ່ ແລະການພັດທະນາ ວນກ ສຳລັບແຕ່ລະປະເທດແລ້ວໄດ້ເປັນພື້ນຖານສຳຄັນ ເພື່ອໃຫ້ບັນລຸການຂະຫຍາຍຕົວດ້ານເສດຖະກິດໄລຍະຍາວແບບຍືນຍົງ ແຕ່ຫຼາຍກວ່າເຄິ່ງໜຶ່ງຂອງ ວນກ ບໍ່ສາມາດເຂົ້າເຖິງແຫຼ່ງທຶນ ຊຶ່ງເປັນສິ່ງກີດກັ້ນບໍ່ໃຫ້ເຂົາເຈົ້າສາມາດຂະຫຍາຍຕົວໄດ້.
ທີ່ມາ: ນສພ ເສດຖະິກດ-ສັງຄົມ
