ວັນທີ 24 ເມສາ 2014 ຫ້ອງການຄະນະກຳມະການແຫ່ງຊາດ ເພື່ອກວດກາ ແລະ ຄວບຄຸມຢາເສບຕິດ ນະຄອນຫຼວງວຽງຈັນ ໄດ້ຈັດເຝິກອົບຮົມການໃຫ້ຄຳປຶກສາ ກ່ຽວກັບຜູ້ຕິດຢາເສບຕິດ ໃຫ້ແກ່ອຳນາດການປົກຄອງ 48 ບ້ານ 20 ໂຮງຮຽນ ແລະ 7 ຫ້ອງການອ້ອມຂ້າງ ເມືອງໄຊເຊດຖາ ນະຄອນຫຼວງວຽງຈັນ ເພື່ອເປັນການກະກຽມຈະປະກາດໃຫ້ເມືອງໄຊເຊດຖາ ເປັນເມືອງປອດຢາເສບຕິດ ໃນປີ 2015 ໂດຍມີຜູ້ຕາງໜ້າ ແລະ ວິທະຍາກອນມາຈາກ ກຄສ ນະຄອນຫຼວງວຽງຈັນ ແລະ ກຄສ ແຫ່ງຊາດ ຕະຫຼອດຮອດພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນປີງ ປັນຍາຈິດ ຮອງເຈົ້າເມືອງ ປະທານ ກຄສ ຂັ້ນເມືອງ ກ່າວໃນພິທີເປີດກອງປະຊຸມວ່າ: ຢາເສບຕິດເປັນໄພຄຸກຄາມ ແລະ ທ່ວງດຶງການພັດທະນາເສດຖະກິດຂອງປະເທດຊາດ ໃນການຈັດຕັ້ງປະຕິບັດຢູ່ຂັ້ນເມືອງ ກໍ່ໄດ້ມີການແຕ່ງຕັ້ງຄະນະກຳມະການຂັ້ນເມືອງ ໄດ້ມີການເຄື່ອນໄຫວຕາມພາລະບົດບາດຢ່າງຕັ້ງໜ້າ ຜ່ານການຈັດຕັ້ງປະຕິບັດ ສາມາດເກັບກຳໄດ້ຈຳນວນຜູ້ທີ່ຕິດຢາເສບຕິດປະເພດ I ມີ 712 ຄົນ ຈຳນວນຜູ້ເສບແທ້ 298 ຄົນ ຍິງ 34 ຄົນ ກຸ່ມສ່ຽງຢາເສບຕິດ ຈຳນວນ 323 ຄົນ ຍິງ 44 ຄົນ ໃນນັ້ນ ນຳໄປສຶກສາອົບຮົມຈຳນວນ 417 ຄົນ ຍິງ 13 ຄົນ ສົ່ງບຳບັດຢູ່ສູນສົມສະຫງ່າ 150 ຄົນ ຍິງ 9 ຄົນ
ການຈັດເຝິກອົບຮົມຄັ້ງນີ້ ກໍ່ເພື່ອເສີມສ້າງທັກສະໃຫ້ຄວາມຮູ້ ຄວາມສາມາດໃຫ້ແກ່ອຳນາດການປົກຄອງບ້ານ ໂຮງຮຽນມັດທະຍົມທີ່ຢູ່ອ້ອມຂ້າງເມືອງໄຊເຊດຖາ ເພື່ອໃຫ້ຄຳປຶກສາກວດກາ ກັ່ນຕອງຜູ້ທີ່ຕິດຢາເສບຕິດ ໃນການຊຸກຍູ້ຊ່ວຍເຫຼືອທັນທີ ແລະ ເພື່ອແນໃສ່ເຮັດໃຫ້ເມືອງໄຊເຊດຖາ ປອດຢາເສບຕິດ ໃນປີ 2015.
ພາຍຫຼັງຄະນະກຳມະການ ສຳເລັດການເຝິກອົບຮົມພາຍໃນ 9 ຕົວເມືອງ ໃນນະຄອນຫຼວງວຽງຈັນ ກໍ່ຈະມີການປະເມີນຜົນ ໃນການຈັດຕັ້ງປະຕິບັດ ວ່າໄດ້ປະສິດທິພາບໜ້ອຍຫຼາຍພຽງໃດ.
ທີ່ມາ http://www.vientianemai.net/teen/khao/1/11637