ສຳນັກຂ່າວຕ່າງປະເທດ ລາຍງານໃນວັນທີ 17 ກຸມພານີ້ວ່າ ໃນຕອນ​ຄ່ຳຂອງ​ວັນ​ທີ 16 ກຸມພາຜ່ານມານີ້ ຢູ່​ທີ່ສູນຈັກກະວານ Plessetsk ຂອງຣັດ​ເຊຍ ໄດ້ມີພິທີສົ່ງດາວ​ທຽມ​ສັງ​ເກດ​ມະຫາ​ສະໝູ​ດ ດວງທຳ​ອິດ​ຂອງ​ສະຫະພາບ​ເອີ​ຣົບ (EU) ທີ່ມີຊື່ວ່າ “Sentinel 3A” ​ຂຶ້ນ​ສູ່ອາ​ວະ​ກາດ ໂດຍດາວ​ທຽມດວງດັ່ງກ່າວ ມີນ້ຳໜັກ 1,200 ກິໂລກຣາມ ​ຜະລິດໂດຍ​ກຸ່ມ​ບໍລິສັດ Thales Alenia Space ຂອງແບນ​ຊິກ ຊຶ່ງດາວທຽມດວງນີ້ ຈະເຮັດໃຫ້ສະຫະພາບເອີຣົບ ສາມາດສັງ​ເກດ​ບັນດາ​ບັນຫາ​ ກ່ຽວ​ກັບມະຫາສະ​ໝູ​ດທັງວັນ ​ແລະ ຄືນ ​ ​ຜ່ານ​ການວັດ​​ແທກຄວາມ​ສູງ​ຂອງຄື້ນຄວາມ​ຮ້ອນ ​ແລະ ຄວາມ​ໄວ​ຂອງ​ລົມ.

ທັງນີ້ ເນື່ອງຈາກການ​ເຄື່ອນ​ໄຫວ​ສັງ​ເກດມະຫາ​ສະ​ໝູ​ດ ມີ​ບົດບາດ​ສຳຄັນ ຊ່ວຍ​ໃຫ້ເຂົ້າ​ໃຈ​ແຈ້ງ​ກ່ຽວ​ກັບ​ສະພາບ​ປ່ຽນ​ແປງ​ຂອງ​ດິນ​ຟ້າ​ອາກາດ ຊຶ່ງເປັນການຜັນຂະຫຍາຍຂໍ້ຕົກລົງ ທີ່ບັນລຸ​ຢູ່​ກອງ​ປະຊຸມ​ຄັ້ງ​ທີ 21 ຂອງ​ສະຫະ​ປະຊາ​ຊາດ​ກ່ຽວ​ກັບ​ການ​ປ່ຽນ​ແປງ​ຂອງ​ດິນ​ຟ້າ​ອາກາດ (COP 21) ຢູ່​ນະຄອນຫລວງປາຣີ ປະເທດຝະລັ່ງ ​​ເມື່ອ​ເດືອນທັນວາ ປີ​2015 ຜ່ານມາ. ນອກນັ້ນ, ດາວທຽມດວງນີ້ ຍັງ​ຈະປະກອບສ່ວນ ​ເຂົ້າ​​​ໃນ​ການພັດທະນາ​ ບັນດາ​ການ​ບໍລິການດ້ານ​ການ​ຄ້າອີກ​ດ້ວຍ.