ສຳນັກຂ່າວຕ່າງປະເທດ ລາຍງານໃນວັນທີ 15 ກຸມພາຜ່ານມານີ້ວ່າ ເມື່ອວັນທີ 14 ກຸມພາ 2016 ທ່ານ ວະລາດິເມຍ ປູຕິນ ປະທານາທິບໍດີຣັດເຊຍ ໄດ້ໂອ້ລົມທາງໂທລະສັບກັບຄູ່ຮ່ວມຕຳແໜ່ງ ສະຫະລັດອາເມຣິກາ ທ່ານ ບາຣັກ ໂອບາມາ ເພື່ອປຶກສາຫາລືກ່ຽວກັບບັນຫາຊີຣີ ໂດຍຜູ້ນຳທັງ 2 ປະເທດ ໄດ້ຕີລາຄາຢ່າງຕັ້ງໜ້າ ກ່ຽວກັບຜົນທີ່ບັນລຸໄດ້ໃນການເຈລະຈາ ຢູ່ນະຄອນມິວນິກ ປະເທດເຢຍລະມັນ ໃນອາທິດກ່ອນ ຊຶ່ງທ່ານປະທານາທິບໍດີ ປູຕິນ ໄດ້ຢືນຢັນຄືນໃໝ່ວ່າ ການສ້າງສຳພັນທະມິດ ທີ່ເປັນເອກະພາບກັນ ເພື່ອຕ້ານການກໍ່ການຮ້າຍຢູ່ຊີຣີ ແມ່ນສິ່ງທີ່ຈຳເປັນທີ່ສຸດ ໃນປັດຈຸບັນ.
ພ້ອມກັນນີ້, ທັງ 2 ທ່ານ ໄດ້ເຫັນດີເປັນເອກະພາບ ດຳເນີນການເຄື່ອນໄຫວຮ່ວມມື ຜ່ານບັນດາອົງການອື່ນໆ ທາງການທູດ ແລະ ອົງການເພື່ອປະຕິບັດຂໍ້ຕົກລົງຢຸດຍິງຊົ່ວຄາວ ທີ່ບັນລຸໄດ້ຢູ່ນະຄອນມິວນິກ ຄັ້ງວັນທີ 11 ກຸມພາຜ່ານມາ ໂດຍຣັດເຊຍ ຄັດຄ້ານທຸກການກະທຳ ເພື່ອແຊກແຊງການທະຫານທາງບົກຢູ່ຊີຣີ ໃນສະພາບການທີ່ຕວກກີ ພວມຜັນຂະຫຍາຍການບຸກໂຈມຕີທາງບົກ ພ້ອມກັບກຳລັງທະຫານຂອງອາຣັບບີ ຊາອຸດິດ ທີ່ໄດ້ເປີດສາກຍິງທຳລາຍ ບັນດາສະຖານທີ່ສຳຄັນຂອງລັດຖະບານຊີຣີ ແລະ ຊາວເຄີດ.