ສຳນັກຂ່າວຕ່າງປະເທດ ລາຍງານໃນວັນທີ 16 ກຸມພານີ້ວ່າ ສຳນັກງານຄວາມປອດໄພຂອງຜູ້ບໍລິໂພກຣັດເຊຍ ໄດ້ອອກມາຖະແຫລງລະບຸ ໄດ້ກວດພົບຜູ້ຕິດເຊື້ອໄວຣັສຊິກ້າ ຄົນທຳອິດຂອງປະເທດ ໂດຍເປັນຜູ້ຍິງທີ່ຕິດເຊື້ອ ພາຍຫລັງທີ່ເດີນທາງກັບ ຈາກການໄປທ່ອງທ່ຽວຢູ່ສາທາລະນະລັດໂດມິນິກັນ, ແນວໃດກໍຕາມ ອາການຂອງຜູ້ຕິດເຊື້ອລາຍນີ້ ແມ່ນຢູ່ໃນສະພາວະທີ່ບໍ່ທັນຮຸນແຮງ ແລະ ຜົນການກວດບັນດາບຸກຄົນ ພາຍໃນຄອບຄົວຂອງຜູ້ກ່ຽວ ກໍບໍ່ພົບມີໃຜຕິດເຊື້ອດັ່ງກ່າວແຕ່ຢ່າງໃດ.
ດ້ານທາງການຈີນ ຫລັງຈາກທີ່ໄດ້ອອກມາຢືນຢັນວ່າ ມີຜູ້ຕິດເຊື້ອໄວຣັສຊິກ້າ ຄົນທຳອິດໃນປະເທດ ເມື່ອວັນທີ 9 ກຸມພາ 2016 ຜ່ານມາ ກໍໄດ້ອອກມາລະບຸວ່າ ພົບຜູ້ຕິດເຊື້ອອີກແລ້ວເປັນລາຍທີ 2 ຊຶ່ງເປັນການຕິດເຊື້ອ ພາຍຫລັງເດີນທາງກັບຄືນຈາກຕ່າງປະເທດເຊັ່ນດຽວກັນ.