ໃນວັນທີ 5 ກຸມພາ 2016 ຜ່ານມາ ອະດີດນັກສຶກສາໂຮງຮຽນຊົນລະປະທານ ຮຸ້ນ 13 ຊັ້ນກາງ ຫລື ຄະນະຊັບພະຍາກອນນ້ຳ ມະຫາວິທະຍາໄລແຫ່ງຊາດ ໃນປັດຈຸບັນ ໄດ້ຈັດກິດຈະກຳພົບປະອະດີດນັກສຶກສາຂຶ້ນ ໂດຍພາຍໃນງານ ມີອະດີດນັກສຶກສາຮຸ້ນດັ່ງກ່າວທັງໝົດ 16 ສະຫາຍ ພ້ອມດ້ວຍພະນັກງານ ແລະ ຄູອາຈານ ພາຍໃນຄະນະຊັບພະຍາກອນນ້ຳເຂົ້າຮ່ວມ.
ກິດຈະກຳພົບປະອະດີດນັກສຶກສາຄັ້ງນີ້ ປະກອບມີການຮ່ວມຫລິ້ນກິລາບານເຕະ ແລະ ເປຕັງ ລະຫວ່າງອະດີດນັກສຶກສາ ແລະ ຄູອາຈານ ເພື່ອຮັດແໜ້ນຄວາມສາມັກຄີຊຶ່ງກັນ ແລະ ກັນ. ພ້ອມກັນນັ້ນ, ອະດີດນັກສຶກສາຮຸ້ນດັ່ງກ່າວ ຍັງໄດ້ມອບເຄື່ອງກິລາບານເຕະ ແລະ ເປຕັງ ລວມມູນຄ່າ 4,800,000 ກີບ ໃຫ້ແກ່ ຄະນະຊັບພະຍາກອນນ້ຳ ເພື່ອສະແດງຄວາມຮູ້ບຸນຄຸນຕໍ່ຄູອາຈານ ກໍຄືສະຖາບັນການສຶກສາດັ່ງກ່າວອີກດ້ວຍ.
ຕອນທ້າຍພິທີ ທ່ານ ຮສ ອວນມາ ທຳມະວົງ ວ່າການຄະນະບໍດີ ຄະນະຊັບພະຍາກອນນ້ຳ ໄດ້ມີການມອບໃບກຽດຕິຄຸນ ໃຫ້ແກ່ອະດີດສິດເກົ່າໂຮງຮຽນຊົນລະປະທານ ຮຸ້ນ 13 ຊັ້ນກາງ ທີ່ໄດ້ນຳເຄື່ອງຊ່ວຍເຫລືອມາມອບໃຫ້ໃນຄັ້ງນີ້ ຊຶ່ງທາງຄະນະວິຊາ ຈະໄດ້ນຳໃຊ້ເຂົ້າໃນການເຄື່ອນໄຫວ ກິດຈະກຳກິລາກາຍະກຳ ຕາມຫລັກມູນພາລະສຶກສາ ທີ່ກະຊວງສຶກສາທິການ ແລະ ກິລາ ວາງອອກ.
