ໃນວັນທີ 9 ມັງກອນທີ່ຜ່ານມາ ພະແນກຕຳຫຼວດເສດຖະກິດ ປກສ ແຂວງຫຼວງນ້ຳທາ ສາມາດມ້າງຄະດີຊື້ຂາຍເງິນໂດລາປອມ ຈຳນວນ 844.200 ໂດລາ ໄດ້ຢູ່ເຂດບ້ານທົ່ງໄຈ້ເໜືອ ເມືອງ ແລະ ແຂວງຫຼວງນ້ຳທາ ແລະ ກັກຕົວຜູ້ຖືກຫາທັງໝົດ 10 ຄົນ ຍິງ 4 ຄົນ ພ້ອມທັງຢຶດເງິນໂດລາປອມຈຳນວນດັ່ງກ່າວ ລົດຮຸນໄດ 1 ຄັນ ແລະ ລົດຈັກ 1 ຄັນ ມາດຳເນີນການສອບສວນ.
ຜູ້ຖືກຫາທັງ 10 ຄົນ ຊື່ທ້າວ ທອງເດືອນ ຫຼື ແສງເດືອນ ອາຍຸ 56 ປີ ຢູ່ບ້ານປາກຂະຍຸງ ເມືອງວຽງຄຳ ແຂວງວຽງຈັນ ທ້າວ ເກັດສະໜາ ອາຍຸ 45 ປີ ຢູ່ບ້ານເຊໃຫຍ່ ເມືອງສາມັກຄີໄຊ ແຂວງອັດຕະປື ທ້າວ ສົມຫວັງ ອາຍຸ 49 ປີຢູ່ບ້ານບໍ່ ເມືອງໄຊ ແຂວງອຸດົມໄຊ ນາງ ແສງ ອາຍຸ 48 ປີ ແລະ ທ້າວ ໄໝ່ຂັນ ອາຍຸ 44 ປີ ທັງສອງຢູ່ບ້ານຊຽງບືນ ເມືອງສິງ ແຂວງຫຼວງນ້ຳທາ ນາງ ວົງ ອາຍຸ 35 ປີຢູ່ບ້ານແສງສະຫວ່າງ ເມືອງໂພນໂຮງ ແຂວງວຽງຈັນ ນາງ ໄຫວ ອາຍຸ 24 ປີ ຢູ່ບ້ານບໍ່ ເມືອງໄຊ ແຂວງອຸດົມໄຊ ທ້າວ ປ້ານ ອາຍຸ 48 ປີ ຢູ່ບ້ານທົ່ງໄຈ້ເໜືອ ເມືອງ ແລະ ແຂວງຫຼວງນ້ຳທາ ທ້າວ ຄຳຜຸງ ອາຍຸ 57 ປີ ຢູ່ບ້ານຊຽງນ້ຳກໍ ເມືອງໄຊ ແຂວງອຸດົມໄຊ ແລະ ນາງ ລົມ ເລີດວິໄລ ອາຍຸ 53 ປີ ຢູ່ບ້ານແສງສະຫວ່າງ ເມືອງໄຊເຊດຖາ ນະຄອນຫຼວງວຽງຈັນ.
ຜ່ານການສືບສວນ-ສອບສວນຂອງເຈົ້າໜ້າທີ່ ທ້າວ ທອງເດືອນ ໃຫ້ການວ່າ: ພວກຕົນໄດ້ຮ່ວມກັນຊື້-ຂາຍເງິນໂດລາປອມມາແຕ່ທ້າຍປີ 2015 ໂດຍຕິດຕໍ່ພົວພັນໃຫ້ນາງ ແສງອ່ອນ ຢູ່ບ້ານຫຼົງຢືນ ເມືອງຫຼ້າ ສປ ຈີນ ເປັນຜູ້ເອົາມາສົ່ງໃຫ້ ຈາກນັ້ນ ກໍ່ໄດ້ນັດໝາຍຊື້-ຂາຍຢູ່ເຮືອນພັກ ເຂດບ້ານທົ່ງໄຈ້ເໜືອ ແລະ ຖືກເຈົ້າໜ້າທີ່ຈັບຕົວມາດຳເນີນຄະດີ.
ແຫລ່ງຂ່າວ:
