ຂປລ.ການແຂ່ງຂັນກິລາທົ່ວແຂວງຫຼວງພະບາງ ປະຈຳປີ 2016 ໄດ້ເປີດສາກຂຶ້ນຢ່າງເປັນທາງການ ໃນຕອນບ່າຍຂອງວັນທີ 8 ກຸມພານີ້ ທີ່ເດີ່ນກິລາຂອງແຂວງ ຕັ້ງຢູ່ບ້ານນາຫຼວງ ໂດຍມີ ດຣ ຄຳໝັ້ນ ຈັນທະລັງສີ ຮອງເຈົ້າແຂວງຫຼວງພະບາງ ພ້ອມດ້ວຍຄະນະພະແນກສຶກສາທິການ ແລະ ກິລາແຂວງ, ແຂກຖືກເຊີນ, ຕະຫຼອດຮອດຄູ-ອາຈານ, ນັກຮຽນ ແລະ ນັກກິລາ ແຕ່ລະພາກສ່ວນເຂົ້າຮ່ວມ ຢ່າງຫລວງຫລາຍ.
ພິທີເລີ່ມຕົ້ນດ້ວຍ ຂະບວນຂອງກ້ອນກຳລັງແຕ່ລະພາກສ່ວນ ເດີນເຂົ້າສູ່ສະໜາມ; ຈາກນັ້ນ ທ່ານ ເອີງ ລໍສະຫັວນ ຫົວໜ້າພະແນກສຶກສາທິການ ແລະ ກິລາແຂວງ ໄດ້ຂຶ້ນລາຍງານການກະກຽມການ ແຂ່ງຂັນວ່າ: ການແຂ່ງຂັນໃນປີນີ້ແມ່ນຈັດເປັນ 2 ຮຸ່ນຄື: ຮຸ່ນນັກຮຽນມັດທະຍົມສຶກສາ ແລະ ຮຸ່ນຊາວໜຸ່ມທົ່ວໄປ. ສໍາລັບຮຸ່ນນັກຮຽນມັດທະຍົມສຶກສານັ້ນ ຈະແຂ່ງຂັນທັງເພດຍິງ ແລະ ຊາຍໃນ 7 ປະເພດ ກິລາເຊັ່ນ: ບານເຕະ, ບານສົ່ງ, ບານບ້ວງ, ກະຕໍ້, ແລ່ນ-ລານ, ປິ່ງປ່ອງ ແລະ ເປຕັງ. ສ່ວນຮຸ່ນທົ່ວໄປຈະແຂ່ງຂັນໃນ 4 ປະເພດກິລາເຊັ່ນ: ບານເຕະຊາຍ, ບານສົ່ງຊາຍ, ບານບ້ວງຊາຍ ແລະ ແລ່ນ-ລານ ຍີງ-ຊາຍ. ການແຂ່ງຂັນໃນຄັ້ງນີ້ ແມ່ນແນໃສ່ເຮັດໃຫ້ ບັນດາໂຮງຮຽນມັດທະຍົມ ອ້ອມຂ້າງເທສະບານແຂວງ ປະຕິບັດໃຫ້ໄດ້ຕາມ 5 ຫຼັກມູນຂອງ ການສຶກສາ, ທັງຮັບປະກັນໃຫ້ວຽກງານກິລາຂອງແຂວງ ມີການພັດທະນາດີຂຶ້ນຕົ້ນຕໍແມ່ນ ເພື່ອຄັດເລືອກນັກກິລາ ທີ່ຈະເປັນຕົວແທນຂອງແຂວງຫຼວງພະບາງ ເຂົ້າຮ່ວມແຂ່ງຂັນໃນມະຫະກຳກິລາ ນັກຮຽນມັດທະຍົມສຶກສາທົ່ວ ປະເທດທີ່ແຂວງບໍລິຄຳໄຊ ແລະ ມະຫະກຳກິລາແຫ່ງຊາດທີ່ແຂວງຊຽງຂວາງ ໃນປີ 2017. ໂອກາດນີ້ ດຣ ຄຳໝັ້ນ ຈັນທະລັງສີ ໄດ້ຂຶ້ນມີຄຳເຫັນກ່າວເປີດການແຂ່ງ ຂັນຢ່າງເປັນທາງການ ໂດຍທ່ານໄດ້ເນັ້ນໜັກໃຫ້ບັນດາກຳມະການຕັດສິນ ຈົ່ງພ້ອມກັນຕັດສິນດ້ວຍຄວາມທ່ຽງທຳ, ສ່ວນນັກກິລາແຕ່ລະຄົນຕ້ອງພ້ອມກັນຫລິ້ນດ້ວຍນ້ຳໃຈ ນັກກິລາ ຮູ້ເສຍ ຮູ້ຊະນະ ແລະ ຮູ້ໃຫ້ອະໄພເຊິ່ງກັນ ແລະ ກັນ; ຮຽກຮ້ອງມາຍັງປະຊາຊົນຊາວຫຼວງພະບາງ ຈົ່ງພ້ອມກັນໃຫ້ກຳລັງໃຈ ແລະ ຊ່ວຍຊົມ ຊ່ວຍເຊຍນັກກິລາ ແຕ່ລະປະເພດ ເພື່ອເຮັດໃຫ້ການແຂ່ງຂັນກິລາຄັ້ງນີ້ ເຕັມໄປດ້ວຍບັນຍາກາດອັນຟົດຟື້ນມ່ວນຊື່ນ.
ພາຍຫຼັງພິທີເປີດສຳເລັດແລ້ວ ໄດ້ມີການສະແດງຂອງນັກຮຽນຊັ້ນມັດທະຍົມ ພາຍໃນເທສະບານແຂວງ ປະກອບມີການເຕັ້ນ 3 ຈັງຫວະ, ເຕັ້ນແອໂລບິກ ແລະ ໄດ້ມີການແຂ່ງຂັນກິລາບານເຕະຄູ່ເປີດ ສະໜາມຕື່ມອີກ ໂດຍແມ່ນທີມຂອງໂຮງຮຽນມັດທະຍົມຕອນຕົ້ນພັນຫຼວງ ພົບກັບ ໂຮງຮຽນມັດທະຍົມສົມບູນປ່ອງຄຳ.
ແຫລ່ງຂ່າວ:
