ເຈົ້າໜ້າທີ່ເມັກຊິໂກກວດຄົ້ນຄຸກທີ່ເກີດເຫດຈະລາຈົນເຮັດໃຫ້ມີນັກໂທດເສຍຊີວິດ 49 ຄົນເມື່ອບໍ່ເທົ່າໃດວັນຜ່ານມາ ພົບສິ່ງອຳນວຍຄວາມສະດວກຫຼາຍຢ່າງຢູ່ພາຍໃນ.
ເມື່ອອາທິດທີ່ຜ່ານມາ ເກີດເຫດຈະລາຈົນໃນຄຸກຈຳໂຕໂປຊິໂກທາງເໜືອຂອງເມືອງມອນເທີເຣໃນລັດມວຍໂບ ເລອອນ ໂດຍເລີ່ມຈາກຄວາມຂັດແຍ່ງຂອງສອງຫົວໜ້າແກ້ງຄ້າຢາບ້າ ເຊຕັສ ຄືທ້າວ ອີວານ ແອມັນເດຊ ກັນຕູ ຫຼື “ເອລເກຣໂດ” ແລະ ທ້າວ ຮວນ ເປໂດຣ ຊັລຕິບາ ຟາຣຽສ ຫຼື “ແຊດ-27” ຈົນລຸກລາມ ເຮັດໃຫ້ມີຜູ້ເສຍຊີວິດ 49 ຄົນ.
ດ້ານສຳນັກງານໄອຍະການລັດມວຍໂບ ເລອອນຂອງເມັກຊິໂກເຜີຍວ່າ ຂະນະທີ່ເຂົ້າໄປກວດຄົ້ນຄຸກດັ່ງກ່າວ ພົບຕຽງຂະໜາດໃຫຍ່, ໂທລະພາບຈໍໃຫຍ່ ແລະອ່າງອາບນໍ້າສຸດຫຼູໃນຫ້ອງຂັງຂອງທ້າວ ແອນັນເດຊ ທັງຍັງພົບແມ່ຍິງຢູ່ກັບເຂົາໃນໄລຍະເກີດເຫດ ນອກຈາກນີ້ ພາຍໃນຄຸກ ຍັງພົບ “ຫ້ອງຂັງຫຼູ” ທີ່ມີເຄື່ອງປັບອາກາດ ຕູ້ເຢັນນ້ອຍ, ໂທລະພາບດິຈິຕອລ, ຕູ້ປາ ແລະຕູ້ອົບຊາວນ່າ ຊຶ່ງເຈົ້າໜ້າທີ່ໄດ້ຢຶດໄວ້ທັງໝົດ.
ຂະນະທີ່ພີ່ນ້ອງຂອງນັກໂທດຫຼາຍຄົນ ບອກກົງກັນວ່າ ນັກໂທດຕ້ອງຈ່າຍເງິນແພງເພື່ອໃຫ້ໄດ້ນໍ້າ ແລະອາຫານທີ່ດີ ເນື່ອງຈາກອາຫານຂອງຄຸກຄຸນນະພາບຕໍ່າຫຼາຍ.
ຂະນະທີ່ເກີດເຫດຈະລາຈົນຄັ້ງຫຼ້າສຸດ ຄຸກໂຕໂປຊິໂກມີນັກໂທດລວມ 3.800 ຄົນ ເກີນກວ່າທີ່ຮອງຮັບໄດ້ 35% ແລະຍັງເປັນແຫຼ່ງລວມສະມາຊິກແກ້ຄ້າຢາຫຼາຍຄົນ ລວມເຖິງຜູ້ຕ້ອງຫາຄະດີອາຍາອື່ນໆທີ່ລໍຖ້າການໄຕ່ສວນ, ດ້ານເຈົ້າໜ້າທີ່ເມັກຊິໂກເຜີຍຫຼັງເກີດເຫດຮຸ່ນແຮງວ່າ ໄດ້ຍ້າຍນັກໂທດ 233 ຄົນ ຊຶ່ງລວມເຖິງຫົວໜ້າແກ້ງຄ້າຢາບ້າຕົວຕົ້ນເຫດສອງຄົນໄປຍັງຄຸກອື່ນແລ້ວ.