ເຈົ້າໜ້າທີ່ ປກສ ເມືອງນາຊາຍທອງໄດ້ຮັບແຈ້ງຄວາມຈາກຜູ້ເສຍຫາຍ ຊື່ທ້າວ ຕີ່ນ ອາຍຸ 55 ປີ ຄ້າຂາຍຢູ່ບ້ານແສນດີນເມືອງນາຊາຍທອງນະຄອນຫຼວງວຽງຈັນ ວ່າມີຄົນຮ້າຍມາງັດປ່ອງຢ້ຽມແລ້ວລັກເຂົ້າເຮືອນຂອງຕົນໃນຄ່ຳຄືນຂອງວັນທີ 6 ທັນວາ 2015 ຜ່ານມາ ຈິ່ງໄດ້ ເອົາໃຈໃສ່ຢ່າງໃກ້ຊິດຕິດແທດໃນການຕິດຕາມກວດກາບັນດາເປົ້າໝາຍພຽງ 2 ວັນຕໍ່ມາ ກໍສາມາດຈັບຕົວຜູ້ກະທຳຜິດໄດ້ 1 ຄົນ ເປັນຊາຍ ໄວ 33 ປີ ກຳມະກອນ ບ້ານນາທຽມ ເມືອງສັງທອງ ນະຄອນຫຼວງວຽງຈັນ.
ຜ່ານການສືບສວນ-ສອບສວນ ຂອງ ເຈົ້າໜ້າທີ່ໃນເບື້ອງຕົ້ນ ທ້າວ ທົມ ອາຍຸ 33 ປີ ກຳມະກອນ ບ້ານນາທຽມ ເມືອງ ສັງທອງ ນະຄອນຫຼວງວຽງຈັນໄດ້ຍອມ ຮັບວ່າ:ຜ່ານມາຕົນແມ່ນໄດ້ເຄື່ອນໄຫວລັກຊັບພົນລະເມືອງມາຫຼາຍຄັ້ງແລ້ວ, ແຕ່ຄັ້ງຫຼ້າສຸດມາ ໃນວັນທີ 6 ທັນວາ 2015 ຕົນໄດ້ຂໍຢືມຂີ່ລົດຈັກເວັບສີຟ້າ-ດຳບໍ່ມີປ້າຍທະບຽນ(ລົດຊື້ໃໝ່) ຂອງພີ່ນ້ອງ ໂດຍອ້າງວ່າຈະເອົາລົດຄັນດັ່ງກ່າວ ຂີ່ໄປເຮັດວຽກ; ຫຼັງຈາກນັ້ນຕົນຈິ່ງໄດ້ຂີ່ລົດອອກມາແຕ່ທາງທ່າງ່ອນ ມຸ່ງໜ້າມາຫາທາງແສນດີນ ພໍຂີ່ອອກມາຮອດ ແຖວເຮືອນຂອງ ທ້າວ ຕີ່ນ ຈິ່ງໄດ້ຈອດ ລົດຈັກປະໄວ້ແຄມປ່າໃກ້ກັບເຮືອນຂອງ ຜູ້ກ່ຽວ ຈາກນັ້ນຈິ່ງຍ່າງເຂົ້າໄປເບິ່ງທາງ ປ່ອງຢ້ຽມແລ້ວສັງເກດເບິ່ງເຫັນວ່າປ່ອງຢ້ຽມບໍ່ໄດ້ໃສ່ລ໋ອກຕົນຈິ່ງໄດ້ລົງມືງັດຕາໜ່າງກັນຂະໂມຍອອກທັນທີແລ້ວ ປີນເຂົ້າໄປໃນເຮືອນ ແລ້ວໄດ້ລົງມືຮື້ຄົ້ນ ຕາມຕູ້ເຄື່ອງ ພ້ອມກັບໄດ້ໂທລະສັບຍີ່ຫໍ້ Lenovo ສີດຳ 1 ໜ່ວຍ, ເງິນກີບ ຈຳນວນ 1,80 ແສນກີບ, ທະບຽນລົດວີໂກ 1 ໃບ, ປື້ມບັນຊີເງິນຝາກທະນາຄານການຄ້າ 1 ຫົວ, ບັດປະຈຳຕົວ 1 ໃບ, ໃບຂັບຂີ່ 1 ໃບ, ພະຫຼຽມ 1 ອົງ, ພະນາງກວັກ 1 ອົງ, ເສື້ອ,ໂສ້ງ ແລະເຄື່ອງອື່ນໆອີກຈຳ ນວນໜຶ່ງ. ແລ້ວຕົນເອງໄດ້ເອົາເຄື່ອງຈຳ ນວນດັ່ງກ່າວ ໃສ່ກະເປົາແລ້ວໄປຊຸກ ເຊື່ອງປະໄວ້ແຄມທາງຂ້າງຕະຫຼາດ ໜອງສະ ຈາກນັ້ນ ຈິ່ງເອົາໂທລະສັບ ແລະ ເງິນທີ່ລັກມາໄດ້ໄປໃຊ້ຈ່າຍກິນຈົນໝົດ.
ເຈົ້າໜ້າທີ່ເປີດເຜີຍໃຫ້ຮູ້ວ່າ: ພາຍຫຼັງ ທີ່ທ້າວ ທົມ ລົງມືລັກຊັບ ຕໍ່ມາອີກ 2 ວັນໄດ້ມີພົນລະເມືອງດີມາພົບເຫັນເຄື່ອງຕ້ອງສົງໄສຊຸກເຊື່ອງໄວ້ໃນປ່າ ຈິ່ງໄດ້ແຕ່ງ ຕັ້ງເຈົ້າໜ້າທີ່ກອງສືບສວນ-ສອບສວນ ຄະດີອາຍາ ກວດກາ ແລະເກັບກຳຂໍ້ມູນ ຫຼັກຖານ ພ້ອມທັງເກັບກຳເປົ້າໝາຍຈິ່ງ ສາມາດກັກຕົວຜູ້ຖືກຫາໄດ້ໃນວັນດຽວ ກັນມາດຳເນີນຄະດີຕາມກົດໝາຍ.
ທີ່ມາ: