ຫໍພິພິດທະພັນຫຼວງພຣະບາງ ຕັ້ງຢູ່ເຂດບ້ານຈູມຄ້ອງ ໃຈກາງເມືອງຫຼວງພຣະບາງ, ເຊິ່ງແຕ່ກ່ອນເປັນພະຣາຊຊະວັງເກົ່າຂອງອະດີດເຈົ້າຊີວິດອານາຈັກລາວລ້ານຊ້າງ, ປຸກສ້າງຂຶ້ນຕາມຮູບແບບສະຖາປັດຕະຍະກຳ ຂອງຊາວຝຣັ່ງໃນປີ 1904 ແລະ ຕໍ່ມາໄດ້ຮັບການຕໍ່ເຕີມຍອດຂອງຜາສາດໃຫ້ເປັນຮູບແບບລາວໃນປີ 1930.
ປັດຈຸບັນ ອົງການປົກຄອງແຂວງໄດ້ປັບປຸງບູລະນະໃຊ້ວັງດັ່ງກ່າວເປັນຫໍພິພິທະພັນຂອງແຂວງ, ໂດຍໃຊ້ເປັນສະຖານທີ່ສະແດງສິລະປະ ແລະ ພະພຸດທະສາດສະໜາ ແລະ ຍັງເປັນບ່ອນປະດິດສະຖານຂອງພະບາງອັນສິກສິດ ແລະ ເປັນມິ່ງເມືອງຂອງຫຼວງພະບາງ ເຊິ່ງປະດິດສະຖານຢູ່ອາຄານໃໝ່ດ້ານຫນ້າ.
ຢູ່ພາຍໃນບ່ອນວາງສະແດງ ສິ່ງຂອງຕ່າງໆ ແລະ ຊີວະປະຫວັດຂອງເຈົ້າຊີວິດ ແລະ ຄອບຄົວຂອງພະອົງ. ນັກທ່ອງທ່ຽວຕ້ອງໄດ້ແຕ່ງກາຍສຸພາບ (ສຳລັບແມ່ຍິງມີສິ້ນໃຫ້ເຊົ່າ) ແລະ ຫ້າມຖ່າຍຮູບ ຫຼື ວິດີໂອຢູ່ພາຍໃນພິພິທະພັນ. ເວລາເປີດ: ວັນພຸດ-ວັນຈັນ (ປິດວັນອັງຄານ), 8:00-16:00 ໂມງ.
ເວົ້າໄດ້ວ່າຖ້າໃຜມີໂອກາດໄປຫຼວງພະບາງກໍຢ່າລືມສະຖານທີ່ສຳຄັນແຫ່ງນີ້ ເຊິ່ງນອກຈາກທ່ານຈະໄດ້ໄຫວ້ພະບາງ, ໄດ້ເຫັນສິລະປະລວດລາຍແລ້ວ ທ່ານຍັງຈະໄດ້ເຫັນອະດີດ ໄດ້ວາດພາບເຫັນບັນຍາກາດສະໄໝຍັງເປັນອານາຈັກລາວລ້ານຊ້າງໄດ້ຢ່າງປະທັບໃຈເລີຍ.
ຮູບແລະບົດສ່ວນໜຶ່ງຈາກ: ທ່ຽວທົ່ວລາວ