ສຳນັກຂ່າວຕ່າງປະເທດ ລາຍງານໃນວັນທີ 11 ກຸມພາຜ່ານມານີ້ວ່າ ເຖິງແມ່ນພັກເພື່ອໄທ ຈະຖືກກີດກັ້ນຈາກກິດຈະກຳທາງການເມືອງ ພາຍໃຕ້ການປົກຄອງຂອງທະຫານ ທີ່ເຂົ້າຍຶດອຳນາດເມື່ອພຶດສະພາປີ 2014 ຜ່ານມາ ຈົນເຖິງປັດຈຸບັນ ແຕ່ອິດທິພົນຂອງຕະກູນຊິນນະວັດ ຍັງຄົງຈະໄດ້ຮັບຄວາມນິຍົມຊົມຊອບ ຈາກປະຊາຊົນໃນວົງການການເມືອງໄທໃນອານາຄົດ.

ດ້ານ ນາງ ຍິ່ງລັກ ຊິນນະວັດ ອະດີດນາຍົກລັດຖະມົນຕີໄທ ອາຍຸ 48 ປີ ໄດ້ໃຫ້ສຳພາດກັບສຳນັກຂ່າວຕ່າງປະເທດ ໃນວັນທີ 10 ກຸມພາຜ່ານມາວ່າ ພັກເພື່ອໄທ ຍັງຄົງຈະໄດ້ຮັບການສະໜັບສະໜູນຢ່າງກວ້າງຂວາງ ໂດຍການໃຫ້ຄວາມເຫັນດັ່ງກ່າວ ມີຂຶ້ນພາຍຫລັງທີ່ ທ່ານ ທັກສິນ ຊິນນະວັດ ອະດີດນາຍົກລັດຖະມົນຕີຂອງໄທ ຊຶ່ງເປັນອ້າຍຄີງຂອງ ນາງ ຍິ່ງລັກ ຫາກໍໄດ້ກ່າວຄຳອວຍພອນ ໃຫ້ແກ່ສະມາຊິກພັກເພື່ອໄທ ໃນໄລຍະປີໃໝ່ຊາວຈີນ ຜ່ານມານີ້ ເພື່ອໃຫ້ສະມາຊິກພັກ ກຽມພ້ອມສຳລັບການເລືອກຕັ້ງຄັ້ງໜ້າທີ່ຈະມີຂຶ້ນ ຊຶ່ງຄາດວ່າ ຈະມີການດຳເນີນການເລືອກຕັ້ງທົ່ວໄປ ໃນປີໜ້ານີ້.