ສຳນັກຂ່າວຕ່າງປະເທດ ລາຍງານໃນວັນທີ 11 ກຸມພາຜ່ານມານີ້ວ່າ ທ່ານ ແອັດຕັນ ຄາເຕີ້ ລັດຖະມົນຕີວ່າການ ກະຊວງປ້ອງກັນປະເທດ ສະຫະລັດອາເມຣິກາ ໄດ້ກ່າວພາຍຫລັງເຂົ້າຮ່ວມກອງປະຊຸມ ລັດຖະມົນຕີປ້ອງກັນປະເທດນາໂຕ້ ທີ່ສຳນັກງານໃຫຍ່ ອົງການປ້ອງກັນແອັດແລນຕິກເໜືອ ຫລື ນາໂຕ້ (NATO) ທີ່ນະຄອນຫລວງບຣຸກແຊນ ປະເທດແບນຊິກ ວ່າ ອົງການນາໂຕ້ ມີຄວາມຍິນດີຈະສະໜັບສະໜູນ ປະເທດເຢຍລະມັນ, ເກຣັກ ແລະ ຕວກກີ ໃນພາລະກິດຊ່ວຍຕິດຕາມກວດກາທາງທະເລ ເພື່ອສະກັດກັ້ນກຸ່ມລັກລອບຂົນຜູ້ອົບພະຍົບ ບໍລິເວນຊາຍຝັ່ງທະເລີອີຈຽນຂອງຕວກກີ ຕາມຄຳຮຽກຮ້ອງຂອງທັງສາມປະເທດດັ່ງກ່າວ.

ເນື່ອງຈາກຕວກກີ ຊຶ່ງເປັນປະເທດມຸດສະລິມປະເທດດຽວ ໃນສະມາຊິກກຸ່ມນາໂຕ້ ໄດ້ກາຍເປັນທາງຜ່ານຫລັກ ຂອງຜູ້ອົບພະຍົບເຂົ້າສູ່ເອີຣົບ ຫລາຍກ່ວາ 1 ລ້ານຄົນໃນປີ 2015 ຜ່ານມາ ແລະ ພາຍຫລັງຜູ້ອົບພະຍົບ ເດີນທາງໄປເຖິງປະເທດເກຣັກ ສ່ວນໃຫຍ່ກໍຈະເດີນທາງໄປສູ່ເຢຍລະມັນ ຊຶ່ງເປັນປະເທດທີ່ຮັ່ງມີ ພາຍໃນສະຫະພາບເອີຣົບ ເຮັດໃຫ້ເອີຣົບ ຕ້ອງແບກຮັບວິກິດການຜູ້ອົບພະຍົບ ຄັ້ງຮ້າຍແຮງທີ່ສຸດ ນັບຕັ້ງແຕ່ຍຸກສົງຄາມໂລກຄັ້ງທີ 2 ເປັນຕົ້ນມາ.

ທັງນີ້ ຈາກຂໍ້ມູນຂອງອົງການສາກົນເພື່ອການຍົກຍ້າຍຖິ່ນຖານ ລະບຸວ່າ ມີຜູ້ອົບພະຍົບຫລາຍກ່ວາ 70,000 ກ່ວາຄົນ ໄດ້ເດີນທາງຂ້າມທະເລທີ່ອັນຕະລາຍ ເຂົ້າໄປສູ່ເອີຣົບໃນເດືອນມັງກອນ 2016 ຜ່ານມານີ້ ໂດຍໃນນັ້ນ ແມ່ນມີຜູ້ເສຍຊີວິດລະຫວ່າງເດີນເຮືອ ຫລາຍກ່ວາ 400 ຄົນ.