ວັນທີ 12 ມັງກອນຜ່ານມານີ້ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ໂພນໂຮງ ແຂວງວຽງຈັນໄດ້ລົງເລີກຮື້ເປົ້າໝາຍຊື້-ຂາຍຢາເສບຕິດຢູ່ຂອບ ເຂດບ້ານເຕົາຖ່ານສາ ມາດຈັບຕົວເປົ້າໝາຍທີ່ເຄື່ອນໄຫວຊື້-ຂາຍ ຢາເສບຕິດປະເພດຢາບ້າໄດ້ 2 ຄົນຄື: ທ້າວ ວຽງ ອາຍຸ 37 ປີ ກຳ ມະກອນຢູ່ບ້ານເຕົາຖ່ານ ແລະທ້າວ ສຸລິຍົງ ອາຍຸ 33 ປີ ວ່າງງານຢູ່ບ້ານນາດີ ເມືອງນາຊາຍທອງ ນະຄອນຫຼວງວຽງຈັນ ໂດຍເປັນຂອງກາງຢາບ້າ 69 ເມັດ.
ຜ່ານການສືບສວນ-ສອບສວນຂອງເຈົ້າໜ້າທີ່ພວກກ່ຽວທັງສອງໄດ້ຮັບສາລະພາບວ່າ: ໄດ້ເຄື່ອນຊື້-ຂາຍຢາເສບ ຕິດປະເພດຢາບ້າຮ່ວມກັນມາແຕ່ປີ 2015 ຊຶ່ງທ້າວ ວຽງ ໄດ້ຮັບຊື້ຢາບ້ານຳທ້າວ ສຸລິຍົງ ຢູ່ບ້ານນາດີ ເມືອງນາຊາຍທອງ ຈຳນວນຫຼາຍຄັ້ງມາແລ້ວ ແຕ່ຄັ້ງສຸດທ້າຍນີ້ວັນທີ 11 ມັງກອນ 2016 ເວລາ 20 ໂມງ ໄດ້ໂທລະສັບສັ່ງຊື້ຢາບ້ານຳ ທ້າວ ສຸລິຍົງ ຢູ່ບ້ານນາດີ ຈຳນວນ 30 ເມັດ ມູນຄ່າ 3,40 ແສນກີບ ຈຸດສົ່ງແມ່ນຢູ່ເຂບເຂດເສັ້ນທາງເລກທີ 13 ເໜືອ ເມື່ອໄດ້ຢາບ້າມາແລ້ວຜູ້ກ່ຽວກໍເອົາມາເສບ ຈຳນວນ 1 ເມັດ ແລະຂາຍໃຫ້, ໄວໜຸ່ມຢູ່ພາຍໃນບ້ານ, ບ້ານໃກ້ຄຽງ ຈຳນວນ 20 ເມັດ ໃນລາຄາ 20 ພັນກີບຕໍ່ເມັດ ຍັງເຫຼືອ 9 ເມັດ ກຳລັງຈະຂາຍກໍເລີຍຖືກເຈົ້າໜ້າທີ່ເຂົ້າຈັບຕົວໃນຄັ້ງວັນທີ 12 ມັງກອນ 2016.
ສ່ວນ ທ້າວ ສຸລິຍົງ ກໍໄດ້ຮັບສາລະພາບວ່າ: ໄດ້ເລີ່ມເຄື່ອນໄຫວຊື້-ຂາຍຢາບ້າມາແຕ່ທ້າຍປີ 2015 ຊຶ່ງໄດ້ຊື້ນຳຊາຍຄົນໜຶ່ງບໍ່ຮູ້ຊື່ຢູ່ບ້ານໜອງສະຊື້ຈຳນວນຫຼາຍຄັ້ງ ຄັ້ງລະ 50 ເມັດ ຊື້ໃນລາຄາ 12.000 ກີບຕໍ່ເມັດ ຈາກນັ້ນກໍເອົາໄປຂາຍລາຄາເມັດລະ 13-15 ພັນກີບ ຈຸດຂາຍແມ່ນຢູ່ຖຽງນາຜູ້ກ່ຽວບ້ານນາດີ ແລະໄດ້ໄປສົ່ງໃຫ້ທ້າວ ວຽງ ຫຼາຍຄັ້ງຢູ່ຂອບເຂດບ້ານເຕົາຖ່ານ.
ປະຈຸບັນ ເຈົ້າໜ້າທີ່ໜ່ວຍງານສະກັດກັ້ນ ແລະຕ້ານຢາເສບຕິດ ປກສ ເມືອງໂພນໂຮງ ກຳລັງສະຫຼຸບສັງລວມຂໍ້ມູນຫຼັກຖານສົ່ງໃຫ້ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ດຳເນີນຄະດີຕາມກົດໝາຍໃນຂັ້ນຕໍ່ໄປ.
ທີ່ມາ: