ສຳນັກຂ່າວຕ່າງປະເທດ ລາຍງານໃນວັນທີ 10 ກຸມພາຜ່ານມານີ້ວ່າ ບັນດາລັດຖະມົນຕີວ່າການ ກະຊວງປ້ອງກັນປະເທດ 28 ປະເທດສະມາຊິກຂອງ ອົງການສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ (NATO) ໄດ້ຮັບຮອງເອົາ ການເພີ່ມຈຳນວນທະຫານ ເຂົ້າປະຈຳການຢູ່ເອີຣົບຕາເວັນອອກ ຊຶ່ງເປັນການກະທຳທີ່ອາດເຮັດໃຫ້ ການພົວພັນລະຫວ່າງ ນາໂຕ້ ແລະ ຣັດເຊຍ ເຄັ່ງຕຶງຂຶ້ນອີກຕື່ມ.
ທ່ານ ເຈນສ໌ ສະໂຕເຕັນເບີກ ເລຂາທິການໃຫຍ່ອົງການນາໂຕ້ ຊີ້ແຈ້ງວ່າ ການປະຈຳການດ້ານການທະຫານ ຈະຖືກເພີ່ມທະວີຂຶ້ນທັງທາງບົກ, ທາງອາກາດ ແລະ ທາງທະເລ ແລະ ມີການຈັດສົ່ງໂດຍໝູນວຽນເປັນປະຈຳ ໃນບໍລິເວນທີ່ເປັນຈຸດສ່ຽງ ຊຶ່ງດ້ານກຳລັງຄົນ ແມ່ນຈະເພີ່ມຂຶ້ນ 3 ເທົ່າ ຈາກ 13,000 ຄົນຂຶ້ນເຖິງ 40,000 ຄົນ.
ພ້ອມກັນນັ້ນ ນາໂຕ້ຈະສ້າງຕັ້ງກຳລັງເຄື່ອນທີ່ ທີ່ມີຄວາມອາດສາມາດ ປະຕິບັດການໄດ້ພາຍໃນ 2-3 ວັນ ດ້ວຍຈຳນວນທະຫານ 5,000 ຄົນ ແລະ ໄດ້ຮັບການໜູນຫລັງ ຈາກກອງທັບອາກາດ ແລະ ທະຫານເຮືອ. ນີ້ແມ່ນສັນຍານຢ່າງແຂງແຮງຂອງນາໂຕ້ ເພື່ອແນໃສ່ເຮັດໃຫ້ສຳພັນທະມິດ ຢູ່ພາກພື້ນເອີຣົບຕາເວັນອອກ ມີຄວາມອຸ່ນອ່ຽນໃຈ.
ນອກຈາກສູນບັນຊາການ 6 ແຫ່ງ ທີ່ໄດ້ສ້າງຕັ້ງຢູ່ເອີຣົບຕາເວັນອອກ ໃນປີ 2015 ແລ້ວ, ທ່ານ ສະໂຕເຕັນເບີກ ຍັງກ່າວອີກວ່າ ແຕ່ນີ້ຮອດທ້າຍປີ 2016 ຈະເປີດສູນບັນຊາການໃໝ່ຕື່ມອີກ 2 ແຫ່ງ ແລະ ຜັນຂະຫຍາຍບັນດາການເຄື່ອນໄຫວດ້ານການທະຫານຢູ່ເຂດນີ້.