ອີງຕາມການລາຍງານຂອງ ໜ່ວຍງານປັບສະຖານະພາບແຮງງານລາວ ກ່ຽວກັບການປັບສະຖານະພາບແຮງງານລາວ ທີ່ເຄື່ອນໄຫວອອກແຮງງານແບບຜິດກົດໝາຍ ຢູ່ຕ່າງປະເທດ ໃຫ້ຖືກຕ້ອງຕາມກົດໝາຍ, ທີ່ລາຍງານຕໍ່ລັດຖະມົນຕີວ່າການກະຊວງແຮງງານ ແລະ ສະຫວັດດີການສັງຄົມ ໃນວັນທີ 11 ກຸມພານີ້ ໃຫ້ຮູ້ວ່າ: ນັບແຕ່ຕົ້ນປີຜ່ານມາ, ໜ່ວຍງານດັ່ງກ່າວ ໄດ້ດຳເນີນການສືບຕໍ່ປ່ຽນໜັງສືຢັ້ງຢືນ ສະຖານະພາບບຸກຄົນ (Certificate of Identite) ຫລື CI ທີ່ບໍ່ໄດ້ລະບຸສັນຊາດລາວ ໃຫ້ລະບຸສັນຊາດລາວ ແລະ ໄດ້ອອກບັດອະນຸຍາດອອກແຮງງານໃໝ່, ຊຶ່ງໃນເດືອນກຸມພານີ້ ໄດ້ມີແຮງງານລາວຈຳນວນໜຶ່ງ ໄດ້ອອກມາປັບສະຖານະພາບແລ້ວ ແລະ ຜ່ານການສອບຖາມເຈົ້າໜ້າທີ່ໄທກໍເຫັນວ່າ ນາຍຈ້າງ ແລະ ແຮງງານສ່ວນຫລາຍ ໄດ້ຂໍເລື່ອນເວລາອອກໄປອີກໄລຍະໜຶ່ງ, ໂດຍໃຫ້ເຫດຜົນວ່າ ບໍ່ທັນພ້ອມທາງດ້ານການເງິນຫລັງຈາກປີໃໝ່, ແຕ່ຕາມການສັງເກດແລ້ວ ເຫັນວ່າການຈຳກັດກຳນົດວິຊ່າ ແລະ ບັດອະນຸຍາດເຮັດວຽກຂອງຝ່າຍໄທ ທີ່ກຳນົດເຖິງວັນທີ 31 ມີນາ 2016 ຈຶ່ງເປັນສາເຫດເຮັດໃຫ້ແຮງງານ ບໍ່ອອກມາປ່ຽນສະຖານະພາບ. ດັ່ງນັ້ນ ທາງໜ່ວຍງານດັ່ງກ່າວ ຈຶ່ງໄດ້ເຮັດຈົດໝາຍເຖິງທ່ານອະທິບໍດີກົມການຈັດຫາງານ ເພື່ອສະເໜີ 3 ບັນຫາ ໃຫ້ໜ່ວຍງານປັບສະຖານະພາບແຮງງານລາວ ສາມາດລົງປັບສະຖານະພາບເຄື່ອນທີ່ ຕາມຈັງຫວັດຕ່າງໆໄດ້ຢ່າງສະດວກ, ເຊິ່ງໄດ້ເລີ່ມຈັດຕັ້ງປະຕິບັດໃນເດືອນກຸມພານີ້.
ທ່ານຮອງຫົວໜ້າກົມຄຸ້ມຄອງແຮງງານ ໄດ້ກ່າວວ່າ: ປັດຈຸບັນ ຝ່າຍໄທພວມພິຈາລະນາແກ້ໄຂບັນຫາກຳນົດອະນຸຍາດໃຫ້ເຮັດວຽກຊົ່ວຄາວແກ່ແຮງງານລາວ, ກຳປູເຈຍ ແລະ ມຽນມາ ຈາກເດີມທີ່ມີການກຳນົດໃຫ້ໄດ້ເຖິງ 31 ມີນາ 2016 ແລະ ໄດ້ເຮັດແຈ້ງການໃຫ້ນາຍຈ້າງ ແລະ ແຮງງານ ໄປປະກອບເອກກະສານ ຂໍຕໍ່ໃບອະນຸຍາດເຮັດວຽກ ນຳໜ່ວຍງານຈັດຫາງານໄທ ຢູ່ຕາມເຂດຕ່າງໆໃນທົ່ວປະເທດ, ເຊິ່ງຈະອະນຸດຍາດໃຫ້ເຮັດວຽກໄດ້ 1 ປີ ແລະ ສາມາດຕໍ່ໄດ້ອີກ 1 ປີ. ນອກຈາກນີ້ ໜ່ວຍງານຂອງລັດຖະບານລາວ ທີ່ປະຈຳຢູ່ປະເທດໄທນັ້ນ ຍັງໄດ້ສືບຕໍ່ເຮັດໜັງສືຢັ້ງຢືນປະເພດຕ່າງໆ ເພື່ອຊ່ວຍໃຫ້ແຮງງານລາວ ສາມາດຕໍ່ວີຊ່ານຳ ສູນ ຕ.ມ ໄທໄດ້, ຊຶ່ງເລີ່ມແຕ່ວັນທີ 26 ທັນວາ 2015-25 ມັງກອນ 2016, ມີແຮງງານລາວຈຳນວນໜຶ່ງ ເຂົ້າມາປັບສະຖານະພາບ ສຳລັບຜູ້ທີ່ສຳພາດຜ່ານ ແລະ ໜ່ວຍງານໄດ້ອອກໜັງສືຢັ້ງຢືນສະຖານະພາບບຸກຄົນ ແລະ ບັດອະນຸຍາດເຮັດວຽກ ມີ 2 ພັນກວ່າຄົນ, ໃນນັ້ນ ແຮງງານອຸດສາຫະກຳ-ກໍ່ສ້າງມີ 265 ຄົນ, ອຸດສາຫະກຳ-ການຜະລິດ 343 ຄົນ, ກະສິກຳ-ປູກຝັງ 214 ຄົນ, ກະສິກຳ-ການປະມົງ 162 ຄົນ ແລະ ການບໍລິການ 1.088 ຄົນ.
ແຫລ່ງຂ່າວ:
