spot_img
Homeຂ່າວພາຍ​ໃນກຽມຈັດການແຂ່ງຂັນ ແລ່ນຮາບມາລາທອນນາໆຊາດ ຄັ້ງທຳອິດຢູ່ນະຄອນວງວຽງຈັນ!

ກຽມຈັດການແຂ່ງຂັນ ແລ່ນຮາບມາລາທອນນາໆຊາດ ຄັ້ງທຳອິດຢູ່ນະຄອນວງວຽງຈັນ!

Published on

ສະຫະພັນກິລາ ແລ່ນ-ລານແຫ່ງຊາດລາວ ຮ່ວມກັບ ວິສະຫະກິດ ອີເວັ້ນກູດ ກຽມຈັດການແຂ່ງຂັນ ກິລາແລ່ນຮາບມາລາທອນນາໆຊາດ ຄັ້ງທຳອິດ ໃນວັນທີ 3 ມີນາ ນີ້ທີ່ນະຄອນຫລວງວຽງຈັນ ໂດຍມີນັກກິລາລາວ ແລະ ຕ່າງປະເທດ ແຈ້ງເຈດຈຳນົງເຂົ້າຮ່ວມແຂ່ງຂັນເຖິງ 600 ກວ່າຄົນ ໂດຍການອຸປະຖຳຫລັກ ຂອງບໍລິສັດເບຍລາວ ຈຳກັດ ມູນຄ່າ 100 ລ້ານກວ່າກີບ ເຊິ່ງພິທີຖະແຫລງຂ່າວດັ່ງກ່າວ ຈັດຂຶ້ນໃນວັນທີ 8 ກຸມພານີ້ ທີ່ໂຮງແຮມສັນທາຣາ ແຄມຄອງ ນະຄອນຫລວງວຽງຈັນ ໂດຍໃຫ້ກຽດເຂົ້າຮ່ວມຂອງ ທ່ານ ສົມພູ ພົງສາ, ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກິລາ (ສສກ) ທັງເປັນຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດລາວ, ມີ ທ່ານ ພັນເອກ ພິມພາ ສີໂພໄຊ, ຮອງປະທານສະຫະພັນກິລາແລ່ນ-ລານ ແຫ່ງຊາດລາວ ແລະ ທ່ານ ສູນທອນ ສີຣິສັກ,ຮອງຜູ້ອຳນວຍການ ບໍລິສັດເບຍລາວ ຈຳກັດ ພ້ອມດ້ວຍຄະນະບໍລິຫານສະຫະພັນ, ວິສາຫະກິດອີເວັ້ນກູດ, ແຂກຖືກເຊີນ ແລະ ບັນດານັກກິລາທັງຊາວລາວ ແລະຕ່າງປະເທດຕະຫລອດຮອດສື່ມວນຊົນທຸກຂະແໜງການເຂົ້າຮ່ວມ.

ທ່ານພັນເອກ ພິມພາ ສີໂພໄຊ ກ່າວວ່າ: ເພື່ອເປັນ ການຊົມເຊີຍຜົນສຳເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ Xຂອງພັກປະຊາຊົນ ປະຕິວັດລາວ, ວັນສ້າງຕັ້ງກອງທັບປະຊາຊົນລາວ ຄົບຮອບ 67 ປີ ແລະ ການກະກຽມເລືອກຕັ້ງ ສະມາຊິກສະພາແຫ່ງຊາດ ຊຸດທີ VIII ທີ່ຈະມາເຖິງນີ້, ພ້ອມດຽວກັນນະຄອນຫລວງວຽງຈັນ ຍັງມີເສັ້ນທາງສຳລັບການແລ່ນ ແລະ ຍ່າງທີ່ເຕັມໄປດ້ວຍຄວາມໝາຍທາງດ້ານປະຫວັດສາດ, ວັດທະນະທຳ ແລະ ທຳມະຊາດທີ່ສວຍສົດງົດງາມ ເປັນຕົ້ນແມ່ນທາງແລ່ນແຄມຂອງ ທີ່ມີທັດສະນີຍະພາບອັນຈົບງາມ ສາມາດດຶງດູດ ນັກແລ່ນຈາກຕ່າງປະເທດເຂົ້າຮ່ວມ ແລະ ສົ່ງເສີມອຸດສາຫະກຳການທ່ອງທ່ຽວໄປພ້ອມໆກັນ.  ຄຽງຄູ່ກັນນັ້ນ, ກໍຍັງ ເປັນການສົ່ງເສີມນັກກິລາລາວ ໃຫ້ມີການເຄື່ອນໄຫວຢ່າງຕໍ່ເນື່ອງ ເພື່ອຝຶກຝົນຕົນເອງໃຫ້ມີຄວາມສາມາດດີເດັ່ນ ແລະ ສ້າງຜົນງານໃນລະດັບນາໆຊາດໄດ້ ໃນອະນາຄົດ. ດັ່ງນັ້ນ, ຈຶ່ງຈະໄດ້ຈັດການແຂ່ງຂັນ ກິລາແລ່ນຮາບມາລາທອນນາໆຊາດ ຄັ້ງທຳອິດຂອງລາວນີ້ຂຶ້ນ.  

ລາຍການແຂ່ງຂັນດັ່ງກ່າວ ຈະຊີງໄຊ 3 ລາຍການ ຄື: ແລ່ນຮາບມາລາທອນ ໄລຍະທາງ 21 ກິໂລແມັດ, ແລ່ນມິນິມາລາທອນ 10,5 ກິໂລແມັດ ແລະ ແລ່ນ-ຍ່າງ ເພື່ອສຸຂະພາບ 5 ກິໂລແມັດ ທັງປະເພດຍິງ-ຊາຍ ໂດຍການແຂ່ງຂັນຄັ້ງນີ້ ແມ່ນເປີດກວ້າງນັກກິລາທັງຕ່າງຊາດ ແລະ ທີມຊາດລາວສາມາດເຂົ້າຮ່ວມແຂ່ງຂັນໄດ້.

ສຳລັບແລ່ນຮາບມາລາທອນ ແມ່ນຈະເລີ່ມເວລາ 5:00 ໂມງເຊົ້າ, ແລ່ນມິນິມາລາທອນ ເລີ່ມ 5:30 ໂມງເຊົ້າ ແລະ ແລ່ນ-ຍ່າງ ເພື່ອສຸຂະ ພາບເລີ່ມ 6:00 ໂມງເຊົ້າ ໂດຍຈະມີຈຸດເລີ່ມຕົ້ນຢູ່ເດີ່ນທາດຫລວງຫລັງຈາກນັ້ນ ກໍໄປຕາມເສັ້ນທາງຂອງ ເມືອງໄຊເຊດຖາ, ເມືອງສີໂຄດຕະບອງ, ເມືອງ ສີສັດຕະນາກ ແລະ ເມືອງຈັນທະບູລີ.

ສ່ວນລາງວັນຊະນະເລີດ ປະເພດແລ່ນຮາບມາລາທອນ ຍິງ-ຊາຍ ຈະໄດ້ຮັບເງິນສົດ 5 ລ້ານກີບ, ອັນດັບ 2 ຈະໄດ້ຮັບ 2,5 ລ້ານກີບ, ອັນດັບ 3 ຈະໄດ້ຮັບ 1 ລ້ານກີບ, ອັນດັບ 4 ຈະໄດ້ຮັບ 7 ແສນກີບ ແລະ ອັນດັບ 5 ຈະໄດ້ຮັບ 5 ແສນກີບ ແລະ ປະເພດແລ່ນມິນິມາລາທອນ ຍິງ-ຊາຍ ອັນດັບ 1 ແມ່ນຈະໄດ້ຮັບເງິນສົດ 2 ລ້ານກີບ, ອັນດັບ 2 ຈະໄດ້ຮັບ 1 ລ້ານກີບ, ອັນດັບ 3 ຈະໄດ້ຮັບ 5 ແສນກີບ, ອັນດັບ 4 ຈະໄດ້ຮັບ 3 ແສນກີບ ແລະ ອັນດັບ 5 ຈະໄດ້ຮັບ 2 ແສນກີບ. ສ່ວນກິລາແລ່ນ-ຍ່າງ ເພື່ອສຸຂະພາບບໍ່ມີລາງວັນ. ຖ້າຫາກນັກກິລາທ່ານໃດສົນໃຈເຂົ້າຮ່ວມ ແຂ່ງຂັນສາມາດຕິດຕໍ່ພົວພັນໄດ້ທີ່ເບີໂທ 020 55888688 ຮ້ານແຮບປີ້ ສະປອດ ບ້ານພະໄຊ ເມືອງສີສັດຕະນາກ ນະຄອນຫລວງວຽງຈັນ.

 

ແຫລ່ງຂ່າວ:

ຂປລ

ບົດຄວາມຫຼ້າສຸດ

ຕື່ມແບບຟອມ Thailand Digital Arrival Card (TDAC) ກ່ອນເຂົ້າໄທ

ນັກທ່ອງທ່ຽວ ຫຼື ຄົນຕ່າງປະເທດຕ້ອງຕື່ມຟອມທາງອອນລາຍກ່ອນເຂົ້າປະເທດໄທ ເລີ່ມແຕ່ວັນທີ 1 ພຶດສະພາ 2025 ເປັນຕົ້ນໄປ, ຜູ້ທີ່ບໍ່ແມ່ນພົນລະເມືອງໄທທຸກຄົນ(ນັກທ່ອງທ່ຽວ, ຄົນຕ່າງປະເທດ) ທີ່ເດີນທາງໄປປະເທດໄທດ້ວຍທາງອາກາດ, ທາງບົກ ຫຼື ທາງທະເລ ຈະຕ້ອງໄດ້ຕື່ມແບບຟອມ...

ປະຫວັດຫຍໍ້ຂອງ ສະຫາຍ ພົນເອກ ຄຳໄຕ ສີພັນດອນ

ສະຫາຍ ພົນເອກ ຄຳໄຕ ສີພັນດອນ ເກີດເມື່ອວັນທີ 8 ກຸມພາ 1924 ທີ່ບ້ານຫົວໂຂງພະໃຫຍ່, ເມືອງໂຂງ, ແຂວງສີທັນດອນ (ແຂວງຈຳປາສັກ ໃນປັດຈຸບັນ), ເປັນບຸດ...

ອາຊີບຕ້ອງຫ້າມ! ຕຳຫຼວດໄທວາງແຜນຈັບໜຸ່ມລາວ ຂັບລົດຈັກຮັບຈ້າງ ຍາດອາຊີບຄົນໄທ

ເຈົ້າໜ້າທີ່ຕຳຫຼວດໄທ ວາງແຜນຈັບໜຸ່ມລາວ ຍາດອາຊີບຄົນໄທ ຂັບລົດຈັກຮັບຈ້າງ ບໍລິເວນເຂດຫ້ວຍຂວາງ ກຸງເທບມະຫານະຄອນ ປະເທດໄທ. ສຳນັກຂ່າວໄທລາຍງານໃນວັນທີ 1 ເມສາ 2025 ຜ່ານມາ, ເຈົ້າໜ້າທີ່ຕຳຫຼວດໄທໄດ້ຮັບແຈ້ງຈາກສາຍຂ່າວ ກ່ຽວກັບເບາະແສວ່າ: ມີຊາຍຄ້າຍຄືກັບແຮງງານຕ່າງດ້າວ...

ທຳລາຍໃຫ້ໝົດ! ພະແນກ ອຄ ແຂວງຄຳມ່ວນ ທຳລາຍສິນຄ້າລະເມີດກົົດໝາຍ ມູນຄ່າ ເກືອບ 300 ລ້ານ ກວ່າກີບ

ພະແນກອຸດສາຫະກຳ ແລະ ການຄ້າແຂວງຄຳມ່ວນ ທຳລາຍສິນຄ້າທີ່ລະເມີດກົດໝາຍ, ລະບຽບການດ້ານການຄ້າ ແລະ ສິນຄ້ານອກລະບົບທີ່ອາຍັດມາໄດ້ໃນໄລຍະປີ 2024-2025 ຜ່ານມາ. ໃນຕອນບ່າຍວັນທີ 1 ເມສາ 2025 ຢູ່ທີ່ພະແນກອຸດສາຫະກໍາ ແລະ...