ຂປລ. ງານບຸນນະມັດສະການຜາສາດຫີນວັດພູຈຳປາສັກ ຈະຈັດຂຶ້ນໃນ ລະຫວ່າງວັນທີ 16-22 ກຸມພາ 2016 ກົງກັບມື້ ອອກໃໝ່ 13 ຄໍ່າ ເດືອນ 3 ແລະ ໃນວັນທີ 16 ເປັນມື້ເປີດງານຕະຫລາດນັດ, ເລີ່ມມີການຄົບງັນຕາມປະເພນີ ແລະ ວັນທີ 20 ຈະມີພິທີເປີດງານບຸນດັ່ງກ່າວ ຢ່າງເປັນທາງການ ໂດຍຈະມີ ການແຫ່ປ້າຍມໍລະດົກ, ຂະບວນແຮ່ທີ່ເປັນເອກກະລັກຂອງບັນດາເມືອງ ແລະ ກ້ອນກຳລັງຕ່າງໆ ເຊິ່ງຈະມີຄະນະນໍາຈາກສູນກາງ, ແຂວງ ແລະ ເມືອງ ເຂົ້າຮ່ວມ.
ໃນງານຈະມີຫລາຍກິດກຳທີ່ໜ້າສົນໃຈ ເຊັ່ນ: ຕະຫລາດນັດວາງສະແດງສິນຄ້າອຸດສາຫະກຳ, ກະສິກຳ ແລະ ຫັດຖະກຳ ຈາກບັນດາເມືອງ, ບໍລິສັດ, ຫ້າງຮ້ານຕ່າງໆ ທັງພາຍໃນ ແລະ ຕ່າງປະເທດ, ການແຂ່ງຂັນກິລາມວນຊົນ, ການສະແດງສິລະປະວັນນະຄະດີ ຈາກພາຍໃນແຂວງ ແລະ ປະເທດເພື່ອນບ້ານ (ໄທ, ຫວຽດນາມ, ກຳປູ່ເຈຍ, ອິນເດຍ) ແລະ ລາຍການສະແດງອື່ນໆ. ສວນຂຶ້ນໄປກາບໄຫວ້ຍູຊາຢູ່ເທິງວັດພູ ແຕ່ວັນທີ 16-19 ແມ່ນເກັບຄ່າທຳ ນຽມຕາມປົກກະຕິ ສ່ວນວັນທີ 20-22 ຈະບໍ່ເສຍຄ່າ.
ນັກປະຫວັດສາດບູຮານຄະດີ ພາຍໃນ ແລະ ຕ່າງປະເທດ ກ່າວວ່າ: ສະຖານບູຮານວັດພູ ແມ່ນຈຸດໃຈກາງຂອງພື້ນທີ່ວັດທະນະທຳ ໃນຂົງເຂດທົ່ງພຽງຈຳປາສັກ ເຊິ່ງປະກອບມີ ວັດວາອາຮາມ, ອ່າງເກັບນ້ຳ (ໜອງສະບູຮານ), ຮ່ອງລະບາຍນ້ຳ, ແຫລ່ງຕັດຫີນ, ແຫລ່ງທີ່ຕັ້ງຂອງຊຸມຊົນ, ຖະໜົນບູຮານເຊື່ອມຕໍ່ໄປຍັງອັງກໍວັດ, ເຊິ່ງຈຸດ ປະສົງ ຂອງການສ້າງສະຖານບູຮານວັດພູ ແມ່ນເພື່ອໃຫ້ກາຍເປັນບ່ອນຊັກກະລະບູາຊາຂອງສາສະນິກະຊົນ ທັງຫລາຍ ທັງພາຍໃນ ແລະ ຕ່າງປະເທດ, ພ້ອມເປັນການສົ່ງເສີມຮີດຄອງວັດທະນະທຳອັນດີງາມຂອງຊາດ ແລະ ສົ່ງເສີມການທ່ອງທ່ຽວ.
ວັດພູຈຳປາສັກ ໄດ້ຖືກຮັບຮອງເຂົ້າເປັນມໍລະດົກລະແຫ່ງຊາດ ໃນປີ 1993 ແລະ ເປັນມໍລະດົກໂລກ ໃນປີ 2002, ງານບຸນນະມັດສະການຜາສາດຫີນວັດພູ ໄດ້ຍົກລະດັບຂຶ້ນເປັນງານລະດັບແຂວງ, ລະດັບປະເທດ ໄດ້ຈັດຂຶ້ນໃນທຸກປີ ຈົນເຖິງປັດຈຸບັນ. ການຈັດງານບຸນດັ່ງກ່າວ, ໄດ້ກາຍເປັນແຫລ່ງທ່ອງທ່ຽວລະດັບປະເທດ, ລະດັບໂລກ ແລະ ເປັນຕົວແບບອັນສຳຄັນ ທາງດ້ານສະຖາປັດຕະຍະກຳ.
ແຫລ່ງຂ່າວ:
