ການ​ແຂ່ງຂັນ​ບານ​ເຕະ​ຟຸດ​ຊໍ ຊີງ​ແຊັມທົ່ວ​ປະ​ເທດ ກຽມ​ເປີດ​ສາກ​ການ​ແຂ່ງຂັນ​ໃນ​ລະຫວ່າງ​ເດືອນ​ພຶດສະພາ 2014 ທີ່​ຈະ​ເຖິງ​ນີ້ ​ເພື່ອ​ເປັນ​ການ​ຄັດ​ເລືອກ​ເອົາ​ນັກກີລາ​ທີ່​ມີ​ຄວາມ​ຮູ້ ຄວາມ​ສາມາດ ​ເປັນ​ຕົວ​ແທນ​ທີ​ມຊາດ​ລາວ ເຂົ້າ​ຮ່ວມການ​ແຂ່ງຂັນ​ບານ​ເຕະ​ຟຸດ​ຊໍ ຊີງ​ແຊັມອາ​ຊຽນ 2014 ທີ່​ປະ​ເທດ​ມາ​ເລ​ເຊຍ ​ໃນ​ເດືອນ​ກັນຍາ​ນີ້.

ທ່ານ ວຽງ​ສະຫວັນ ​ແສງ​ຈັນ ປະທານ​ສະຫະພັນ​ບານ​ເຕະ ນະຄອນຫຼວງ​ວຽງ​ຈັນ ທັງ​ເປັນ​ປະທານ​ອະນຸ​ກໍາມະການ​ຟຸດ​ຊໍ​ລາວ ​ແຈ້ງ​ໃຫ້​ຮູ້​ວ່າ: ປັດ​ຈຸບັນ​ທາງ​ຄະນະ​ກໍາມະການ​ບານ​ເຕະ​ຟຸດ​ຊໍ​ລາວ ​ໄດ້​ຈັດ​ກອງ​ປະຊຸມ​ປຶກສາ​ຫາລື ​ແລະ ຄົ້ນ​ຄ້ວາ ກ່ຽວ​ກັບ​ການ​ແຂ່ງຂັນ​ບານ​ເຕະ​ຟຸດ​ຊໍ ຊີງ​ແຊັມທົ່ວ​ປະ​ເທດ​ໂດຍ​ຄາດ​ວ່າ​ຈະ​ຈັດ​ຂຶ້ນ ໃນ​ລະຫວ່າງ​ເດືອນ​ພຶດສະພາ 2014 ທີ່​ຈະ​ເຖິງ​ນີ້ພາຍຫຼັງ​ທີ່​ພວກ​ເຮົາ​ໄດ້​ສໍາ​ເລັດ​ການຈັດ​ຝຶກ​ອົບຮົມ​ຄູ​ຝຶກ ລະດັບ 1 ຂອງ​ເອ​ເອຟຊີ ລະຫວ່າງ​ວັນ​ທີ 5-10 ​ເມສາ 2014 ທັງ​ນີ້ ກໍເພື່ອ​ເປັນ​ການ​ຄັດ​ເລືອກ​ເອົາ​ນັກກີລາ​ທີ່​ມີ​ຄວາມ​ຮູ້ ຄວາມ​ສາມາດ ​ເປັນ​ຕົວ​ແທນ​ທີ​ມຊາດ​ລາວ ເຂົ້າ​ຮ່ວມການ​ແຂ່ງຂັນ​ບານ​ເຕະ​ຟຸດ​ຊໍ ຊີງ​ແຊັມອາ​ຊຽນ 2014 ທີ່​ປະ​ເທດ​ມາ​ເລ​ເຊຍ ​ໃນ​ເດືອນ​ກັນຍາ​ນີ້.

ພ້ອມ​ດຽວ​ກັນ​ນີ້ ທາງ​ຄະນະ​ພວກ​ເຮົາ​ຍັງ​ຈະ​ໄດ້​ຈັດການ​ແຂ່ງຂັນ​ຟຸດ​ຊໍ ຂຶ້ນ​ຫຼາຍ​ລາຍການ ​ເປັນ​ຕົ້ນ​ແມ່ນ​ຟຸດ​ຊໍ​ທົ່ວ​ນະຄອນຫຼວງ​ວຽງ​ຈັນ ​ເພື່ອ​ເປັນ​ການ​ຄັດ​ເລືອກ​ເອົາ​ນັກກີລາທີ່​ມີ​ພອນ​ສະຫວັນ ​ເປັນ​ຕົວ​ແທນ​ຂອງ​ທີ​ມນະຄອນຫຼວງ​ວຽງ​ຈັນ ​ເຂົ້າ​ຮ່ວມ​ງານ​ມະຫາ​ກໍາ​ກີລາ​ແຫ່ງ​ຊາດ ຄັ້ງ​ທີ 10 ທີ່​ແຂວງ​ອຸດົມ​ໄຊ​ ໄດ້​ຮັບກຽດ​ເປັນ​ເຈົ້າພາບ ລະຫວ່າງ​ວັນ​ທີ 13-22 ທັນວາ 2014.

ທີ່ມາ   http://www.vientianemai.net/teen/khao/3/11502