ບລຸມເບີກລາຍງານວ່າ ແບັກເບີຣີ ບໍລິສັດຜູ້ຜະລິດສະມາດໂຟນ ແລະຊອຟແວຂອງການາດາ ປົດພະນັກງານອອກອີກປະມານ 200 ຕໍາແໜ່ງໃນລັດຟໍຣີດາສະຫະລັດອາເມລິກາ ແລະ ລັດອອນແທຣິໂອຂອງການາດາ ໂດຍຕຳແໜ່ງງານທີ່ຖືກປົດອອກລວມເຖິງ 75 ຄົນທີ່ສຳນັກງານໃນເມືອງຊິນໄຣສ ລັດຟໍຣີດາ ອ້າງອີງຈາກຂໍ້ມູນທີ່ໂພສໄວ້ເທິງເວັບໄຊຂອງກະຊວງໂອກາດທາງດ້ານເສດຖະກິດຂອງລັດຟໍຣິດາ.
ແບັກເບີຣີມີພະນັກງານ 6.225 ຄົນ ເມື່ອເດືອນກຸມພາ 2558 ຈາກການເປີດເຜີຍຂອງບໍລິສັດໃນໄລຍະເວລານັ້ນ ນັບແຕ່ນັ້ນມາ ແບັກເບີຣີມີການປົດພະນັກງານອອກອີກຈຳນວນໜຶ່ງ ແຕ່ກໍມີສ່ວນທີ່ເຂົ້າມາເພີ່ມຈາກການເຂົ້າຊື້ກິດຈະການຂອງບໍລິສັດກູດເຕັກໂນໂລຊີນຳ.
ທາງບໍລິສັດລະບຸໄວ້ໃນອີເມລຊີ້ແຈງວ່າ ຈາກການທີ່ແບັກເບີຣີດຳເນີນແຜນການປັບໂຄງສ້າງຂອງບໍລິສັດ ພວກເຮົາຍັງໃຫ້ຄວາມສຳຄັນກັບການຊຸກຍູ້ຄວາມມີປະສິດທິພາບຂອງການເຮັດວຽກທົ່ວໂລກ ດ້ວຍເຫດນີ້ຈິ່ງມີພະນັກງານປະມານ 200 ຄົນໃນການາດາ ແລະຟໍຣີດາໄດ້ຮັບຜົນກະທົບ.
ແບັກເບີຣີ ພະຍາຍາມທີ່ຈະກັບມາສ້າງຜົນກຳໄລອີກໃນໄລຍະຍາວ ດ້ວຍການສ້າງທຸລະກິດຊອຟແວແລະຫຼຸດຕົ້ນທຶນຈາກການທີ່ຍອດຂາຍສະມາດໂຟນເລີ່ມຫຼຸດລົງ ໂດຍເມື່ອປີຜ່ານມາ ແບັກເບີຣີຫາກໍຫັນໄປໃຊ້ລະບົບປະຕິບັດການແອນດຣອຍ ແທນທີ່ຈະໃຊ້ລະບົບປະຕິບັດການບີບີ 10 ຂອງຕົນເອງ.
ທັງນີ້ ມູນຄ່າຮຸ້ນຂອງແບັກເບີຣີຫຼຸດລົງ 24% ແລ້ວໃນປີນີ້.