ໃນໄລຍະຜ່ານມາຂະແໜງໂຍທາທິການ ແລະຂົນສົ່ງ ໄດ້ຖືສຳຄັນໃນການພັດທະນາຕົວເມືອງຕິດພັນກັບການພັດທະນາຊົນນະບົດຕາມທິດ 3 ສ້າງ ສະເພາະການຈັດຕັ້ງປະຕິບັດວາງແຜນຜັງ ລວມຂອງຕົວເມືອງ ຂະນະນີ້ແມ່ນໄດ້ສຳເລັດໂດຍພື້ນຖານ 148 ເມືອງຂອບເຂດທົ່ວປະເທດ.
ຕາມຂໍ້ມູນລາຍງານຂອງ ທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະຂົນສົ່ງລາຍງານຕໍ່ກອງ ປະຊຸມໃຫຍ່ຄັ້ງທີ X ຂອງພັກທີ່ຈັດຂຶ້ນບໍ່ດົນມານີ້ໃຫ້ຮູ້ວ່າ: ກະຊວງໂຍທາທິການ ແລະຂົນສົ່ງໃນຜ່ານມາໄດ້ຖືສຳຄັນຕໍ່ວຽກງານພັດທະນາຕົວເມືອງຕິດພັນກັບການພັດທະນາຊົນນະບົດຕາມທິດ 3 ສ້າງໃນການຈັດຕັ້ງປະຕິບັດດ້ານວິຊາການທີ່ຂະແໜງການຕົນຮັບຜິດຊອບ ໃນນີ້ ໄດ້ຊີ້ນຳໆພາສູ້ຊົນຄົ້ນຄວ້າການຈັດຕັ້ງປະຕິບັດການວາງແຜນຜັງລວມຂອງຕົວເມືອງ ໄດ້ສຳເລັດໂດຍພື້ນຖານຂອບເຂດ ທົ່ວປະເທດ 148 ເມືອງໃນທ້າຍປີ 2015.
ນອກນັ້ນ ຍັງໄດ້ຄົ້ນຄວ້າຊອກຫາທຶນຮອນຈາກອົງການຈັດຕັ້ງສາກົນບັນດາປະເທດເພື່ອນມິດ ແລະງົບປະມານພາຍໃນມາສືບຕໍ່ພັດທະນາພື້ນຖານໂຄງລ່າງຕົວເມືອງ ຊຶ່ງໄດ້ສຳເລັດໂຄງການພັດທະນາຕົວເມືອງນ້ອຍທັງໝົດ 17 ເມືອງອັນທີ່ພົ້ນເດັ່ນແມ່ນໄດ້ເອົາໃຈໃສ່ສົມທົບກັບອົງການປົກຄອງທ້ອງຖິ່ນປຸກລະດົມທຸກພາກສ່ວນເຂົ້າຮ່ວມການລົງທຶນກໍ່ສ້າງນ້ຳປະປາຂະໜາດນ້ອຍຕາມ ແນວທາງນະໂຍບາຍຂອງພັກທີ່ວ່າ: ລັດ ແລະປະຊາຊົນພ້ອມກັນເຮັດ ໃນນີ້ ຈັດຕັ້ງປະຕິບັດໄດ້ທັງໝົດ 25 ບ້ານ ແລະ 10 ຕົວເມືອງ ນອນໃນ 6 ແຂວງ ແລະນະຄອນຫຼວງວຽງຈັນຄື: ແຂວງວຽງຈັນ, ໄຊຍະບູລີ, ບໍລິຄຳໄຊ, ສະຫວັນນະເຂດ, ຫຼວງພະບາງ.
ສຳລັບ ແຂວງສາລະວັນ ໄດ້ເອົາໃຈໃສ່ພັດທະນາຕົວເມືອງຕິດພັນການກໍ່ສ້າງເສັ້ນທາງຫຼວງແຫ່ງຊາດເລກ 15 ຊຶ່ງໄດ້ປູຢາງໃນຕົວເມືອງໆລະ 3-5 ກິ ໂລແມັດ ແລະກໍ່ສ້າງລະບົບນ້ຳປະປາ ລວມທັງໝົດມີ 5 ເມືອງ ເປັນຕົ້ນເມືອງລະຄອນເພັງ, ວາປີ, ຕຸ້ມລານ, ຕະໂອ້ຍ ແລະເມືອງສະໝ້ວຍ.
ແນວໃດກໍດີ ເພື່ອເສີມຂະຫຍາຍຕາມທິດຊີ້ນຳວຽກງານ 3 ສ້າງ ໂດຍສະເພາະແມ່ນການສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາໄດ້ທ່ານ ດຣ. ບຸນຈັນ ກ່າວວ່າ ກ່ອນອື່ນຈະຕ້ອງສ້າງໃຫ້ມີແຜນຜັງບ້ານພັດທະນາ ແລະສ້າງບ້ານໃຫຍ່ໃຫ້ກາຍເປັນຕົວເມືອງໃນຊົນນະບົດ ເນື່ອງຈາກແມ່ນມາດຖານໜຶ່ງທີ່ສຳຄັນໃນການພັດທະນາຊົນນະບົດ ແລະ ລົບລ້າງຄວາມທຸກຍາກ ເພາະເປັນການຈັດສັນພູມລຳເນົາແບບຄົງທີ່ຢ່າງເປັນລະບົບເປັນຕົ້ນການສ້າງເຮືອນຢູ່ແບບຖາວອນ, ນຳໃຊ້ວັດສະດຸກໍ່ສ້າງກັບທີ່, ລາຄາບໍ່ແພງ ແລະຖືກຕ້ອງຕາມມາດຕະຖານສຸຂະພິບານ ນອກນີ້ ຍັງເປັນພື້ນຖານໃຫ້ແກ່ການສ້າງຍຸດທະສາດການ ພັດທະນາຕົວເມືອງໃນຊົນນະບົດ ແລະ ສາມາດປະຢັດເວລາຄ່າໃຊ້ຈ່າຍໃຫ້ແກ່ການລົງທຶນຕື່ມອີກ.
ພ້ອມດຽວກັນນີ້ ຍທຂ ຍັງໄດ້ສ້າງຕົວແບບຕົວເມືອງໃນຊົນນະບົດຕາມທິດ 3 ສ້າງ ຢູ່ເມືອງໄຊຈຳພອນ ແຂວງບໍລິຄຳໄຊ ປະຕິບັດຕາມຕົວແບບປຶ້ມຄູ່ມື ໂດຍໄດ້ເລີ່ມຈາກການສຳຫຼວດອອກແບບແຜນຜັງເທສະບານເມືອງ, ອອກແບບຕັດຕາຜ້າບັນດາເສັ້ນທາງໃນເມືອງ, ສຳຫຼວດອອກແບບທີ່ຕັ້ງສຳນັກງານອົງການ, ເຂດທີ່ຢູ່ອາໄສຂອງປະຊາຊົນ, ສ້າງລະບົບນ້ຳປະປາ ແລະອື່ນໆ ທັງນີ້ ຍທຂ ຍັງວາງແຜນຍຸດທະສາດການພັດທະນາ ແລະວາງແຜນຜັງລວມ ເມືອງໃນຊົນນະບົດໃຫ້ເປັນລະບົບຄົບຊຸດ ພ້ອມທັງມີການຈັດລຽງບຸລິມະສິດຢ່າງລະອຽດ ແລະມີຈຸດສຸມເປັນແຕ່ລະໄລຍະ ໂດຍການຮ່ວມມືກັບອົງການປົກຄອງທ້ອງຖິ່ນທຸກພາກສ່ວນທີ່ກ່ຽວຂ້ອງທັງ ພາກລັດ, ເອກະຊົນ ແລະປະຊາຊົນ ໃຫ້ມີສ່ວນຮ່ວມໃນຂະບວນການວາງແຜນ ແລະການຈັດຕັ້ງປະຕິບັດເລີ່ມຕັ້ງແຕ່ບາດກ້າວທຳອິດ.
