ມື້ວານນີ້ ວັນທີ 8 ກຸມພາ 2016 ພາຍຫຼັງເຈົ້າໜ້າທີ່ຕຳຫຼວດມຸກດາຫານ ປະເທດໄທ ໄດ້ຮັບແຈ້ງວ່າຈະມີກະເທີຍລາວຂົນຢາບ້າ ຜ່ານດ່ານຂົວມິດຕະພາບສະຫວັນນະເຂດ-ມຸກດາຫານ ໄປຍັງປະເທດໄທ ເຈົ້າໜ້າທີ່ຈຶ່ງໄດ້ຕິດຕາມ.

ຈົນກະທັ່ງພົບກະເທີຍລາວຕາມທີ່ຮັບແຈ້ງເດິນທາງໄປເພື່ອຈະຂີ່ລົດຕູ້ໂດຍສານຕໍ່ໄປຍັງ ນະຄອນລາດຊະສີມາ ຕຳຫຼວດຈຶ່ງໄດ້ສະແດງໂຕເຂົ້າຂໍກວດຄົ້ນ ແລະພົບຢາບ້າທີ່ບັນຈຸໃນຖົງໂດຍໃຊ້ສະເຕີຂອງຜູ້ຍິງຮັດໄວ້ ພ້ອມກັບນຸ່ງເສື້ອກັນໜາວຄຸມໄວ້ເພື່ອຕົບຕາເຈົ້າໜ້າທີ່.

ຈາກການກວດຄົ້ນພົບຢາບ້າຈຳນວນ 50 ຖົງ ຖົງລະ 200 ເມັດ ລວມ 10,000 ເມັດ. ຈາກການສອບຖາມຜູ້ກ່ຽວ ຊື່ ທ້າວ ຍຸດທະຍາ ສານສະໜອງ ປະຊາຊົນເມືອງໄກສອນ ແຂວງສະຫວັນນະເຂດ, ຮັບຈ້າງຂົນຢາບ້າໄປສົ່ງຢູ່ນະຄອນລາດຊະສີມາ ໄດ້ເງິນຄ່າຈ້າງເທື່ອລະ 80,000 ບາດ ແລະໄດ້ເຮັດມາແລ້ວ 3 ເທື່ອ.

ເຈົ້າໜ້າທີ່ໄທຈຶ່ງໄດ້ຄວບຄຸມຕົວແລະແຈ້ງຂໍ້ຫາມີຢາເສບຕິດໃຫ້ໂທດ (ຢາບ້າ) ໄວ້ໃນຄອບຄອງເພື່ອຈຳໜ່າຍ ແລະນຳເຂົ້າຢາເສບຕິດໃຫ້ໂທດ (ຢາບ້າ) ເຂົ້າໄປໃນອານາຈັກໄທ.