ການສະເຫຼີມສະຫຼອງສົ່ງທ້າຍປີເກົ່າ ພສ 2556 ແລະ ຕ້ອນຮັບປີໃໝ່ລາວ ພສ 2557 ຫຼື ຄສ 2014 ນີ້ ຈະໄດ້ຈັດຂຶ້ນເປັນເວລາ 3 ວັນ ລະຫວ່າງວັນທີ 14-16 ເມສາ ຊຶ່ງການກະກຽມໃຫ້ແກ່ການສະເຫຼີມສະຫຼອງ ບຸນປີໃໝ່ລາວປີນີ້ ນະຄອນຫຼວງວຽງຈັນ ກໍ່ໄດ້ມີການຫ້າງຫາກະກຽມຄວາມພ້ອມຫຼາຍດ້ານ ບໍ່ວ່າຈະເປັນວຽກງານຄວາມສະຫງົບ ຄວາມເປັນລະບຽບຮຽບຮ້ອຍ ແລະ ອື່ນໆທີ່ກ່ຽວພັນກັບກິດຈະກຳໃນງານບຸນປີໃໝ່ ໂດຍສະເພາະ ກໍ່ແມ່ນມາຮອດປັດຈຸບັນ ໄດ້ສຳເລັດການຄັດເລືອກນາງສັງຂານ ຈຳນວນ 7 ນ້ອງນາງສາວ.
ການສະເຫຼີມສະຫຼອງບຸນປີໃໝ່ລາວ ແຕ່ລະປີແມ່ນມີຄວາມຟົດຟື້ນ ທັງເສີມຂະຫຍາຍໄດ້ມູນເຊື້ອວັດທະນະທຳ ຮີດຄອງປະເພນີອັນດີງາມຂອງຊາດລາວເຮົາ ທີ່ສືບທອດກັນມາແຕ່ບູຮານນະການ ຊຶ່ງຕະຫຼອດໄລຍະ 3 ວັນຂອງການສະເຫຼີມສະຫຼອງບຸນປີໃໝ່ລາວ ທີ່ເປັນບຸນປະເພນີສືບທອດກັນມາຫຼາຍເຊັ່ນຄົນ ຊາວລາວບັນດາເຜົ່າທົ່ວປະເທດ ໄດ້ພ້ອມພາກັນລະຫຼີ້ນດ້ວຍຄວາມເບີກບານມ່ວນຊື່ນ ມີການໄປທ່ຽວຫຼີ້ນຕາມສະຖານທີ່ທ່ອງທ່ຽວແຫ່ງຕ່າງໆ ເຂົ້າວັດເຂົ້າວາເພື່ອສົງພຣະຫົດສົງ ແລະ ຢູ່ຕາມສະຖານທີ່ເຮືອນຊານ ກໍ່ໄດ້ມີການບາສີສູ່ຂວັນດ້ວຍຜູກຂໍ່ຕໍ່ແຂນ ແລະ ຫົດນ້ຳດ້ວຍນ້ຳອົບນ້ຳຫອມໃຫ້ຜູ້ເຖົ້າຜູ້ແກ່ ຜູ້ອາວຸໂສ ຜູ້ມີພະຄຸນໃຫ້ພໍ່ໃຫ້ແມ່ ແລະ ໃຫ້ກັນ ແລະ ກັນ ຕາມປະເພນີ ເພື່ອເປັນການອວຍພອນສິ່ງທີ່ບໍ່ດີ ສິ່ງທີ່ບໍ່ຈົບບໍ່ງາມໃຫ້ໄປນຳປີເກົ່າ ແລະ ປີໃໝ່ໃຫ້ມີແຕ່ໂຊກແຕ່ໄຊໄຫຼເຂົ້າມາ ມີສຸຂະພາບແຂງແຮງ ອາຍຸຍືນຍາວ ແລະ ມີໜ້າທີ່ການງານຈະເລີນກ້າວໜ້າໄປເລື້ອຍໆ.
ແຕ່ວ່າການລະຫຼີ້ນບຸນປີໃໝ່ ພສ 2557 ນີ້ ຢາກໃຫ້ທຸກຄົນຈົ່ງພ້ອມກັນມ່ວນຊື່ນ ແລະ ຮັກສາໄດ້ຮີດຄອງປະເພນີອັນດີງາມ ໂດຍສະເພາະແມ່ນຮີດຄອງປະເພນີທາງດ້ານວັດທະນະທຳການນຸ່ງຖືຂອງຍິງ ແລະ ຊາຍ ຊຶ່ງຜ່ານມາຍັງພົບເຫັນມີບາງຄົນ ຍັງເຮັດບໍ່ທັນໄດ້ເທົ່າທີ່ຄວນໃນການນຸ່ງຖືເຂົ້າວັດເຂົ້າວາ ເປັນຕົ້ນ ຜູ້ຊາຍບາງຄົນຍັງນຸ່ງໂສ້ງຂາສັ້ນ ແລະ ນຸ່ງເສື້ອກ້າມເຂົ້າວັດ ແລະ ຜູ້ຍິງບາງຄົນກໍ່ຍັງນຸ່ງໂສ້ງຂາຍາວ-ຂາສັ້ນ ນຸ່ງກະໂປ່ງ ແລະ ນຸ່ງເສື້ອແຂວນກິດແບບເປີດແປນຕົນຕົວຈົນເກີນໄປ ຊຶ່ງຕາມປະເພນີອັນດີງາມຂອງລາວເຮົາແລ້ວ ການເຂົ້າໄປຫົດພຣະຫົດສົງຢູ່ຕາມສະຖານທີ່ວັດວາອາຮາມ ແລະ ຕາມສະຖານທີ່ຕ່າງໆນັ້ນ ກໍ່ຕ້ອງນຸ່ງຖືແບບສຸພາບຮຽບຮ້ອຍ ຜູ້ຊາຍກໍ່ຕ້ອງນຸ່ງໂສ້ງຂາຍາວ ແລະ ເສື້ອສຸພາບ ສ່ວນຜູ້ຍິງເຮົາກໍ່ຕ້ອງນຸ່ງສິ້ນ ແລະ ນຸ່ງເສື້ອສຸພາບຮຽບຮ້ອຍເຊັ່ນດຽວກັນ ທັງນີ້ກໍ່ເພື່ອເປັນການຮັກສາໄດ້ ວັດທະນະທຳອັນດີງາມຂອງການນຸ່ງຖືແມ່ຍິງລາວເຮົາ ເພື່ອໃຫ້ນັກທ່ອງທ່ຽວກໍ່ຄືຊາວຕ່າງປະເທດທີ່ເຂົ້າມາ ສປປ ລາວ ເຮົາແລ້ວ ໃຫ້ໄດ້ເຫັນວັດທະນະທຳການນຸ່ງຖືຂອງຄົນລາວ ແລະ ໄດ້ຮັບການຍ້ອງຍໍຈາກເຂົາເຈົ້າວ່າ ຄົນລາວຍັງສາມາດຮັກສາໄດ້ຮີດຄອງປະເພນີອັນງາມຂອງການນຸ່ງຖື.
ທີ່ມາ http://www.vientianemai.net/teen/khao/1/11495