ລັດວິສາຫະກິດການບິນລາວສາຍການບິນແຫ່ງຊາດ ໄດ້ຮັບໃບຢັ້ງຢືນມາດຕະຖານຄວາມປອດໄພ (IOSA) ຈາກສະມາຄົມການຂົນສົ່ງທາງອາກາດສາກົນ ອັນຈະປະກອບສ່ວນເປັນຕົວເສີມທີ່ສຳຄັນສ້າງຄວາມເຊື່ອໝັ້ນ ແລະຄວາມໄວ້ວາງໃຈໃຫ້ກັບລູກຄ້າກໍຄື ຜູ້ໂດຍສານໃຫ້ມາໃຊ້ບໍລິການນັບມື້ນັບຫຼາຍຂຶ້ນໃນອະນາຄົດ ໂດຍຂະນະນີ້ການບິນລາວມີເຮືອບິນທັງໝົດ 11 ລຳໄວ້ຮອງຮັບລູກຄ້າມາໃຊ້ບໍລິການບິນໄປ 6 ສະໜາມບິນພາຍໃນ ແລະ 15 ເສັ້ນບິນຕ່າງປະເທດ.
ການໄດ້ຮັບໃບຢັ້ງຢືນດັ່ງກ່າວໄດ້ຈັດຂຶ້ນຢ່າງເປັນທາງການໃນບ່າຍວັນທີ 4 ກຸມພາ 2016 ທີ່ລັດວິສາຫະກິດການບິນລາວ ນະຄອນຫຼວງວຽງຈັນ ໂດຍເປັນກຽດເຂົ້າຮ່ວມຂອງ ທ່ານ ດຣ. ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະຂົນສົ່ງ, ທ່ານ ດຣ. ສົມພອນ ດວງດາລາ ຜູ້ອຳນວຍການໃຫຍ່ລັດວິສາຫະກິດການບິນລາວ ພ້ອມນີ້ກໍມີຄະນະສາມາຄົມການບິນສາກົນ ແລະພະນັກງານ ຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.
ຕາມຂໍ້ມູນຈາກລັດວິສາຫະກິດການບິນລາວ ລະບຸວ່າ: ຜົນສຳເລັດດັ່ງກ່າວ ຈະຊ່ວຍເຮັດໃຫ້ການບິນລາວສາມາດບໍລິຫານຈັດການລະບົບມາດຕະຄວາມປອດໄພໃນການໃຫ້ບໍລິການ, ການກວດກາທີ່ດີ ແລະມີປະສິດທິພາບຄຽງຄູ່ກັບການຈະເລີນເຕີບໂຕທາງທຸລະກິດ ສຳລັບໃບຢັ້ງຢືນມາດຕະຖານຄວາມປອດໄພຈາກສະມາຄົມການຂົນສົ່ງທາງອາກາດສາກົນແມ່ນເປັນທີ່ຮັບຮູ້ໃນລະດັບສາກົນ ແລະການບິນລາວໄດ້ໃຫ້ສັດຕະຍາບັນ ຈະສືບຕໍ່ດຳເນີນທຸລະກິດການບິນຮັບໃຊ້ຜູ້ໂດຍສານດ້ວຍຄວາມຖືກຕ້ອງ, ປອດໄພ ແລະສາມາດໃຫ້ຄວາມໄວ້ວາງ ໃຈໄດ້ພາຍໃຕ້ລະບຽບຂອງ IOSA ຢ່າງເຄັ່ງຄັດ.
ທ່ານ ດຣ. ສົມພອນ ດວງດາລາ ກ່າວວ່າ: ການໄດ້ຮັບໃບຢັ້ງຢືນເທື່ອນີ້ໄດ້ສະແດງເຖິງຜົນສຳເລັດພົ້ນເດັ່ນທາງດ້ານຄວາມປອດໄພຂອງການບິນລາວ ຊຶ່ງຈະສ້າງຄວາມເຊື່ອໝັ້ນ ແລະຄວາມໄວ້ວາງໃຈໃຫ້ກັບລູກຄ້າກໍຄືຜູ້ໂດຍສານທີ່ມາໃຊ້ບໍລິການ ໂດຍໃນປະຈຸບັນລັດວິສາຫະກິດການບິນລາວນຳໃຊ້ເຮືອບິນແອບັສ A320-214 ຈຳນວນ 4 ລຳ ແລະ ເຮືອບິນຊະນິດອາເຕແອ້ ATR 72-500 ແລະ600 ຈຳນວນ 7 ລຳ ຊຶ່ງມີເສັ້ນບິນ ພາຍໃນປະເທດບິນໄປ 6 ສະໜາມບິນ ແລະເສັ້ນບິນຕ່າງປະເທດ 15 ສະໜາມບິນໃນຂົງເຂດອາຊີ.
ຂະນະທີ່ ໃນຕໍ່ໜ້າການບິນລາວຍັງມີແຜນທີ່ຈະເພີ່ມເສັ້ນບິນທັງພາຍໃນ ແລະ ຕ່າງປະເທດຕື່ມອີກ.
ທີ່ມາ: