ຂົວ​ມິດຕະພາບ​ລາວ-ໄທ 1 ເປັນ​ຂົວ​ຂ້າມ​ນ້ຳຂອງ​ແຫ່ງ​ທຳ​ອິດ​ລະຫວ່າງ ​ສປປ ລາວ ກັບ​ຣາ​ຊະ​ອານາຈັກ​ໄທ ໄດ້​ມີ​ທີ່​ຕັ້ງ​ຢູ່​ນະຄອນຫຼວງ​ວຽງ​ຈັນ​ກັບ​ແຂວງ​ໜອງ​ຄາຍ ຊຶ່ງ​ຂົວ​ແຫ່ງ​ດັ່ງກ່າວ​ນີ້ ໄດ້​ຮັບ​ການ​ຊ່ວຍເຫຼືອ​ລ້າ​ຈາກ​ລັດຖະບານ​ປະເທດ​ອົດ​ສະ​ຕາ​ລີ ແລະ ໄດ້​ເປີດ​ນຳ​ໃຊ້​ຢ່າງ​ເປັນ​ທາງ​ການ ໃນ​ວັນ​ທີ 8 ເມສາ 1994 ເປັນຕົ້ນ​ມາ ມາ​ຮອດ​ວັນ​ທີ 8 ເມສາ 2014 ທີ່​ຈະ​ມາ​ເຖິງ​ນີ້ ກໍ່​ພໍດີ​ຄົບຮອບ 20 ປີ ຊຶ່ງ​ຂົວ​ດັ່ງກ່າວ​ພາຍຫຼັງ​ເປີດ​ນຳ​ໃຊ້ ໄດ້​ສ້າງ​ຜົນ​ປະໂຫຍດ​ຫຼວງຫຼາຍ​ສົມຄວນ ໃຫ້​ແກ່​ສອງ​ປະເທດ​ລາວ-ໄທ ໂດຍ​ສະເພາະ ​ສປປ ລາວ ເຮົາ ຈະ​ມີ​ຜົນ​ປະໂຫຍດ​ດ້ານ​ການເມືອງ ດ້ານ​ເສດຖະກິດ ແລະ ດ້ານ​ວັດທະນະທຳ-ສັງຄົມ ເປັນຕົ້ນ​ກໍ່​ແມ່ນ​ການ​ສ້າງ​ລາຍ​ຮັບ​ໃຫ້​ແກ່​ປະເທດ​ຊາດ ປີ​ໜຶ່ງ​ບໍ່​ຕ່ຳ​ກວ່າ 1.000 ຕື້​ກີບ​ຂຶ້ນ​ໄປ.

ທ່ານ ສົມບູນ ສຸວັນນະ​ຈູມ​ຄຳ ຫົວໜ້າ​ດ່ານ​ສາກົນ​ຂົວ​ມິດຕະພາບ​ລາວ-ໄທ 1 ໄດ້​ກ່າວ​ວ່າ: ກ່ອນ​ບໍ່​ທັນ​ສ້າງຕັ້ງ​ຂົວ​ມິດຕະພາບ​ລາວ-ໄທ 1 ຂຶ້ນ​ມາ​ນັ້ນ ການ​ພົວພັນ​ລະຫວ່າງ​ນະຄອນຫຼວງ​ວຽງ​ຈັນ ແລະ ແຂວງ​ໜອງ​ຄາຍ ໃນ​ການ​ໄປມາຫາສູ່​ແມ່ນ​ໃຊ້​ເຮືອ​ບັກ​ຂ້າມ​ໄປ-ຂ້າມ​ມາ ເຮັດ​ໃຫ້​ມີ​ຄວາມ​ຫຍຸ້ງຍາກ ຊັກ​ຊ້າ ບໍ່​ທັນ​ກັບ​ສະພາບ ສະນັ້ນ ຫຼັງ​ຈາກ​ທີ່​ມີ​ການ​ສ້າງຕັ້ງ​ຂົວ​ຂຶ້ນ​ມາ​ໃນ​ວັນ​ທີ 8 ເມສາ 1994 ກໍ່​ເຫັນ​ວ່າການ​ພົວພັນ ແລະ ການ​ຄ້າຂາຍ​ຕ່າງໆ​ໄດ້​ມີ​ການ​ເພີ່ມ​ທະວີ​ຂຶ້ນ ໂດຍ​ສະເພາະ​ການ​ພົວພັນ​ອັນ​ທີ​ໜຶ່ງ​ທີ່​ພວກ​ເຮົາ​ໄດ້​ແມ່ນ ທາງ​ດ້ານ​ການເມືອງ ເຮັດ​ໃຫ້​ສັງຄົມ​ໂລກ​ກໍ່​ຄື​ພາກ​ພື້ນ​ຮັບ​ຮູ້ ​ສປປ ລາວ ຫຼາຍ​ຂຶ້ນ ອັນ​ທີ​ສອງ​ໄດ້​ທາງ​ດ້ານ​ເສດຖະກິດ​ພວກ​ເຮົາ ມີ​ການ​ພົວພັນ​ການ​ຄ້າຂາຍ​ຕາມ​ຊາຍ​ແດນ​ຂອງ​ສອງ​ປະເທດ​ເພີ່ມ​ຂຶ້ນ ມີ​ພາຫະນະ​ຂ້າມ​ໄປ-ຂ້າມ​ມາ​ຜ່ານ​ຂົວ​ແຫ່ງ​ນີ້​ເປັນ​ຈຳນວນ​ຫຼວງຫຼາຍ ບໍ່​ຕ່ຳ​ກວ່າ 10 ພັນ​ຄັນ​ຕໍ່​ອາທິດ ແລະ ອັນ​ທີ​ສາມ​ແມ່ນ​ເຮົາ​ໄດ້​ທາງ​ດ້ານ​ວັດທະນະທຳ-ສັງຄົມ ມີ​ການ​ເພີ່ມ​ທະວີ​ການ​ແລກປ່ຽນ​ວັດທະນະທຳ​ນຳ​ກັນ ລະຫວ່າງ​ສອງ​ຝັ່ງ​ຂອງ ໂດຍ​ສະເພາະ​ລະຫວ່າງ​ນະຄອນຫຼວງ​ວຽງ​ຈັນ ແລະ ແຂວງ​ໜອງ​ຄາຍ ຈຳນວນ​ນັກ​ທ່ອງ​ທ່ຽວ​ເພີ່ມ​ຂຶ້ນ ກ່ອນ​ປີ 1994 ການ​ເຂົ້າ-ອອກ​ຂອງ​ນັກ​ທ່ອງ​ທ່ຽວ​ກໍ່​ບໍ່​ທັນ​ຫຼວງຫຼາຍ​ເທົ່າໃດ ແຕ່​ວ່າ​ມາ​ຮອດ​ປັດຈຸບັນ​ບໍ່​ຕ່ຳ​ກວ່າ 2-3 ລ້ານ​ກວ່າ​ຄົນ​ຕໍ່​ປີ ທີ່​ນັກ​ທ່ອງ​ທ່ຽວ​ເດີ່ນ​ທາງ​ເຂົ້າ-ອອກ​ຜ່ານ​ຂົວ ມີ​ຄົນ​ຂ້າມ​ໄປ-ຂ້າ​ມາ​ບໍ່​ຕ່ຳ​ກວ່າ 1 ແສນ​ຄົນ​ຕໍ່​ອາທິດ ນອກຈາກ​ນີ້ ຍັງ​ສ້າງ​ລາຍ​ຮັບ​ໃຫ້​ແກ່​ປະເທດ​ຊາດ​ຫຼາຍ​ທີ່​ສຸດ ຄື​ປີ 2014 ນີ້ ຂັ້ນ​ເທິງ​ໄດ້​ມອບ​ໃຫ້​ພາສີ ເກັບ​ລາຍ​ຮັບ​ຈາກ​ສິນຄ້າ​ຜ່ານ​ແດນ ໂດຍ​ຜ່ານ​ຂົວ​ແຫ່ງ​ນີ້​ເປັນ​ເງິນ​ເຖິງ 2.700 ກວ່າ​ຕື້​ກີບ ແລະ ການ​ເກັບ​ລາຍ​ຮັບ​ຂອງ​ແຕ່​ລະ​ປີ​ກໍ່​ເພີ່ມ​ຂຶ້ນ​ເລື້ອຍໆ.

ໂດຍ​ລວມ​ແລ້ວ ພາຍຫຼັງ​ສ້າງ​ຂົວ​ແຫ່ງ​ນີ້​ຂຶ້ນ​ມາ ສາມາດ​ສ້າງ​ຜົນ​ປະໂຫຍດ​ຫຼວງຫຼາຍ​ໃຫ້​ແກ່​ປະເທດ​ຊາດ ເປັນຕົ້ນ ການ​ໄປມາຫາສູ່ ການ​ຄ້າຂາຍ​ເພີ່ມ​ຂຶ້ນ ແລະ ອັນ​ໜຶ່ງ​ອີກ​ກ່ອນ​ທີ່​ບໍ່​ທັນ​ມີ ຂົວ​ເຮັດ​ໃຫ້​ບໍລິເວນ​ຂົວ​ບໍ່​ທັນ​ມີ​ຫຍັງ​ເກີດ​ຂຶ້ນ ເປົ່າແປນ ເຮັດ​ໃຫ້​ພາຍ​ໃນ​ດ່ານ​ກວ້າງຂວາງ ແຕ່​ພາຍຫຼັງ​ທີ່​ມີ​ການ​ສ້າງ​ຂົວ ອັນ​ອື່ນໆ​ກໍ່​ຕາມ​ມາ ເປັນຕົ້ນ​ແມ່ນ​ການ​ຄ້າ​ຕ່າງໆ​ເກີດ​ຂຶ້ນ ເຮັດ​ໃຫ້​ສະຖານທີ່​ພາຍ​ໃນ​ດ່ານ​ຄັບແຄບ​ລົງ ຍ້ອນ​ວ່າ​ປະລິ​ມານ​​ຂອງ​ຄົນ​ໄປ​ມາ ແລະ ລົດ​ເຂົ້າ-ອອກ​ເພີ່ມ​ຂຶ້ນ ສະນັ້ນ ມາ​ຮອດ​ປັດຈຸບັນ​ນີ້ ບັນດາ​ຫົວໜ່ວຍ​ທຸລະ​ກິດ​ຕ່າງໆ ແຕກ​ໜໍ່​ຂຶ້ນ​ຢູ່​ພາຍ​ໃນ​ດ່ານ​ມີ​ຮ້ານ​ຄ້າ​ປອດ​ພາສີ ແລະ ຮ້ານ​ຄ້າ​ບໍ່​ປອດ​ພາສີ​ທັງ​ໝົດ 80 ກວ່າ​ຮ້ານ ມີ 5 ບໍລິສັດ​ໄປ​ລົງທຶນ​ສ້າງ​ຮ້ານ​ຄ້າ​ປອດ​ພາສີ ເຮັດ​ໃຫ້ການ​ຄ້າ​ຊາຍ​ແດນ​ມີ​ຄວາມ​ຄືກ​ຄັກ​ຫຼາຍ ມີ​ການ​ຈັຍ​ຈ່າຍ​ຊື້-ຂາຍ​ຫຼາຍ​ຂຶ້ນ ເຮັດ​ໃຫ້ການ​ເກັບ​ລາຍ​ຮັບ​ຂອງ​ເມືອງ ຂອງ​ນະຄອນຫຼວງ ແລະ ຂອງ​ສູນ​ກາງ​ເພີ່ມ​ຂຶ້ນ​ແຕ່​ລະ​ປີ.

ທີ່ມາ  http://www.vientianemai.net/teen/khao/1/11498