ວັນທີ 2 ກຸມພາຜ່ານມາ ທີ່ເມືອງເຊບັ້ງໄຟ ແຂວງຄຳມ່ວນ ໄດ້ເປີດກອງປະຊຸມປຶກສາຫາລື ແລະລົງກວດກາ ສະກັດກັ້ນການຜະລິດຈຳໜ່າຍສິນຄ້າປະ ເພດແປ້ງນົວກາຈອງປອມ, ໂດຍການ ເປັນປະທານຂອງ ທ່ານ ນາງ ແຕງອ່ອນ ລິນສົມພູ ຮອງຫົວໜ້າພະແນກວິທະຍາສາດ ແລະເຕັກໂນໂລຊີແຂວງ ແລະ ທ່ານ ພອນແກ້ວ ໃສແສງບຸນ ຫົວໜ້າຫ້ອງວ່າການປົກຄອງເມືອງເຊບັ້ງໄຟ, ມີບັນດາຫ້ອງການທີ່ກ່ຽວຂ້ອງ ພ້ອມດ້ວຍ ທ່ານ ນາງ ດາວວຽງ ຕາງໜ້າບໍລິສັດແປ້ງນົວລາຊາຊູລົດກາຈອງກໍ່ໄດ້ເຂົ້າຮ່ວມໃນການກວດກາໃນຄັ້ງນີ້ດ້ວຍ.
ການລົງຄັ້ງນີ້ແມ່ນໄດ້ເຄື່ອນໄຫວກວດກາຕາມຫ້າງຮ້ານ ແມ່ຄ້າຊາວຂາຍໃຫ້ຖືກຕ້ອງຕາມລະບຽບການ ເພື່ອເປັນ ການບໍ່ເອົາປຽບຜູ້ບໍລິໂພກໃນອ້ອມຂ້າງເທສະບານເມືອງເຊບັ້ງໄຟ, ໃນຮ້ານຂາຍເຄືອງຍ່ອຍຈຳນວນ 17 ຮ້ານໃນຕອນ ແລງຂອງວັນດຽວກັນຍັງໄດ້ລົງກວດກາທີ່ຕະຫຼາດສຸກສົມບູນຫຼັກ 3 ຈຳນວນ 11 ຮ້ານ ສາມາດຢືດສິນຄ້າແປ້ງນົວກາຈອງປອມ 1 ຮ້ານ ຈຳນວນ 720 ຖົງ ຂະໜາດ 40 ກຣາມ ລວມມູນຄາ 7,2 ແສນກີບ.
ການລົງເຄື່ອນໄຫວຄັ້ງນີ້ ຖືວ່າແມ່ຄ້າຊາວຂາຍສ່ວນຫຼາຍແມ່ນໄດ້ໃຫ້ການຮ່ວມມືເປັນຢ່າງດີ ແລະເຂົ້າໃຈເຖິງວຽກງານນີ້ຫຼາຍຂຶ້ນ, ສິນຄ້າທີ່ຢຶດມາໄດ້ທັງໝົດແມ່ນໄດ້ເອົາມາເກັບຮັກສາໄວ້ທີ່ພະແນກວິທະຍາສາດ ແລະເຕັກໂນໂລຊີ ແຂວງຄຳມ່ວນ ເພື່ອເປັນຫຼັກຖານໃນການດຳເນີນຄະດີຕາມລະບຽບກົດໝາຍ.
