ເມືອງປາກງື່ມເລີ່ມປຸກລະດົມປະຊາຊົນປູກເຂົ້າແບບອຸດສາຫະກຳນຳໃຊ້ກົນຈັກຫັນຈາກນາໄຮ່ນ້ອຍເປັນນາໄຮ່ໃຫຍ່ ເພື່ອສ້າງປະສິດທິພາບໃນການຜະລິດ, ປະຢັດຕົ້ນທຶນ, ເວລາ ໂດຍຖືເອົາບໍລິສັດຄຳແພງເພັດແຈ້ງສະຫວ່າງສົ່ງເສີມການກະເສດຂາອອກ-ຂາເຂົ້າຈຳກັດ ຜູ້ດຽວ ເປັນຕົວແບບໃນການຜະລິດເພື່ອຂະຫຍາຍອອກໄປສູ່ປະຊາຊົນ, ຫຼ້າສຸດ ວັນທີ 4 ກຸມພານີ້ ກໍມີພີທີເປິດການສາທິດໃຫ້ປະຊາຊົນ 53 ບ້ານເບິ່ງເພື່ອນຳໄປຖອດຖອນບົດຮຽນ.
ເຂົ້າຮ່ວມໃນພິທີເປີດການສາທິດປູກເຂົ້າດ້ວຍເຄື່ອງຈັກຄັ້ງນີ້ ໂດຍທ່ານ ວົງເດືອນ ບຸນຍະແສງ ເຈົ້າເມືອງໆປາກງື່ມ, ທ່ານ ເກສອນ ເທບຄຳເຮືອງ ຮອງຫົວໜ້າພະແນກກະສິກຳປ່າໄມ້ ນະຄອນຫຼວງວຽງຈັນ, ທ່ານ ຄຳແພງ ແສງທະວີ ຜູ້ອຳນວຍການໃຫຍ່ບໍລິສັດຄຳແພງເພັດແຈ້ງສະຫວ່າງສົ່ງເສີມການກະເສດຂາອອກ-ຂາເຂົ້າ ຈຳກັດຜູ້ດຽວ, ພ້ອມດ້ວຍບັນດາພະນັກງານກ່ຽວຂອງເມືອງ, ນາຍບ້ານຕົວແທນປະຊາຊົນຈາກ 53 ບ້ານເຂົ້າ ຮ່ວມທີ່ນາເຂົ້າບໍລິສັດ ບ້ານນາຊອນ ເມືອງປາກງື່ມນະຄອນຫຼວງວຽງຈັນ.
ທ່ານ ຄຳແພງ ແສງທະວີ ກ່າວວ່າ: ບໍລິສັດຂອງພວກເຮົາເປັນບໍລິສັດທີ່ເຄື່ອນໄຫວດ້ານການຜະລິດກະສິ ກຳເປັນສິນຄ້າຄົບວົງຈອນ, ຜະລິດກະສິກຳຕິດພັນກັບອຸດສາຫະກຳໂດຍເລີ່ມຈາກການປູກຈົນຮອດການຈຳໜ່າຍ ອອກສູ່ທ້ອງຕະຫຼາດ, ປະຈຸບັນການປູກເຂົ້າບໍລິສັດໄດ້ປັບປຸງການຜະລິດແບບທັນສະໄໝນຳໃຊ້ເຄື່ອງຈັກທັງໝົດນັບ ແຕ່ການຕົກກ້າກໍແມ່ນເຄື່ອງຈັກ, ລົດໄຖນ້ອຍໃຫຍ່ກຽມດິນ, ລົດປັກດຳ, ລົດກ່ຽວເຂົ້າ, ຈັກຟາດ ແລະເອົາໄປຜ່ານໂຮງອົບເຂົ້າ, ໂຮງສີ, ໂຮງຄັດເມັດ, ໂຮງຂັດເມັດຂາວ, ໂຮງແພັກຫຸ້ມຫໍລົດຂົນສົ່ງ, ຈຳໜ່າຍຕາມຮ້ານວາງຂາຍໃນທົວປະເທດຄືເຂົ້າກາຕາເວັນ, ສະນັ້ນ ມື້ນີ້ສຸດທີ່ພາກພູມໃຈທີ່ໄດ້ທຳການສາທິດການປູກເຂົ້າແບບເຄື່ອງຈັກໃຫ້ພໍ່ແມ່ປະຊາຊົນຊາວເມືອງປາກງື່ມໄດ້ເຫັນ ເພື່ອສ້າງຂະບວນການຜະລິດໃຫ້ກວ້າງອອກ ແລະເປັນສິນຄ້ານັບມື້ເພີ່ມຂຶ້ນ ຊຶ່ງການເຮັດນາດ້ວຍເຄື່ອງຈັກນີ້ສາມາດຫຼຸດຜ່ອນຕົ້ນທຶນລົງເປັນເຄິ່ງທຽບກັບການໃຊ້ແຮງ ງານຄົນ ແລະເວລາປັກດຳກໍສັ້ນລົງລົດດຳເຮັກຕາໜຶ່ງໃຊ້ເວລາພຽງ 1 ຊົ່ວໂມງ.
ທ່ານ ວົງເດືອນ ບຸນຍະແສງ ກ່າວວ່າ: ດ້ວຍແນວຄິດລິເລີ່ມແລະຄວາມມຸ່ງໝັ້ນຂອງບໍລິສັດຄຳແພງເພັດແຈ້ງສະຫວ່າງສົ່ງເສີມການກະເສດຂາອອກ-ຂາເຂົ້າຈຳກັດ ທີ່ມັກຮັກໃນການຜະລິດກະສິກຳ ແລະວິວັດທະນາການທີ່ດີດ້ວຍການຕັ້ງຟາມຢູ່ເມືອງປາກງື່ມ ແລະປະ ຕິຮູບໄຮ່ນານ້ອຍເປັນໄຮນາໃຫຍ່ກ້າວ ໄປສູ່ການນຳໃຊ້ກົນຈັກທັນສະໄໝເຂົ້າໃນການປັກການດຳການເກັບກ່ຽວ ນອກຈາກນີ້ ກໍໄດ້ເຮັດຟາມໝູ, ຟາມໄກ່, ໜອງປາ ແລະອື່ນ ຊຶ່ງຖືວ່າເປັນແບບຢ່າງທີ່ດີໃນການຜະລິດເປັນສິນຄ້າຂອງເມືອງ ແລະເທື່ອນີ້ທາງເມືອງກໍໄດ້ເຊື້ອເຊີນອຳ ນາດການປົກຄອງ 53 ບ້ານມາເຕົ້າໂຮມຖອດຖອນບົດຮຽນ, ເບິ່ງວິວັດທະນາການຜະລິດໃນເງື່ອນໄຂໃຫມ່ເພື່ອຕອບສະໜອງນະໂຍບາຍຂອງພັກລັດຖະບານ ແລະບຸກທະລຸທາງດ້ານແນວຄິດດ້ານຈິນນະນາການ, ຜ່ານມາພວກເຮົາເຄີຍທຳການຜະລິດແບບປະຖົມປະຖານແບບກຸ້ມຕົນເອງ ແຕ່ຍັງບໍ່ທັນເປັນສິນຄ້າ.
ມາຮອດດຽວນີ້ໃນເງື່ອນໄຂໃໝ່ກໍ ຕ້ອງໄດ້ຍົກສະມັດະພາບການຜະລິດ ເພື່ອຕອບສະໜອງຄວາມຮຽກຮ້ອງ ຕ້ອງການຂອງສັງຄົມ, ຄວາມຕ້ອງການບໍລິໂພກກໍ່ສູງຂຶ້ນ ສະນັ້ນພວກເຮົາຕ້ອງປະຕິຮູບແບບວິທີການຜະລິດຈາກການນຳໃຊ້ການຜະລິດແບບປະຖົມປະຖານໃນເມື່ອກ່ອນໃຫ້ຫັນມາໃຊ້ເຄື່ອງຈັກເຄື່ອງຈັກສາມາດເຮັດໄດ້ຫຼາຍວັນງານສັ້ນລົງຕົ້ນທຶນຕ່ຳລົງ, ຜົນຜະລິດໄດ້ຫຼາຍ ແນວໃດກໍຕາມ ການມາຊົມການສາທິດນີ້ກໍຝາກຄວາມຫວັງໃຫ້ປະຊາຊົນແຕ່ລະບ້ານນຳໄປຜັນຂະຫຍາຍບ່ອນໃດມີເງື່ອນໄຂແມ່ນໃຫ້ນຳພາປະຊາຊົນເຮັດ.
ທີ່ມາ: