ຕາມການໃຫ້ຮູ້ຂອງຕຳຫຼວດມຸກດາຫານປະເທດໄທໃນວັນທີ 2 ກຸມພາ ຜ່ານມານີ້ວ່າ: ສາມາດຈັບຄົນລາວຊື່ວ່ານາງ ຕັອກ ບ້ານດົງນາຄອຍ ເມືອງຈຳພອນ ແຂວງສະຫວັນນະເຂດ ຊຶ່ງຜູ້ກ່ຽວຮັບຈ້າງສົ່ງຢາບ້າໂດຍຈຸດໝາຍໄປສົ່ງແມ່ນຈັງຫວັດຂອນແກ່ນ ພາຍຫຼັງທີ່ສົ່ງເຖິງຈຸດໝາຍປາຍທາງແລ້ວຈະໄດ້ຮັບຄ່າຕອບແທນ ຫຼື ຄ່າຈ້າງ 7 ແສນກວ່າກີບ ໂດຍຢາບ້າທີ່ຈະນຳໄປສົ່ງໃນຄັ້ງນີ້ມີທັງໝົດ 6 ມັດ ຫຼື ປະມານ 11.700 ກວ່າເມັດ.
ຜ່ານການໃຫ້ຂໍ້ມູນເບື້ອງຕົ້ນຜູ້ກ່ຽວມີອາຍຸ 33 ປີ, ອາຊີບເຮັດນາ ໂດຍຮັບຈ້າງສົ່ງຢາບ້າໃນລາຄາ 7 ແສນກວ່າ ກີບ, ຢາບ້າຈຳນວນນີ້ແມ່ນໄດ້ຮັບມາຈາກຊາຍຄົນໜຶ່ງບໍ່ຮູ້ຊື່ ນາມສະກຸນ ແລະ ບໍ່ຮູ້ບ້ານໄດ້ບອກໃຫ້ຕົນເອງນຳຢາບ້າໄປສົ່ງທີ່ຈັງຫວັດຂອນແກ່ນປະເທດໄທ ພາຍຫຼັງທີ່ໄປສົ່ງຮອດຈຸດນັດໝາຍແລ້ວກໍ່ຈະມີຄົນມາຮັບເອົາຢາໄປອີກເທື່ອໜຶ່ງແຕ່ກໍ່ຖືກຈັບສາກ່ອນ.
ຂ່າວແຈ້ງຕື່ມວ່າ: ການຈັບນາງ ຕັອກ ໄດ້ໃນຄັ້ງນີ້ແມ່ນສືບເນື່ອງຈາກມີພົນລະເມືອງດີລາຍງານວ່າຈະມີຜູ້ຍິງຄົນລາວນຳຢາບ້າຂ້າມໄປຈັງຫວັດມຸກດາຫານໂດຍທາງເຮືອ ຫຼັງຈາກນັ້ນພາກສ່ວນກ່ຽວຂ້ອງກໍໄດ້ປະສານສົມທົບກັບຊຸດກວດຄົນເຂົ້າເມືອງ ແລະກໍໄດ້ພົບເຫັນຜູ້ຍິງຄົນລາວສະແດງພຶດຕິກຳມີພີລຸດຈຶ່ງໄດ້ໃຫ້ຄົນຕິດຕາມຈົນຮູ້ໄດ້ວ່າຜູ້ຍິງຄົນດັ່ງກ່າວພວມຊິໄປສະຖານີຄິວລາດໂດຍສານ ໂດຍການຂຶ້ນສາມລໍ້ອອກໄປ, ເວລາພວມຂີ່ສາມລໍ້ເດີນທາງອອກໄປນັ້ນຕຳຫຼວດກໍໄດ້ສະແດງໂຕຂໍກວດຄົ້ນແລ້ວກໍໄດ້ພົບຢາບ້າທັງໝົດ 6 ມັດຢູ່ໃນກະເປົ໋າສີດຳຂອງນາງ ຕັອກ.
ທີ່ມາ: