ອຸດົມໄຊຖືເປັນອີກແຂວງໜຶ່ງທີ່ໄດ້ປະເຊີນກັບສະພາບອາກາດໜາວເຢັນໃນໄລຍະທ້າຍເດືອນມັງກອນຜ່ານມານີ້ ຊຶ່ງຕໍ່ກັບສະພາບດັ່ງກ່າວ ໄດ້ເຮັດໃຫ້ຊາວກະສິກອນຜູ້ລ້ຽງປາໄດ້ຮັບຜົນກະທົບຢ່າງໜັກໜ່ວງ, ເນື່ອງຈາກໄດ້ເຮັດໃຫ້ເກີດມີປາລ້ຽງຂອງປະຊາຊົນ ຕາຍຈຳນວນຫຼາຍໂຕນ.
ທ່ານ ສົມແພງ ລໍປະ ເສີດ ຜູ້ປະກອບການທາງດ້ານການລ້ຽງປາ ໄດ້ກ່າວໃຫ້ຮູ້ຫວ່າງບໍ່ດົນມານີ້ວ່າ: ຕົນເອງໄດ້ປະກອບການທາງດ້ານການລ້ຽງປາມາຕັ້ງແຕ່ປີ 2008 ກໍບໍ່ເຄີຍປະສົບເຫດການປາຕາຍຈັກເທື່ອ ຊຶ່ງຄັ້ງນີ້ເປັນຄັ້ງປະຫວັດສາດທີ່ເກີດມີປາຕາຍເປັນຈຳນວນຫຼວງຫຼາຍ ເນື່ອງຈາກສະພາບອາກາດທີ່ໜາວເຢັນໃນທ້າຍເດືອນມັງກອນ ມາຮອດປະຈຸ ບັນສົ່ງຜົນກະທົບເຮັດໃຫ້ປາທີ່ລ້ຽງໃນຈຳນວນທັງໝົດ 30 ໂຕນທົນຕໍ່ກັບສະພາບອາກາດໜາວບໍ່ໄດ້ຕາຍກາຍເຄິ່ງສະເລ່ຍຜົນເສຍຫາຍທັງໝົດປະມານ 30 ລ້ານກວ່າກີບ.
ທ່ານ ນາງ ຄິ້ງ ສົມສີ ກໍເປັນອີກຜູ້ໜຶ່ງທີ່ລ້ຽງປາໂດຍໃຫ້ຮູ້ວ່າ: ໄດ້ຮັບຜົນກະທົບຈາກສະພາບອາກາດທີ່ໜາວເຢັນເຊັ່ນດຽວກັນເຮັດໃຫ້ປາທີ່ລ້ຽງຕາຍມາຮອດປະຈຸບັນປະມານ 6 ໂຕນ, ຕໍ່ກັບສະພາບທີ່ເກີດຂຶ້ນໃນຄັ້ງນີ້ດ້ານວິຊາການຈາກຂະແໜງລ້ຽງສັດ ແລະການປະມົງ ແຂວງອຸດົມໄຊ ກໍໄດ້ລົງໄປກວດກາເບິ່ງສະຖານທີ່ເກັບກຳຂໍ້ມູນເພື່ອສົ່ງໄປວິໄຈຊອກຫາສາເຫດທີ່ແທ້ຈິງ ຊຶ່ງໃນເບື້ອງຕົ້ນໄດ້ໃຫ້ຮູ້ວ່າ: ສາເຫດຫຼັກທີ່ພາໃຫ້ປາຕາຍໃນຄັ້ງນີ້ແມ່ນຍ້ອນສະພາບອາກາດທີ່ໜາວເຢັນເຮັດໃຫ້ປາບໍ່ສາມາດທົນທານກັບຄວາມໜາວເຢັນນັ້ນໄດ້ ໂດຍສະເພາະແມ່ນປານິນ.
ແຫຼ່ງຂ່າວຍັງໃຫ້ຮູ້ອີກວ່າຜູ້ປະກອບການລ້ຽງປາໃນຫຼາຍໆບ່ອນກໍໄດ້ຮັບຜົນກະທົບເຊັ່ນດຽວກັນ.
ທີ່ມາ: