ສຳນັກຂ່າວຕ່າງປະເທດ ລາຍງານໃນວັນທີ 1 ກຸມພາຜ່ານມານີ້ວ່າ ກະຊວງປ້ອງກັນປະເທດຣັດເຊຍ ໄດ້ອອກຖະແຫລງການ ຕອບໂຕ້ລັດຖະບານຕວກກີ ທີ່ໄດ້ອອກມາອ້າງເມື່ອທ້າຍອາທິດຜ່ານມາວ່າ ເຮືອບິນສູ້ຮົບ Su-34 ຂອງຣັດເຊຍ ບຸນລ່ວງລ້ຳນ່ານຟ້າຕວກກີ ໂດຍລະບຸວ່າ ເປັນຂໍ້ກ່າວຫາທີ່ບໍ່ມີມູນຄວາມຈິງຢັ້ງຢືນ ແລະ ເປັນການຕັ້ງໃຈຍຸແຍ່ສ້າງສະຖານະການ.
ທ່ານ ໄອເກີ ໂຄນາເຊນຄອບ ໂຄສົກກະຊວງປ້ອງກັນປະເທດຣັດເຊຍ ໄດ້ລະບຸໃນຖະແຫລງການວ່າ ” ຂໍ້ກ່າວຫາຂອງຕວກກີ ຊຶ່ງພວກເຮົາເອີ້ນວ່າເປັນການໂຄສະນາຊວນເຊື່ອ ທີ່ບໍ່ມີຂໍ້ພິສູດ ມີຄວາມເປັນໄປໄດ້ຫລາຍກ່ວາວ່າ ເປັນການຍຸແຍ່ສ້າງສະຖານະການ ໂດຍມີການຄົ້ນຄິດວາງແຜນເອົາໄວ້ກ່ອນ ” ພ້ອມນັ້ນ ຖະແຫລງການຍັງລະບຸອີກວ່າ ປັດຈຸບັນຣັດເຊຍມີຄລິບວີດີໂອ ທີ່ສະແດງໃຫ້ເຫັນເຖິງ ປືນໃຫຍ່ຂອງຕວກກີ ໄດ້ຍິງຖະຫລົ່ມໃສ່ເຂດຊຸມຊົນ ພື້ນທີ່ແນວໜ້າຂອງປະເທດຊີຣີ ຊຶ່ງຣັດເຊຍເອງ ກຳລັງລໍຖ້າຄຳອະທິບາຍໃນເລື່ອງດັ່ງກ່າວ ຈາກທັງນາໂຕ້ ແລະ ກອງທັບຕວກກີເອງ.
ກ່ອນໜ້ານີ້ພຽງ 2 ເດືອນ ຕວກກີເຄີຍສົ່ງເຮືອບິນສູ້ຮົບ F-16 ຍິງເຮືອບິນ Su-24 ຂອງຣັດເຊຍຕົກ ດ້ວຍຂໍ້ກ່າວຫາດຽວກັນວ່າ ເຮືອບິນຣັດເຊຍລ່ວງລ້ຳນ່ານຟ້າ ເມື່ອວັນທີ 24 ພະຈິກ 2015 ຜ່ານມາ ຊຶ່ງເປັນເຫດເຮັດໃຫ້ ມີນັກບິນເສຍຊີວິດ 1 ຄົນ ແລະ ທະຫານເຮືອຣັດເຊຍ ເສຍຊີວິດລະຫວ່າງຄົ້ນຫານັກບິນອີກ 1 ຄົນ.
ຈາກເຫດການຄັ້ງດັ່ງກ່າວ ໄດ້ເຮັດໃຫ້ຄວາມສຳພັນລະຫວ່າງຕວກກີ ແລະ ຣັດເຊຍ ຕົກຕ່ຳສຸດຂີດ ໂດຍຝ່າຍຣັດເຊຍໄດ້ຢືນຢັນວ່າ ເຮືອບິນ Su-24 ຂອງຕົນ ບິນຢູ່ໃນນ່ານຟ້າຂອງຊີຣີ ແລະ ໄດ້ອອກມາດຕະການຂວ້ຳບາດທາງເສດຖະກິດ ຕໍ່ປະເທດຕວກກີຫລາຍຢ່າງເຊັ່ນ ຫ້າມນຳເຂົ້າສິນຄ້າບາງຢ່າງ, ຈຳກັດການບິນລະຫວ່າງ 2 ປະເທດ, ຫ້າມບໍລິສັດຕວກກີບາງແຫ່ງ ເຮັດທຸລະກິດໃນຣັດເຊຍ ແລະ ລະງົບໂຄງການກໍ່ສ້າງທໍ່ສົ່ງແກັສລະຫວ່າງ 2 ປະເທດ.