ວັນທີ 1-4 ກຸມພາ 2016 ທີ່ໂຮງແຮມດອນຈັນພາເລດ ໄດ້ມີກອງປະຊຸມຄະນະສະເພາະກິດ ຄົ້ນຄວ້າສາລະບານສິນຄ້າລະບົບເອກະພາບອາຊຽນ ຄັ້ງທີ 9 ເປັນປະທານຂອງທ່ານ ຄຳປຸ່ນ ອິນແປງລາສະບຸດ ຫົວໜ້າພະແນກຮ່ວມມືພາສີສາກົນ ກະຊວງການເງິນ ມີບັນດາຜູ້ຊ່ຽວຊານດ້ານຈັດລະຫັດພາສີ ຂອງບັນດາປະເທດສະມາຊິກອາຊຽນ ລວມທັງໝົດ 42 ທ່ານເຂົ້າຮ່ວມ.
ກອງປະຊຸມຄັ້ງນີ້ ໄດ້ຈັດຂຶ້ນເພື່ອຄົ້ນຄວ້າບັນຫາທີ່ຄົງຄ້າງ ຈາກກອງປະຊຸມຄັ້ງກ່ອນ ໃນການໂອນຖ່າຍສາລະບານລະບົບເອກະພາບອາຊຽນລຸ້ນປີ 2012 ໄປເປັນລຸ້ນປີ 2017 ໂດຍຮັບປະກັນໃຫ້ສອດຄ່ອງກັບສາລະບານ ສິນຄ້າລະບົບເອກະພາບຂອງອົງການພາສີໂລກ ນອກນັ້ນ ກອງປະຊຸມຍັງມີເປົ້າໝາຍຄົ້ນຄວ້າ ໃນການໂຮມເອົາບັນດາລາຍການສິນຄ້າທີ່ມີບໍລິມາດການຄ້າຕ່ຳເຂົ້າກັນ ສ້າງເລກລະຫັດຍ່ອຍສຳລັບສິນຄ້າທີ່ເກີດຂຶ້ນໃໝ່ ແລະ ມີມູນຄ່າສູງທາງດ້ານການຄ້າ ເພື່ອເປັນການປົກປັກ ແລະ ສົ່ງເສີມພາກອຸດສະຫະກຳພາຍໃນປະເທດໃຫ້ມີຄວາມເຂັ້ມແຂງ.
ກອງປະຊຸມຄາດວ່າຈະສາມາດເປັນເອກະພາບກັນໃນທຸກໆບັນຫາ ພາຍໃນກອງປະຊຸມ ຄັ້ງທີ 9 ນີ້ ເພື່ອລາຍງານຕໍ່ກອງປະຊຸມຄະນະກຳມະການ ສາລະບານສິນຄ້າລະບົບເອກະພາບອາຊຽນ ແລະ ກອງປະຊຸມຫົວໜ້າກົມພາສີອາຊຽນຕາມລຳດັບ.
ແຫລ່ງຂ່າວ:
