ສະໜາມບິນນານາຊາດດູໄບຂອງສະຫະລັດອາຣັບອາມິເຣດ ຍັງເປັນສະໜາມບິນທີ່ມີຜູ້ໂດຍສານຫຼາຍທີ່ສຸດໃນໂລກ ສຳລັບການເດີນທາງລະຫ່ວາງປະເທດໃນປີ 2015 ທີ່ຜ່ານມາ ໂດຍມີຈຳນວນຜູ້ໂດຍສານເພີ່ມຂຶ້ນ 10,7%.
ສະໜາມບິນດູໄບຖະແຫຼງໃນວັນທີ 1 ກຸມພາທີ່ຜ່ານມາວ່າ ໃນປີ 2015 ສະໜາມບິນດູໄບຮອງຮັບຜູ້ໂດຍສານຫຼາຍກວ່າ 78 ລ້ານຄົນ ໄດ້ແຮງສະໜັບສະໜູນຈາກການເພີ່ມຈຳນວນນັກທ່ອງທ່ຽວອິນເດຍ, ອັງກິດ ແລະ ຊາອຸດິດອາຣັບບີ ໂດຍຊາວອິນເດຍເດີນທາງມາຍັງສະໜາມບິນດູໄບໃນປີທີ່ຜ່ານມາເກືອບ 10,4 ລ້ານຄົນ ເພີ່ມຂຶ້ນຈາກປີ 2014 ຄິດເປັນ 17% ສ່ວນຊາວອັງກິດເພີ່ມຂຶ້ນ 6% ເປັນ 5,7 ລ້ານຄົນ ນັກເດີນທາງຊາອຸດິດອາຣັບບີເພີ່ມຂຶ້ນ 12% ເປັນ 5,5 ລ້ານຄົນ, ຊຶ່ງປີທີ່ຜ່ານມາສະໜາມບິນດູໄບປະກາດວ່າ ມີນັກທ່ອງທ່ຽວຕ່າງປະເທດຫຼາຍທີ່ສຸດໃນໂລກນຳໜ້າສະໜາມບິນຮິດໂທວຂອງອັງກິດໄປ ໂດຍຕະຫຼອດປີ 2014 ມີນັກທ່ອງທ່ຽວຕ່າງປະເທດເດີນທາງຜ່ານສະໜາມບິນດູໄບ 70,4 ລ້ານຄົນ.
ທັງນີ້ດູໄບຕັ້ງຢູ່ເສັ້ນທາງການບິນຂ້າມທະວີບ ແລະເປັນທີ່ຕັ້ງຂອງສາຍການບິນເອມິເຣດຈິ່ງມີສາຍການບິນປະມານ 100 ແຫ່ງບິນອອກຈາກສະໜາມບິນດູໄບໄປຍັງຫຼາຍກວ່າ 240 ປາຍທາງທົ່ວໂລກ ແລະ ສະໜາມບິນດູໄບຍັງເປັນສະໜາມບິນໜຶ່ງໃນຫຼາຍໆແຫ່ງໃນອ່າວເປີເຊຍທີ່ມີການເຕີບໂຕຢ່າງມະຫາສານໃນໄລຍະບໍ່ທໍ່ໃດປີທີ່ຜ່ານມາ (ຕາມຂ່າວຕ່າງປະເທດ).
