ສຳນັກຂ່າວຕ່າງປະເທດ ລາຍງານໃນວັນທີ 31 ມັງກອນຜ່ານມານີ້ວ່າ ລັດຖະບານສະວິດ ກຽມຈັດລົງປະຊາມະຕິ ໃນວັນທີ 5 ມິຖຸນາຈະມາເຖິງນີ້ ເພື່ອສອບຖາມຄວາມເຫັນຂອງປະຊາຊົນ ວ່າເຫັນດີຕໍ່ກັບນະໂຍບາຍ ການຮັບປະກັນລາຍໄດ້ພື້ນຖານຂອງປະຊາຊົນ ດ້ວຍການໃຫ້ເງິນປະມານເດືອນລະ 2,300 ເອີໂຣ ຫລື ປະມານ 20,235,000 ກີບຕໍ່ເດືອນ ແກ່ພົນລະເມືອງທີ່ຖືສັນຊາດສະວິດທຸກຄົນ ລວມທັງຄົນຕ່າງປະເທດ ທີ່ດຳລົງຊີວິດໃນສະວິດຢ່າງຖືກຕ້ອງຕາມກົດໝາຍ ອັນຈະເຮັດໃຫ້ປະເທດສະວິດ ກາຍເປັນປະເທດທຳອິດຂອງໂລກ ທີ່ນຳໃຊ້ນະໂຍບາຍສະວັດດີການສັງຄົມດັ່ງກ່າວ.

ທັງນີ້ ຄາດການວ່າລັດຖະບານສະວິດ ຈະໃຊ້ງົບປະມານເຂົ້າໃນບ້ວງດັ່ງກ່າວນີ້ ປີລະປະມານ 186 ຕື້ເອີໂຣ ຊຶ່ງແຫລ່ງລາຍຮັບ ທີ່ຈະຈັດສັນເຂົ້າໃນງົບປະມານດັ່ງກ່າວນີ້ ແມ່ນຈະໄດ້ມາຈາກການເກັບພາສີ-ອາກອນ ທີ່ລັດໄດ້ຮັບປົກກະຕິ ບວກກັບການຕັດງົບປະມານ ບ້ວງເງິນຊ່ວຍເຫລືອສະຫວັດດີການສັງຄົມອື່ນໆອອກ ແລ້ວມາຈັດສັນໃສ່ງົບດັ່ງກ່າວແທນ.