ໃນໂອກາດທີ່ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 10 ຂອງພັກປະຊາຊົນປະຕິວັດລາວ ໄດ້ໄຂຂຶ້ນແຕ່ວັນທີ 18-22 ມັງກອນ 2016 ໄດ້ມີບັນດາພັກການເມືອງໃນພາກພື້ນຕ່າງໆຂອງໂລກ ຈຳນວນເກືອບ 30 ພັກ ໄດ້ສົ່ງໂທລະເລກອວຍພອນ ແລະ ຊົມເຊີຍກອງປະຊຸມໃຫຍ່ ຄັ້ງທີ X ຂອງພັກ ແລະ ຊົມເຊີຍການນຳຊຸດໃໝ່ຂອງພັກ ປປ ລາວ ຄື: ພັກກອມມູນິດຫວຽດນາມ ພັກກອມມູນິດຈີນ ພັກປະຊາຊົນກຳປູເຈຍ ພັກແຮງງານເກົາຫຼີ ພັກກອມມູນິດກູບາ ພັກກອມມູນິດອົດສະຕຣາລີ ພັກແຊນນູຣີ ສ ເກົາຫຼີ ກຸ່ມກ້າວໜ້າທົ່ວອິນເດຍ ພັກກອມມູນິດຣັດເຊຍ ພັກກອມມູນິດອູແກຣນ ພັກກອມມູນິດໃໝ່ອັງກິດ ພັກກອມມູນິດບັງກະລາເທດ ພັກກອມມູນິດຕາຈິກິດສະຖານ ພັກແຮງງານແບນຊິກ ພັກກອມມູນິດປອກຕຸຍການ ພັກປະຊາຊົນມົງໂກລີ ພັກແນວໂຮມປົດປ່ອຍປະຊາຊົນສີລັງກາ ພັກກອມມູນິດເຢຍລະມັນ ພັກກອມມູນິດອິນເດຍ-ມາກຊິດ ພັກກອມມູນິດສະວິດ ພັກກອມມູນິດນອກແວ ພັກກອມມູນິດສີລັງກາ ພັກກອມມູນິດສະຫະພັນຣັດເຊຍ ພັກສະຫະພາບເພື່ອຄວາມສາມັກຄີ ແລະ ການພັດທະນາຂອງມຽນມາ ພັກກອມມູນິດອາເມຣິກາ ພັກສັງຄົມນິຍົມຮັກຊາດອີຕາລີ ແລະ ສະຖານທູດເບລາລຸດ ປະຈຳ ສປປ ລາວ.
ເຊິ່ງເນື້ອໃນລວມຂອງສານຊົມເຊີຍຂອງບັນດາພັກເພື່ອນມິດ ແມ່ນໄດ້ຕີລາຄາສູງການໄຂກອງປະຊຸມໃຫຍ່ຄັ້ງນີ້ ເຊິ່ງເປັນເຫດການການເມືອງທີ່ມີຄວາມໝາຍສຳຄັນຍິ່ງ ໃນຊີວິດການເມືອງຂອງພັກ ກໍ່ຄືຂອງປະຊາຊົນລາວບັນດາເຜົ່າ ເປັນການສະແດງເຖິງການເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ຂອງພັກປະຊາຊົນປະຕິວັດລາວ ຕະຫຼອດໄລຍະແຫ່ງການຄົງຕົວ ແລະ ຂະຫຍາຍຕົວຂອງຕົນ ພັກໄດ້ຜ່ານຜ່າພະຍຸລົມແດງ ສິ່ງທ້າທາຍ ແລະ ການທົດສອບນາໆປະການ ຍາດໄດ້ໄຊຊະນະທີ່ມີຄວາມໝາຍປະຫວັດສາດ ໃນພາລະກິດຕໍ່ສູ້ປົດປ່ອຍຊາດ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງສະຫງ່າຜ່າເຜີຍ ໃນວັນທີ 2 ທັນວາ 1975 ພ້ອມນັ້ນ ກໍ່ໄດ້ຕີລາຄາສູງຕໍ່ຜົນສຳເລັດອັນໃຫຍ່ຫຼວງ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຂອງພັກ ສາມາດປົກປັກຮັກສາອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນໄວ້ໄດ້ຢ່າງໝັ້ນຄົງ ເຮັດໃຫ້ເສດຖະກິດແຫ່ງຊາດ ມີການຂະຫຍາຍຕົວຢ່າງຕໍ່ເນື່ອງດ້ວຍຈັງຫວະໄວ ຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນລາວບັນດາເຜົ່າ ໄດ້ຮັບການປັບປຸງໃຫ້ດີຂຶ້ນຢ່າງຈະແຈ້ງ ບົດບາດ ແລະ ອິດທິພົນຂອງ ສປປ ລາວ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ ເຊິ່ງຜົນສຳເລັດອັນໃຫຍ່ຫຼວງເຫຼົ່ານັ້ນ ໄດ້ສ້າງຄວາມເຊື່ອໝັ້ນ ແລະ ເປັນກຳລັງໃຈອັນແຮງກ້າໃຫ້ແກ່ບັນດາພັກການເມືອງປະຕິວັດ ກໍ່ຄືຂະບວນການກຳມະກອນ ແລະ ປະຊາຊາດທີ່ຮັກຫອມສັນຕິພາບໃນທົ່ວໂລກ.
ບັນດາພັກເພື່ອນມິດ ຍັງໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການຊີ້ນຳນຳພາທີ່ປີຊາສາມາດສະຫຼາດສ່ອງໃສ ຂອງພັກປະຊາຊົນປະຕິວັດລາວ ມະຕິກອງປະຊຸມໃຫຍ່ ຄັ້ງທີ X ຂອງພັກ ຈະໄດ້ຮັບການຈັດຕັ້ງຜັນຂະຫຍາຍເຂົ້າສູ່ຊີວິດຕົວຈິງ ຂອງປະຊາຊົນລາວບັນດາເຜົ່າຢ່າງສຳເລັດຜົນ ປະເທດລາວຈະສືບຕໍ່ໄດ້ຮັບການສ້າງສາພັດທະນາໃນທຸກດ້ານ ດ້ວຍບາດກ້າວ ແລະ ຖ່ວງທ່າໃໝ່ທີ່ໜັກແໜ້ນ ບັນລຸເປົ້າໝາຍທີ່ພັກວາງໄວ້.
ແຫລ່ງຂ່າວ:
