ກະຊວງ​ໄປສະນີ ໂທລະ​ຄົມ​ມະນາ​ຄົມ ແລະ ການ​ສື່ສານ ໃນນາມ​ຜູ້​ຮັບຜິດຊອບ​ໃນ​ການ​ຄົ້ນຄວ້າ​ຮ່າງ​ນະໂຍບາຍ​ແຫ່ງ​ຊາດ ດ້ານ​ເຕັກ​ໂນ​ໂລ​ຊີ​ສື່ສານ ແລະ ຂໍ້​ມູນ​ຂ່າວສານ ສະບັບ​ປັບປຸງ​ໃໝ່ ເພື່ອ​ກຽມ​ຄວາມ​ພ້ອມ​ຂອງ​ປະເທດ ຮອງ​ຮັບ​ກັບ​ສະພາບ​ການປ່ຽນແປງ​ໄປ​ສູ່​ຍຸກ​ເສດຖະກິດ​ດີ​ຈິຕອນ ຫຼື ຍຸກ​ແຫ່ງ​ຂໍ້​ມູນ​ຂ່າວສານ ໄດ້​ຈັດ​ກອງ​ປະຊຸມ​ລະດົມ​ຄວາມຄິດ​ເຫັນ​ໃສ່​ຮ່າງ​ນະໂຍບາຍ​ດັ່ງກ່າວ ໃນ​ວັນ​ທີ 28 ມັງກອນ 2016 ທີ່​ສະ​ຖາ​ບັນ​ວິທະຍາສາດສັງຄົມ​ແຫ່ງ​ຊາດ ມີ​ທ່ານ ບຸນ​ສະເຫຼີມ​ໄຊ ເຄນ​ນາ​ວົງ ຫົວໜ້າ​ຫ້ອງການກະຊວງ​ໄປສະນີ ໂທລະ​ຄົມມະ​ນາ​ຄົມ ແລະ ການ​ສື່ສານ ບັນດາ​ຫົວໜ້າ​ກົມ ຫ້ອງການຈາກກະຊວງ​ກ່ຽວຂ້ອງ ແລະ ຜູ້​ຕາງໜ້າ​ຈາກ​ບໍລິສັດ​ຜູ້​ປະກອບ​ການກ່ຽວ​ກັບ IT ເຂົ້າ​ຮ່ວມ.

ກອງ​ປະຊຸມ​ຜູ້​ເຂົ້າ​ຮ່ວມ​ ໄດ້ພ້ອມ​ກັນ​ຄົ້ນຄວ້າ​ວາງ​ແຜນ​ຮ່ວມກັນ ເພື່ອ​ແນໃສ່​ເຮັດ​ໃຫ້​ຮ່າງ​ນະໂຍ​ບາຍ​ແຫ່ງ​ຊາດ​ດ້ານ​ເຕັກ​ໂນໂລ​ຊີ​ສື່ສານ ແລະ ຂໍ້​ມູນ​ຂ່າວສານ ໃຫ້​ມີ​ຄວາມ​ຖືກຕ້ອງ​ສົມບູນ ແລະ ສອດຄ່ອງ​ກັບ​ສະພາບການ​ພັດທະນາ​ເສດຖະກິດ-ສັງຄົມ​ຂອງ​ປະເທດ ເຊິ່ງ​ປັດຈຸບັນ ເຕັກ​ໂນ​ໂລ​ຊີ​ດ້ານ​ການ​ສື່ສານ ຫຼື ລະບົບ IT ໃນ​ທົ່ວ​ໂລກ​ ແມ່ນ​ມີການ​ພັດທະນາ ແລະ ຂະຫຍາຍຕົວ​ໄວ ໂທລະສັບ​ມື​ຖື​ໄດ້​ຖືກ​ພັດທະ​ນາ ມາ​ຮອດ​ລະບົບ 3G-4G ແລະ ພວມ​ກ້າວ​ສູ່​ລະບົບ 5G ໃນ​ປີ 2020 ເມື່ອ​ໄປ​ເຖິງ​ຈຸດ​ນັ້ນ ລະບົບ​ການ​ເຮັດ​ວຽກ​ຈະ​ຖືກເຊື່ອມ​ຕໍ່​ເຂົ້າ​ອຸປະກອນ​ຮັບ​ໃຊ້​ຊີວິດ​ປະຈຳ​ວັນ ຈະ​ເຮັດ​ໃຫ້ການເຮັດ​ວຽກ​ມີ​ຄວາມ​ສະດວກສະບາຍ​ຍິ່ງ​ຂຶ້ນ ລວມ​ທັງ​ສາມາດຮອງ​ຮັບ​ການ​ຫັນ​ເປັນ​ທັນ​ສະໄໝແບບ​ເອ​ເລັກ​ໂຕຣ​ນິກ​ ຂອງ​ທົ່ວ​ຂະແໜງ​ການ ເປັນຕົ້ນແມ່ນ​ການຄ້າ E-Commerce ການ​ທະນາ​ຄານ ການ​ບໍລິຫານ ແລະ ບໍລິ​ການ​ຂອງ​ພາກ​ລັດ ແລະ ເອກະຊົນ.