ລັດຖະບານຣັດເຊຍເປີດເຜີຍພ້ອມຮ່ວມມືກັບໂອເປັກໃນການຫຼຸດກຳລັງການຜະລິດນ້ຳມັນ ເພື່ອຮັກສາສົມດຸນໃນຕະຫຼາດ ຫຼັງອຸປະທານທີ່ເກີນຄວາມຕ້ອງການຕະຫຼອດປີທີ່ຜ່ານມາ ສົ່ງຜົນກະທົບຢ່າງໜັກຕໍ່ເສດຖະກິດຂອງກຸ່ມປະເທດຜູ້ຜະລິດນ້ຳມັນ.
ຕາມຂ່າວຕ່າງປະເທດລາຍງານຈາກນະຄອນຫຼວງມຸສກູຂອງຣັດເຊຍໃນທ້າຍອາທິດທີ່ຜ່ານມາວ່າ ທ່ານ ອາເລັກເດີ ໂນວັດ ລັດຖະມົນຕີວ່າການກະຊວງພະລັງງານຂອງຣັດເຊຍລະບຸເລື່ອງອົງການກຸ່ມປະເທດຜູ້ສົ່ງອອກນ້ຳມັນ (ໂອເປັກ) ກຽມຫຼຸດກຳລັງການຜະລິດນ້ຳມັນລົງ 5% ວ່າ ເປັນປັດໄຈທີ່ກຳນົດ ທີ່ມີການສະເໜີຂຶ້ນໃນກຸ່ມສະມາຊິກໂອເປັກ ຂະນະທີ່ແຫຼ່ງຂ່າວໂອເປັກເປີດເຜີຍວ່າ ທາງອົງການພ້ອມຮ່ວມມືກັບປະເທດນອກກຸ່ມເພື່ອຮັກສາສະຖຽນລະພາບຂອງລາຄານ້ຳມັນ, ທັງນີ້ຊາອຸດິດອາຣັບບີສະໜັບສະໜູນຂໍ້ສະເໜີຂອງເວເນຊູເອລາ ແລະ ອານເຊຣີ ໃນເລື່ອງການໃຫ້ສະມາຊິກໂອເປັກແຕ່ລະປະເທດຫຼຸດກຳລັງການຜະລິດຂອງຕົນເອງລົງ 5% ຂະນະທີ່ຣັດເຊຍບໍ່ໄດ້ເປັນສະມາຊິກໂອເປັກເປີດເຜີຍວ່າ ພ້ອມເຂົ້າຮ່ວມກອງປະຊຸມໂອເປັກເທື່ອຕໍ່ໄປ ເພື່ອສະເໜີແຜນ ການຫຼຸດກຳລັງການຜະລິດຂອງຕົນເອງລົງ 5 ແສນບາເຣລຕໍ່ມື້.
ຖ້າຫາກຂໍ້ມູນດັ່ງກ່າວເປັນຄວາມຈິງຈະຖືວ່າເປັນຂໍ້ຕົກລົງທີ່ສຳຄັນທີ່ສຸດໃນຮອບ 1 ທົດສະວັດຂອງວົງການນ້ຳມັນໂລກ ໃນການແກ້ໄຂບັນຫາວິກິດຄວາມຕ້ອງການລົ້ນຕະຫຼາດ ຊຶ່ງເປັນປັດໃຈສຳຄັນທີ່ເຮັດໃຫ້ລາຄານ້ຳມັນດິບໃນຕະຫຼາດໂລກຕົກຕໍ່າຢ່າງໜັກຕັ້ງແຕ່ກາງປີ 2015 ແລະ ສ້າງສະຖິຕິຕໍ່າສຸດໃນຮອບ 12 ປີ ໂດຍເຫຼືອພຽງ 27 ໂດລາສະຫະລັດຕໍ່ບາເຣລເມື່ອຕົ້ນເດືອນມັງກອນ ສົ່ງຜົນກະທົບຢ່າງໜັກຕໍ່ກຸ່ມປະເທດຕາເວັນອອກກາງ ທີ່ຕ້ອງ ການແກ້ໄຂສະຖານະການດ້ວຍການປັບຫຼຸດງົບປະມານ ແລະ ຫຼຸດຄ່າເງິນ.
