ສຳນັກຂ່າວຕ່າງປະເທດ ລາຍງານໃນວັນທີ 28 ມັງກອນຜ່ານມານີ້ວ່າ ທ່ານ ອາກິຣະ ອາມາຣິ ລັດຖະມົນຕີເສດຖະກິດຂອງຍີ່ປຸ່ນ ໄດ້ຕັດສິນໃຈລາອອກຈາກຕຳແໜ່ງ ພາຍຫລັງຖືກກ່າວຫາວ່າ ມີພຶດຕິກຳສໍ້ລາດບັງຫລວງ ໂດຍການຮັບເງິນສິນບົນຈາກບໍລິສັດກໍ່ສ້າງແຫ່ງໜຶ່ງ ຊຶ່ງທ່ານ ອາມາຣິ ໄດ້ທຳການຖະແຫລງຂ່າວຢູ່ນະຄອນຫລວງໂຕກຽວ ປະກາດການລາອອກຂອງຕົນ ໃນວັນພະຫັດທີ 28 ມັງກອນ 2016 ຜ່ານມາ ພ້ອມກັບນ້ຳຕາ ແລະ ສະແດງຄວາມເສຍໃຈ ຕໍ່ເຫດການທີ່ເກີດຂຶ້ນດັ່ງກ່າວ.
ທັງນີ້ ທ່ານ ອາມາຣິ ໄດ້ຖືກແຕ່ງຕັ້ງຈາກ ນາຍົກລັດຖະມົນຕີ ຊິນໂສະ ອາເບະ ແຫ່ງປະເທດຍີ່ປຸ່ນ ໃຫ້ດຳລົງຕຳແໜ່ງ ລັດຖະມົນຕີເສດຖະກິດ ແລະ ນະໂຍບາຍ ເມື່ອທ້າຍປີ 2012 ເປັນຕົ້ນມາ ຈົນພາຍຫລັງມີວາລະສານທ້ອງຖິ່ນສະບັບໜຶ່ງຂອງຍີ່ປຸ່ນ ໄດ້ເຜີຍແຜ່ໃນອາທິດກ່ອນນີ້ວ່າ ທ່ານ ອາມາຣິ ແລະ ທີມທີ່ປຶກສາຂອງເຂົາ ໄດ້ລັກລອບຮັບເງິນສິນບົນ ຈາກບໍລິສັດກໍ່ສ້າງແຫ່ງໜຶ່ງ ເພື່ອຕອບແທນທີ່ເຂົາໄດ້ຊ່ວຍ ເຮັດໃຫ້ບໍລິສັດດັ່ງກ່າວ ຕິດຕໍ່ກັບເຈົ້າຂອງທີ່ດິນ ຊຶ່ງພາຍຫລັງທ່ານ ອາມາຣິ ໄດ້ອອກມາກ່າວຍອມຮັບ ວ່າໄດ້ຮັບເງິນດັ່ງກ່າວແທ້ຈິງ ແຕ່ຫາກເປັນເງິນບໍລິຈາກທາງການເມືອງ ໂດຍທີມງານຂອງເຂົາເອງ ຈັດການໃນເລື່ອງດັ່ງກ່າວຜິດພາດ.