ຂປລ. ໃນວັນທີ 27 ມັງກອນນີ້ ທີ່ ສະຖານທູດອົດສະຕຣາລີ ປະຈໍາ ສປປ ລາວ ນະຄອນຫລວງວຽງຈັນ, ໄດ້ຈັດງານລ້ຽງສະຫລອງວັນຊາດຄົບຮອບ 228 ປີ ຂະນະທີ່ລັດຖະບານອົດສະຕຣາລີ ຢືນຢັນຈະສືບຕໍ່ເປັນຄູ່ຮ່ວມມື ໃຫ້ການ ຊ່ວຍເຫລືອປະຕິບັດຕົວຈິງ, ແບບສ້າງສັນ ແລະ ຕໍ່ເນື່ອງພາຍໃຕ້ແຜນການພັດທະນາ-ສັງຄົມ ຂອງສປປ ລາວ.
ໃນພິທີສະເຫລີມສະຫລອງວັນຊາດດັ່ງກ່າວ, ໂດຍໃຫ້ກຽດເຂົ້າຮ່ວມຂອງທ່ານ ສົມມາດ ພົນເສນາ ລັດຖະມົນຕີວ່າການ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ທ່ານ ຈອນ ວິວລ້ຽມ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ອົດສະຕຣາລີ ປະຈໍາສປປ ລາວ ພ້ອມ ບັນດາລັດຖະມົນຕີວ່າການ, ຊ່ວຍການ, ເຈົ້າໜ້າທີ່ກ່ຽວຂ້ອງ ແລະ ສື່ມວນຊົນເຂົ້າຮ່ວມ.
ໂອກາດດັ່ງກ່າວ, ທ່ານ ຈອນ ວິວລ້ຽມ ກ່າວວ່າ: ປີ 2015 ສປປ ລາວ ໄດ້ມີເຫດການສໍາຄັນເກີດຂຶ້ນຫລາຍຢ່າງ ໂດຍສະເພາະການ ສະຫລອງວັນສະຖາປະນາສປປ ລາວ ຄົບຮອບ 40 ປີ, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ, ປີ 2016 ສປປ ລາວ ເປັນປະທານອາຊຽນ ແລະ ປີ 2017 ຈະຫລອງວັນສ້າງຕັ້ງສາຍພົວພັນ ລາວ-ອົດສະຕຣາລີ ຄົບຮອບ 65 ປີ. ສະນັ້ນ ປະເທດອົດສະຕຣາລີ ໃນຖານະເພື່ອນບ້ານເຊັ່ນດຽວກັບບັນດາປະເທດ ໃນພາກພື້ນທີ່ໄດ້ຮັບຜົນປະໂຫຍດ ອັນໃຫຍ່ຫລວງຈາກການ ມີສະຖຽນລະພາບ ແລະ ຄວາມຖືກຕ້ອງປອງດອງ ຂອງພາກພື້ນອາຊີຕາເວັນອອກສຽງໃຕ້ ແລະ ສະແດງຄວາມຊົມເຊີຍ ຕໍ່ຜົນສໍາເລັດທີ່ ສປປ ລາວ ຍາດມາໄດ້ຢ່າງໃຫຍ່ຫລວງພ້ອມນີ້, ອົດສະຕຣາລີ ໃນຖານະທີ່ເປັນປະ ເທດຄູ່ເຈລະຈາທຳອິດ ແລະ ເກົ່າແກ່ທີ່ສຸດຂອງ ASEAN ເຫັນວ່າຄຸນຄ່າຂອງການຮ່ວມມື ກັບບັນດາປະເທດເພື່ອນບ້ານ ໃນພາກພື້ນອາຊີຕາເວັນອອກ ສ່ຽງໃຕ້, ລວມທັງສາຍພົວພັນ ອັນແໜ້ນແຟ້ນ ແລະ ຍາວນານກັບສປປ ລາວ, ຂ້າພະເຈົ້າ ມີຄວາມຍິນດີ ແລະ ຂອບ ຂອບໃຈເປັນຢ່າງຍິ່ງ ທີ່ໄດ້ຮັບກຽດເຂົ້າຮ່ວມງານ ສະເຫລີມສະຫລອງວັນສໍາຄັນຕ່າງໆ ລວມທັງຜົນສຳເລັດທີ່ ສປປ ລາວຍາດມາໄດ້ ໃນໄລຍະ 4 ທົດສະວັດຜ່ານມາ ແລະ ຂໍຖືໂອກາດອວຍພອນ ໄຊມາຍັງຄະນະບໍລິຫານງານ ສູນກາງພັກຊຸດໃໝ່ ຈົ່ງປະສົບຜົນສຳເລັດ ໃນການນຳພາປະເທດຊາດ ໃຫ້ຜ່ານພົ້ນບັນດາສິ່ງທ້າທາຍຕ່າງໆ ໃນຕໍ່ໜ້າຢ່າງສົມບູນ ໂດຍສະເພາະການເພີ່ມຂຶ້ນ ຂອງການເຊື່ອມໂຍງເສດຖະກິດໂລກ ແລະ ພາກພື້ນ ຈະນຳເອົາໂອກາດໃໝ່ໆມາສູ່ສປປ ລາວ.
ລັດຖະບານອົດສະຕຣາລີ ຢືນຢັນຈະສືບຕໍ່ເປັນຄູ່ຮ່ວມມື ໃຫ້ການຊ່ວຍເຫລືອປະຕິບັດຕົວຈິງ, ແບບສ້າງສັນ ແລະ ຕໍ່ເນື່ອງພາຍໃຕ້ແຜນການ ພັດທະນາ-ສັງຄົມຂອງສປປ ລາວ ໃນນັ້ນ, ບໍລິສັດອົດສະຕຣາລີ ຈະພິຈາລະນາເຂົ້າມາລົງທຶນ ຢູ່ສປປ ລາວ ໃຫ້ຫລາຍຕື່ມເຊັ່ນ: ດ້ານບໍ່ແຮ່ ແລະ ພະລັງງານ, ການຄົມມະນາຄົມຂົນສົ່ງ, ການກະສິກໍາ, ການທ່ອງທ່ຽວ, ການກໍ່ສ້າງ, ການບໍລິການດ້ານກົດໝາຍ ແລະ ການເງິນ ດັ່ງນີ້ເປັນຕົ້ນ.
ແຫລ່ງຂ່າວ:
