ເຈົ້າໜ້າທີ່ສືບສວນ-ສອບສວນກອງບັນຊາການ ປກສ ເມືອງໄຊເຊດຖາ ໄດ້ສົມທົບກັບອົງການຈັດຕັ້ງບ້ານໂຊກຄໍາ ເມືອງໄຊເຊດຖາ ລົງມ້າງເປົ້າໝາຍຄ້າຂາຍຢາເສບຕິດສາມາດຈັບຕົວທ້າວ ລັດດາວັນ ຫຼື ໂບ້ ອາຍຸ 24 ປີຢູ່ບ້ານໂຊກຄໍາ ພ້ອມຂອງກາງຢາບ້າ ຈໍານວນ 1.665 ເມັດ, ສືບສວນ-ສອບສວນຂະຫຍາຍຜົນຫາເປົ້າໝາຍຊັດ ທອດສາມາດຈັບຕົວຜູ້ຂາຍຢາບ້າໄດ້ອີກ 1 ຄື: ທ້າວ ວິພາກອນ ຫຼື ເຈົ່າ ອາຍຸ 18 ປີ ຢູ່ບ້ານໂຊກຄໍາ ພ້ອມຢາບ້າ 2.737 ເມັດ ແລະຜູ້ມົ້ວສຸມຢາເສບຕິດອີກ 2 ຄົນຊື່ ທ້າວ ວິພາລິນ ຫຼື ຄິວ ອາຍຸ 25 ປີ ແລະທ້າວ ທິລະສັກ ຫຼື ຕ່າມ ອາຍຸ 24 ປີ ທັງສອງຢູ່ບ້ານສີສັງວອນ ເມືອງ ໄຊເຊດຖາ ນະຄອນຫຼວງວຽງຈັນ ຊຶ່ງ ທັງໝົດຖືກຈັບຕົວໃນວັນທີ 12 ພະຈິກ 2015.
ທ້າວ ໂບ້ ໄດ້ຮັບສາລະພາບວ່າ: ໄດ້ເລີ່ມເສບຢາບ້າ ແລະຄ້າຂາຍຢາບ້າມາ ແຕ່ປີ 2013 ເສບມື້ລະ 1-3 ເມັດ, ສ່ວນຢາບ້າທີ່ນໍາມາເສບ ແລະຂາຍນັ້ນແມ່ນຊື້ນໍາທ້າວ ເຈົ່າ, ຊື້ຄັ້ງລະ 1 ຖົງເທົ່າກັບ 200 ເມັດ, ວິທີການແມ່ນຕິດຕໍ່ສັ່ງຊື້ ທາງໂທລະສັບ ແລ້ວທ້າວ ເຈົ່າ ກໍນໍາຢາບ້າມາສົ່ງໃຫ້ຢູ່ທີ່ເຮືອນຂອງຕົນ, ເມື່ອໄດ້ຢາບ້າມາແລ້ວກໍນໍາມາຂາຍໃຫ້ໄວລຸ່ນທົ່ວໄປ ຈົນຮອດປີ 2014 ຈຶ່ງໄດ້ສັ່ງຊື້ຢາບ້ານໍາທ້າວ ເຈົ່າ ຫຼາຍຂຶ້ນເປັນຄັ້ງລະ 5 ຖົງ 1 ມັດ, ຮອດວັນທີ 11 ພະຈິກ 2015 ຕົນໄດ້ຊື້ຢາບ້ານໍາທ້າວ ເຈົ່າ ຈໍານວນ 5 ຖົງ ຫຼື ເທົ່າກັບ 1.000 ເມັດ ບວກກັບຢາບ້າທີ່ຍັງເຫຼືອຈໍານວນ 665 ເມັດ, ມາຮອດວັນທີ 12 ພະຈິກ 2015 ກໍມີເຈົ້າໜ້າທີ່ມາກວດຄົ້ນເຮືອນ ຈຶ່ງພົບຢາບ້າຈໍານວນດັ່ງກ່າວ.
ເຈົ້າໜ້າທີ່ ປກສ ເມືອງໄຊເຊດຖາ ໄດ້ໃຫ້ຮູ້ວ່າ: ເມື່ອຈັບຕົວທ້າວ ໂບ້ ໄດ້ແລ້ວກໍໄດ້ວາງແຜນສືບຕໍ່ຂະຫຍາຍຜົນ ຫາເປົ້າໝາຍຊັດທອດ, ໃນເວລາຕໍ່ມາຂອງວັນດຽວກັນເຈົ້າໜ້າທີ່ກໍໃຊ້ວິທີການໃຫ້ທ້າວ ໂບ້ ໂທລະສັບສັ່ງຊື້ຢາ ບ້ານໍາທ້າວ ເຈົ່າ ອີກ, ເມື່ອຮອດເວລານັດໝາຍທ້າວ ເຈົ່າ ກໍໄດ້ຂັບຂີ່ລົດຈັກມາສົ່ງຢາບ້າໃຫ້ທ້າວ ໂບ້, ເຈົ້າໜ້າທີ່ ຈຶ່ງສະແດງຕົວເຂົ້າຈັບກຸມທ້າວ ເຈົ່າ ແລະກວດຄົ້ນລົດພົບເຫັນຢາບ້າຢູ່ເບາະລົດຈໍານວນ 137 ເມັດ, ຈາກນັ້ນກໍໄດ້ ປະສານກັບອົງການຈັດຕັ້ງທີ່ກ່ຽວຂ້ອງ ເພື່ອເຂົ້າກວດຄົ້ນເຮືອນຂອງທ້າວ ເຈົ່າ, ຜ່ານການກວດຄົ້ນ, ເຈົ້າໜ້າທີ່ຈຶ່ງພົບເຫັນຢາບ້າຈໍານວນ 1 ມັດກັບ 3 ຖົງ ແລະອຸປະກອນເສບຢາບ້າຈໍານວນຫຼາຍ, ນອກຈາກນີ້ຍັງສາມາດຈັບຕົວທ້າວ ຄິວ ຊຶ່ງເປັນອ້າຍຄີງຂອງທ້າວ ເຈົ່າ ແລະ ທ້າວ ຕ່າມ ຊຶ່ງເປັນລູກຂອງປ້າທ້າວ ເຈົ່າ ທີ່ກໍາລັງມົ້ວສຸມຢາເສບ ຕິດຢູ່ເຮືອນຫຼັງດັ່ງກ່າວ, ສາມາດຢຶດລົດກະບະວີໂກ້ (ແຄັບ) ສີຂາວໝາຍເລກທະບຽນ ກຣ 8288 ກໍາແພງນະຄອນ ຂອງທ້າວ ຕ່າມທີ່ເຄີຍນໍາໃຊ້ເຂົ້າ ໃນການຂົນສົ່ງຢາບ້າ, ຈາກນັ້ນ ເຈົ້າໜ້າທີ່ກໍໄດ້ນໍາຕົວພວກກ່ຽວມາທີ່ກອງຄະດີອາຍາ ປກສ ເມືອງໄຊເຊດຖາ ເພື່ອດໍາເນີນການສືບສວນ-ສອບສວນຕາມລະບຽບກົດໝາຍ.
ທີ່ມາ: