ສຳນັກຂ່າວຕ່າງປະເທດ ລາຍງານໃນວັນທີ 28 ມັງກອນນີ້ວ່າ ບໍລິສັດ ໂຕໂຍຕ້າ ປະເທດຍີ່ປຸ່ນ ຍັງຄົງຮັກສາຕຳແໜ່ງ ຜູ້ຜະລິດລົດຍົນລາຍໃຫຍ່ທີ່ສຸດໃນໂລກ ເປັນປີທີ 4 ຕິດຕໍ່ກັນ ຫລັງຈາກທີ່ອອກມາເປີດເຜີຍ ໃນວັນພຸດທີ 27 ມັງກອນຜ່ານມາວ່າ ພວກເຂົາສາມາດຂາຍລົດ ໄດ້ສູງເຖິງ10.15 ລ້ານຄັນໃນທົ່ວໂລກ ເມື່ອປີ 2015 ຜ່ານມາ ຊຶ່ງສູງກ່ວາຜູ້ຜະລິດລົດຄ້າຍໃຫຍ່ອື່ນໆ.

ທ່ານ ໂຢຊິອາກິ ຄາວາໂນະ ນັກວິເຄາະຊາວຍີ່ປຸ່ນໄດ້ລະບຸວ່າ ໂຕໂຍຕ້າ ອາດຄອງແຊັ້ມຜູ້ຜະລິດລົດຍົນ ອັນດັບ 1 ຂອງໂລກ ໄດ້ອີກຢ່າງໜ້ອຍ 1 ປີ ໂດຍຈະໄດ້ຮັບຜົນປະໂຫຍດ ຈາກຕະຫລາດລົດຍົນໃນສະຫະລັດອາເມຮິກາ ທີ່ຄາດວ່າຈະເຕີບໂຕຂຶ້ນອີກໃນປີ 2016, ແຕ່ຍອດຂາຍລົດຂອງໂຕໂຍຕ້າ ໃນປະເທດຈີນ ຍັງຄົງຕາມຫລັງຄູ່ແຂ່ງ ຢ່າງລົດໂຟກສະວາເກັນ ຫລື ນິດສັນ ຊຶ່ງອາດເຮັດໃຫ້ໂຕໂຍຕ້າ ເສຍແຊັ້ມໃນປີຖັດໄປ.