ສຳນັກຂ່າວຕ່າງປະເທດ ລາຍງານໃນວັນທີ 27 ມັງກອນນີ້ວ່າ ທ່ານ ໂມເຊ ຢາລອນ ລັດຖະມົນຕີວ່າການ ກະຊວງປ້ອງກັນປະເທດອິດສະຣາແອນ ໄດ້ອອກມາກ່າວຫາລັດຖະບານຕວກກີວ່າ ລັກລອບຊື້ນ້ຳມັນເຖື່ອນ ຈາກກຸ່ມລັດອິດສະລາມ ຫລື ໄອເອັສ ມາເປັນເວລາດົນນານ ເຮັດໃຫ້ກຸ່ມດັ່ງກ່າວ ມີເງິນມາໃຊ້ໃນການເຄື່ອນໄຫວ ກໍ່ຄວາມບໍ່ສະຫງົບ ໂດຍທ່ານໄດ້ກ່າວວ່າ ” ກຸ່ມໄອເອັສມີຄວາມສະດວກສະບາຍ ກັບການໃຊ້ເງິນທີ່ໄດ້ຈາກຕວກກີ ມາຫລາຍໂພດແລ້ວ ”

ທ່ານ ຢາລອນ ຍັງໄດ້ກ່າວຕື່ມອີກວ່າ ປັດຈຸບັນນີ້ແມ່ນຂຶ້ນຢູ່ກັບຕວກກີ ລັດຖະບານຕວກກີ ແລະ ຜູ້ນຳຕວກກີ ທີ່ຈະຕັດສິນໃຈວ່າ ພວກເຂົາຕ້ອງການເປັນສ່ວນໜຶ່ງ ໃນການຮ່ວມມືກັບການຕໍ່ຕ້ານກຸ່ມກໍ່ການຮ້າຍ ຫລື ບໍ່ ໂດຍໃນໄລຍະຜ່ານມາ ລັດຖະບານຕວກກີ ໄດ້ອະນຸຍາດໃຫ້ນັກຮົບກຸ່ມໄອເອັສ ເດີນທາງຈາກເອີຣົບ ເຂົ້າໄປຊີຣີ ແລະ ອີຣັກ ພ້ອມທັງອະນຸຍາດໃຫ້ຄົນເຫລົ່ານີ້ ກັບຄືນອອກມາໄດ້ອີກ.

ທັງນີ້ ເມື່ອເດືອນທັນວາປີ 2015 ຜ່ານມາ ລັດຖະບານສະຫະລັດອາເມຣິກາ ຊຶ່ງເປັນພັນທະມິດໃກ້ຊິດ ກັບລັດຖະບານອິດສະລາແອນ ຫາກໍອອກມາປະຕິເສດຄຳກ່າວຫາຂອງຣັດເຊຍ ທີ່ລະບຸວ່າ ລັດຖະບານຕວກກີ ມີສ່ວນກ່ຽວຂ້ອງກັບການຊື້-ຂາຍນ້ຳມັນເຖື່ອນ ກັບກຸ່ມໄອເອັສ, ເຮັດໃຫ້ການອອກມາກ່າວອ້າງ ຂອງອິດສະຣາແອນໃນຄັ້ງນີ້ ເປັນການສະໜັບສະໜູນ ຄຳກ່າວອ້າງຂອງຣັດເຊຍ ແລະ ສວນທາງກັບລັດຖະບານ ສະຫະລັດດອາເມຣິກາ ຊຶ່ງເປັນພັນທະມິດຂອງຕົນ ຢ່າງສິ້ນເຊີງ.