ວິທະຍຸກະຈາຍສຽງຫວຽດນາມ VOV5 ໄດ້ລາຍງານໃນວັນ​ທີ 26 ມັງກອນຜ່ານມານີ້ວ່າ ໃນມື້ທີ 6 (26 ມັງກອນ 2016) ກອງ​ປະຊຸມ​ໃຫຍ່ຜູ້ແທນ​ທົ່ວ​ປະ​ເທດ ​ຄັ້ງ​ທີ XII ຂອງ​ພັກກອມມູນິດຫວຽດນາມ ໃນວາລະປະຊຸມ​ຕອນ​ເຊົ້າ ບັນດາ​ຜູ້​ແທນກອງປະຊຸມໃຫຍ່ ​ໄດ້​ດຳ​ເນີນ​ການ​ປ່ອນ​ບັດ​ເລືອກ​ຕັ້ງ ​ຄະນະ​ບໍລິຫານ​ງານ​ສູນ​ກາງພັກ​ຊຸດ​ທີ XII, ຈາກນັ້ນ ​ໃນວາລະປະຊຸມ​ຕອນ​ບ່າຍ​ ກອງ​ປະຊຸມ​ໃຫຍ່​​ ໄດ້ຮັບຮອງ​ເອົາ​ບົດ​ລາຍ​ງານ​ຜົນ​ການ​ເລືອກ​ຕັ້ງ​ ຄະນະບໍລິຫານ​ງານ​ສູນ​ກາງ​ພັກ​ຊຸດ​ທີ XII ຊຶ່ງປະກອບມີ​ ກຳມະ​ການສົມ​ບູນ 180 ທ່ານ ​ແລະ ກຳມະການ​ສຳຮອງ 20 ທ່ານ.

ແຫລ່ງຂ່າວຍັງແຈ້ງໃຫ້ຮູ້ອີກວ່າ ໃນວາລະປະຊຸມຕອນເຊົ້າວັນພຸດທີ 27 ມັງກອນນີ້ ຄະນະບໍລິຫານງານສູນກາງພັກ ຊຸດໃໝ່ ຈະດຳເນີນກອງປະຊຸມຄັ້ງປະຖົມມະລຶກ ເພື່ອເລືອກຕັ້ງເອົາກຳມະການກົມການເມືອງສູນກາງພັກ ຕາມລຳດັບ.